BML Issue November 2020

Editorial

               Marapa sawzy he veiseih rai rai lei n’awpa liata eima veih a vaw seih ha tyhna miakha y ta, cha cha khâpa hropa liata vaw châ hlei leipa ta, reih kyh liana heta khizaw pho zydua hry liata eima veih a seih chai khiahmaw tah thei’pa a châ.

              Yru atyukheina liata tlyma, awnanopa ahmaohpakhyna liata tlyma, viasa richâh bielôhawhpa reina liata chhao rai châ sala, tlaikao reih a hmâhpa pakha pano ama y khiahta cha Khazohpa ta reih maniah a piepa Mara reih hnypa ta, molâhpa reih ahlypa ta biereih pi ta, kalihpi eima toh thlâh ha tyh.

              Mara reih he eima byhnâ daona hnawh a châ tahpa he eima my ha tyhpa ma a châ ma, byhnâ eima daona hnawh a châpa eima pahno rai rai leipa ma a châ ma, eima my ha tyhpa ma a châ hri tly?

              Sawhkhâ raihriapa ta, hlao hluhpi hneipa ta chhôhkha eima chyh theina chhâpazy chhao he pakhâta ta eima pachâ tyh awpa he a peimawh ngaita. Reih no-eihpa, chi no-eihpa eima châ vâta Khazohpa a chyhsa, Missionary Rev. R.A. Lorrain nah nôvah hmâpa ta maniah tluapapua ta, âmo hriapasana vâta sapa nata thlahpa lâta byhnâ eima daopa zydua he eima pachâpasia tyh awpa a peimawh kaw. Ama hriapasana Khazohpa ta byhnâ pie ta, India sawhkhâ luhpazy hnohta biereih ta, ryureina eihhrâhpa MADC taihta eima vaw hnei. Cha MADC eima hneipa zawhzi ta sawhkhâ raihria pi ta, chhôhkha chhao eima chyh chyu hra.

              Chavâta eima byhnâ daona hnawh cha khâpa hropa vaw châ leipa ta, ‘Mara reih’ tlai hena Mara sawzy byhnâ daona hnawh cha a châ e tahpa my leipa ta, Mara reih he pasô via lymâ sih la, a lei awpa pasaih leipa ta, Mara reih hmahsie n’awpa ta a hriatuhpa nata pabohsatuhpa châ lymâ ei suh u.

              Ahmaohpakhyna su liata pakha pano reih hropa a hmâhpa ama y vâta Tlaikao reih hmâh khao leip’aw sih la, Mara reih ta chhihthapa ta biereih lymâ ei sih la, chati ta cha Mara reih thai khohna vaw hnei hr’aw ei ta, Mara reih he a vaw laiseih lymâ hra aw.

              Mara saw kyh apachâna liata eima veihseih sala, reih chôchâh liata deikua eima veihseihna he pachhâsa bâ chyu ei suh u.

 

 

 

 

 

THYUTLIA SAWZY

AHRA BÂ EI SUH VY

 

 

~Abie Nôtlia

 

Khazohpa ngiachhiena vâta Mara thyutlia sawzy eimâ hra kaw khiahma tahna ei za hnei. A pachaipa ta Facebook liata thytliapa hluhpizy ta ti nata râh, Mara râh châta eima saduthliena nata eima kho dâhzy akawh kawpa ta reih tyh pi ta, pachâdâh nata hmô dâh chhao a lyu khai tyh vei. Cha hawhta a za châ nota, keima cheingei chhao heta Facebook he kô 7 daihmâ tlai vaw hmâh ha bâ hra nata, ei thôhkhei ngâsâ ha. Ei pachâna nata ei saduthlienazy laizaolaopa ta ei chapai tyh hra.

Anodeikua, ei rei khoh chaipa deikua cha he bie he a châ. Marapa phopi padua awpa heta khâpa he ma eimâ ngiah/peimawh chai tly? Mara râh tlâh n’awpa heta nâma nata keima heta khâpa hmo ma eima tao hra aw? He maohphaohna he nâma ku liata a ypa hawhta nâ pahno beih ma? Na râh heta a châ hnaw kawpa hawhta nâ pahno beih ma? Nâ pahno leipa a châ khiahta la Nationalism chhôhso lôhpi phaoh/hnei awpa ta, nâma kha nâ ‘Bâti’ tua awpa â ngiah thlyu aw.

              Bie hluhpi za rei awpa ei khoh kaw tarawpa ta, bie nata hla thai kawpa ei châ leipa vâta, Marapa phopi padua awpa ta keima mopakha ta ei palôhrupa liata ei za paveih tyhpa nata ei pachâ peimawh kaw tyhpa, ei thyutlia heihzy lâ liata ei rei khoh kawpa he â pazipa ta ei za reih laih tua aw.

 

Mara reih pasâhsa ta pabohsa awpa he thyutlia sawzy maohphaohna a châ:

Marapa phopi padua awpa ta peimawh kawpa he khâpa hmo hema a châ aw? Chi nata Pho pabohsa n’awpa heta khâpa chhaichhi he ma pha chai aw vâ? ‘Reih’ Mara reih tlai he a châ. Atahmâno tawhta Mara reih pasôna châh pahno leipa ta eima khâsia vei khiahta cha, atahmâ tawhta kô 10 pa liata cha eima râh chhôh liana heta Mara reih thei awpa y khao leipa aw ta, Marapa deikua y taraw hra ei sih la, reih thei awpa a y khao vei khiahta cha, Chi nata Pho aleipa eima châ ha bâ aw. Marapa tahpa ta rei awpa y khao aw ma pi. Mara reih pabohsa ta, cheihchalo laih lymâ awpa heta thyutlia sawzy eima maohphaohna â sâh kawpa ta ei pahno. Chavâta thyutlia sawzy pi ta atahmâ tawhta cha, Mara reih hmahsie via n’awpa ta SMS,Facebook nata Internet etc liata zy Mara reih he hmâh hluh via lymâ ei suh vy. Tlaikao reih ta SMS “Mate ka ngai che” tahpa hlâta cha, na pikheipa reih Mara reih cheingei ta, “Eidao…ei cha vâ kaw’’ tahpa he hmâh pachhi tua rai, â ngia via syulyu! Marapa phopi padua awpa ta thyutlia sawzy eimâ tivy tua awpa â ngiah

Ei rei chiehpa hawhta atahmâhlâ he Facebook liata Mara râh pawlitiks chôchâh reihpa ta nata a eichhiapa ta thyutlia saw hluhpi achiavopa ta eimâ hmaohpakhy hôlô, a ly chhao â chhih hmeiseih. Anodeikua, Mara thyutliazy pi he nô nata paw kalachhôh lia eima y chhôh nata, Top-up khô n’awpa nata Internet Pack khô n’awpa dâhdei chhao eima nô nata paw, chhôhkhazy eima hiah thlâh chhôh heta la,Mara râh châta eima saduthliena nata eima ‘Dream’ zy he khâpa sisaw leipa hawh deita a châ aw. A sia kawpa ta alâpa nata â hno thlâh hapa cha, Satlia pakha heta atlyh chy ta Facbook liata MDF/Congress pha leizie nata ama hmo taodâh a kho leina zie reihpa ta, MDF/Congress cha Mara râh châta Party pha chaipa a châ zie thata a reih tyh. Thyutlia thokhazy deikua cha Neutral kawpa ta MDF chhao Congress chhao, MNF etc chhao reipachhiepa ta, ama reipapha tyh. Anodeikua, kha thyutlia paw kha atlyh daihti vaw châ ta, Vote pathla a vaw daih ha ta, pangiasa leipa pita Congress a vote syulyu ha chamaw! Khazia rimâ maw? Facebook lia cha râh kyh a pachâ kaw mâmawh?  A chhâpa cha he vâna heta tlâ châ vei ma? Nô nata paw, Chhôhkha kalachhôh liata a y thomo thlâh hapa cha a chhâ chhâna Last Moment liata cha a nô nata paw, Chhôhkhazy ta ama pahnie (Convince) ha pyly. Yzie za hnei khao vei.

              Cha hawhpa duahmo liata aduahpa eima châpa vâta Marapa phopi padua awpa ta a hmeiseihpa tlaita keih chakâ awpa he a ru ngaita kaw. Thyutlia saw eimâ tivy ha khiahta cha riahpha kawpa ta a hmeiseihpa (Practical) ta nata riahpha kawpa ta keih chakâ awpa chhao eima ngâh aw. Chavâta, hy unawh, Nâma mopakha kha avaw tivy ha tua la, cha tita la thyutlia sawzy pi heta Mara phopi eima padua thei aw.

 

Mara thyutlia sawzy ta zyhna kyh pachâ peimawh ei suh u:

Khâpa hmo rai tao ei sih la, hmia eima pasah awpa cha eima Krizyna he a châ. “Na chakao khoh leipa chi nata pho cha, pahleipadiapa ta y tlôh aw ta” tahpa bie he eima nahkao ta a thei hluh kaw! He bie he bie dopa, bie hrohpa a châ. Khazohpa apahno leipa nata chakao khoh leipa chi nata pho he Khizaw liata nawhna lâ ama pangai via laih lymâ.

              Mara thyutlia sawzy pi ta Khazohpa pahno ei sih la, ato kyh liata hmia eima pasahpa a châ khiahta cha, sapa nata thlahpa liata byhnâ to aw pi ta, râh châ chhaota byhnâ eima tlôkhei thei heih aw. Pari-pangana chôta “Marasaw” tah thlâhthlipa heta khâpa râh rônahpa hmahta maniah tlôkhei beih aw vei. Abeipa eima Khazohpa eima pahnopa a châ khiah cha eimâ chuna nata eima hmotaona kyh lia maih ta byhnâ piepa ta eima y aw tahpa he biedopa nata bie y chiehpa a châ. Chavâta, Mara thyutlia sawzy pi ta eima Khazohpa he pahno ei suh u.

 

Nôpaw hmiatuapazy nata ryureihtuhpazy thlahsana châh pahno ei suh u:

Thyutlia thokhazy pi ta nôpawpazy pakah tawhta ‘sâlâ’ tahpa reikah eima hlao châh aza y tyh. Facebook liata reichhona (Comment) eima pie dâh nata eimâ chhy dâhzy he a châh ta cha mo â dy lei kaw tyh. Reichhona eima pie hlâta hezy he chhôhso lôhpi liata khâ athei thlâh ha ei sih la tahpa ei khoh kaw.

                Marapa phopi padua awpa ta riethei thachhâ panaopa chhao apapeisa leipa ta, o nata lyu siesai ta, mathlai chhaota noza hmiachhie âla laihna chôta keih a chakâtuhpazy ama châ. Taheihna thâh lâ cha, atahmâ ta râh kyhpachâ âtahpa thyutlia sawzy hry liana heta New Siaha tawhta Siaha Bazaar taih phei ta asie hohpa chhao y ma pi mâmy! PL Region ama hia daihti no nata District Council eih-hrâhpa hmô awpa ta keih ama châkâ daihti nozy chhochhi cha ama rai, kha daihti nota sawkhâ rai sôh kawpa siesaipa ta nâma nata keima, Marasaw châ heta keih ama vaw chakâ. Cha nota nâma nata keima ta ama hmo taochheina nata ama taopasipa sai reih/tlua pi ta, ama hmo taophapa deikua thei lei pachâsapa ta reipa khoh ma pi. A pei chaimâh; bâsai ei suh u.

              Tawhla, atahmâ ta eima râh nôpawpazy chhao he ama hmotao chheipa nata ama pado leina sai reipa thlâh ha leipa ta, ama hmotao phapazy chhao reipa hra ei suh u. Nâma nata keima eima pahnopa nata eima hmôpa khô lâ liata Mara râh châta zâ mokuh-ramâ chhao khaih leipa ta, achhô azâ ta rai ama hria tyh taraw! Chavâta, kheihtarai châ hrasala hy unawh; asohsi ei suh vy.

              A chhâ chaina liata ei thyutlia heihzy lâ liata ei rei khoh kawpa cha, nâma nata keima heta Mara phopi padua awpa ta taotheipa eima hnei hra na tahpa he pahno ei sih la, khâpa kao liata chhâ a phana lâta Mara râh hmia phaozie he panano a chhuah ei suh vy.

 

‘Mara râh nata Khazohpa châta’

 

 

Zawpi  ahmaohna

(Public Gathering )

 

~ H.  Beialikô  Nôhro

New Colony - II

Siaha

 

                                                                                                                                                             

 

 

              Zawpi   ahmaohna  tahpa  he  reihpasia  byuh  leipa ta  a  yzie  cha  eima  pahno  thei  aw.  He  liata   deikua  cha  a  yzie (meaning) châ  leipa ta, a  châna (nature)  lâchhâh  rei ei  chhuah  aw. Eima   society  heta  phana   kyh   liata  nata  chhiena  kyh  liata  alykhei  ta, ataokhei  rairie   awpa  he  â  pahmô  kaw  bâ  pi ta. Eimâ   ngiapâna  vâta   hmopha   taona  hawhta  eima  pachâ  vâ  chhao  a  châ   nahta  pangiasa  â  chhih. Hlâno  eima  mahnô  nata  mahpawzy  tawhta  eimâ  vaw pachupachhuah  tyhpa  palôhâh  veiseih,  pachâna  pahnopa  nata  taozie  ngiapa  a châ  vata  chhao  a châ  nahta  pangiasa  â chhih. Cha  dei leipa ta  khizaw  sôhtlâh  a lapa ta, eima  hro  â  kaw sâh  viapa  vâta  chyhsazy   taozie   ngiapa  eima  pahnopa  nata   eima hmôpazy  vâta  chhao  a  châ  thei  aw. Eimâ   ngiapâna  a sianô  kaw   vâta   chhao  châ leipa ta  chyhsa  hluhpi  ta ama tao hra  vâta  nata  Krizyhpa  eima châ  hrana vâta apakhypazizy  chhao  eima   tiama  ngaita  kaw  hra.

Hlâno  eima  mahnô  nata  mahpaw no ta  eima  vaw  pahno  beih leipa;  pinoh  alyna (Birthday celebration) nata  aduanoh  alyna tahpa   chhao  eima  hryta  a panâ (Common)  kaw  bâ. Khiliah  liata  kheihawhpa  hmotaona (functions) vâta  tlyma  zawpi  ahmaohnazy  chhao eima  hryta vaw  y  ngâ  kaw tyh  bâ  hra  ta. Khitlâh  nôpaw  penawhzy  pachhuahpanohna  vâta  mapi  ahmaohna  chhao hmô   awpa  a hluh  kaw. Khizaw  hmahsiena  arâpasuana  eimâ  chadai  hra  vâta  eima  tlyliah (field) liata  zawpi  a pôhpakhyna  chhochhi  cha  reih  tiah  awpa châ  ngyu  vei.

              Khâpa  rai  châ  sala  he  zawpi  a pôhpakhyna  a phana  nata  pha  leina  tlyma  he  rei  a  chhuah  leipa  na ta. He  hawhta  mapi  eimâ  hmaoh-hmâna  liata  chyhsa  hluhpizy  ta eimâ  tyuduah  dâh  he  rei  ei khopa  tlao  a châ. Chyhsa  hluhpi  ta  he hawhta  mapi  eimâ  hmaohpakhyna  daihtizy  liata  a tyudua  dâh,  ydâh  hrodâh  he  thai  tyh  leipa pi ta. Eima  hrozie  ngiapa  nata  phapazy  pua khei  ta  palâhâh  eimâ  chhuah  kaw  no ta  keimo  liata  khâchâ  âbai  hapa, moleina  vâta  eima  vaw  pîkheipa  apalaina, kei  â  tahna, sasyh  â  hmô pasâhna, a chaluahchadâh  khonazy (Trying  to  become  Public  figure), vâta  eima  palôh  a  vaw pahnie  (Control) hmâ   khao  tyh  leipa  pi ta. Chyhsazy  mohmô  ta  â  lâhâhna  liata  angiahna, zachhihna, mohphana  nata   thâphana  (In  search  of  temporary  Populoarity) tlyuh  leipa  nata  adaih  parei  leipa  cha  tluapa ta  eimâ  tymâ  khei  tyh. Thokha  cha  he  hawhta  zawpi  apôhpakhyna  su lia  heta  khichai  laipa hawhta  â  pachâna  hnei  tyh  ei  ta, kha  su  liata  ama  vawna  chhâpa  nata  zawpizy  zana (Public Respect)   châh  chhao  pahno  khao  leipa ta  ama  bierei  khohpazy  reina  daihti  hawhta  amâ  pachâ  tyh. A  nahthlietuhpazy   hmiakô  ta  châtuhpaw(Actor) hawhta  â  pielyu  ei  ta, ama  kiah  liata  a  ypazy  palôh  pahnie  amâ   chhuah  tyh.

Zawpi  eimâ  hmaohpa  he  a chhâ -vâpa  nano  nanopazy  vâta  châ  tyh ta. Cha  a chhâ- vâpazy  yzie  lymâ  hawhna  chata  eima  pathipalôh  phaozie (Mentality,  Mood)   nata   eima  hmiaphaozie  (Our  Countenance,  Demeanour, Facial  Expression)    chyu  eimâ  thlathlâ  thai  laih  hr’awpa  a  pha  ngaita  aw. Alyna  kyhzy  a  châ  khiahta  cha  alyna  hmia  nata  thaphana  palôh  phaohpa ta  eima  pua  laipa  awpa  a  pha. Ahneina  kyh  a  châ  khiata  cha  alykhei  ngaita  kawna  chôta  ahlaopa ta, myuhhneituhpa  nata  myuh  nata  ama   chhôhkha  thâtih  phanazy reipa ta  a  chiavo  ei  sih  la,  hmosaipiepa  nata  khokheina  chi  nanopazy  hlâpa ta  alei  nata  avâ  byhnâ  awpa  ei  sih  la.  Ngiapâtuh  phapa  Krizyhpa  chhôhkha  paduapa ta  sathei  byhnâ  rônahpa  ama  vaw  to  lymâ  thei  n’awpa ta   khokheina  ku  chalyuna (Chibai)   chôta  pathlie  tyh  ei  s’u. Cha  hawhna  chata  vâhneina,  hlaotlohna  alyna  nata  hâti  a pîhpa  alyna  tlyma,  pihnoh  alyna, birthday  party   tlyma  a châ   khiata  cha, pathipalôh  hmeiseih  ta  alykhei  kawna chôta, eimâ lykheina palâsana châta  hmosaipiepazy  chhaota  khokheina  byhnâ  awna  chôta  ahlao ei  sih la. He hawhpa  daihtizy  liata  keimo  khopa  maih  reina  su   rypaohpa  châta  hmâh  leipa  ta, â  vaw / kei  lykheituhpa  pakha  eima  châna  hawhta  eimâ  lyhkheipa  thâtih  phana  lâchhâh  ta  reina  châta  tlao  hmâh  ei  sih  la  â ngia  kaw  aw. He  hawhpa  programme  a  hlao  awpa ta  a puapa  eima  châ  tawh  tly  cha. Eima  theina  zydua  papua  hrapa ta  programme  hlao  a  patlohtuhpa  pakha  châ  achhuah  ei  sih la, a  programme  a  patypamâtuhpa,  a pabuapabâtuhpa  deikua  cha  eimâ  chhuah  awpa  châ vei. A  su  nata  a  daihti  ta  liata ypa ta, he  hawh  daihti  ta   chhôhzy  lia  he  châ  â pasai  lyhlia  tyh ei  sih  la, a  daihti  chhôh  zydua  pua pâ  tlâ  leita  eima  y  awpa  a pha. A  kiapâh  liata  a  vaw paropasa  kawpatuhpa  deikua  eima  châ  lei  awpa  a pha.

              Cha  hawhna  chata  chhiena  vâduana  kyh  a châ  khiahta  cha, pathipalôh  hmeiseih ta a  taokheituhpa,  a pasakheituhpa  eima  châ  hrazie  eima  hmiaphaozie  liata nata  eimâ  pielyu   liata  hmô  thei   awpa ta  eima  palâsa  awpa  a  pha. He  hawhpa hmo  a tlô  tyhpa  he  chyhsapazy  eima  khozie  nata  a chhuahna, ryhraona  a châ  lei  vâta  pahnokhei  thai  kawna   chôta  nata  pachâ  thai (noh-dao)  kawna  chôta  eima  buabâkhei, pathlâpazi  khei  awpa  nata  eima  palôhpahawh  awpa  he  eima  taozie   awpa a châ. A thei  khiahta  la  a  su  liata  ypa ta  a  daihti  chhôh  zydua  eimâ  sohsi  awpa  a  pha. Reih  chiehpa  hawhta  a  khôtho  lâ  liata  nata  a kiahpâhzy  liata  vaw palopasah ta, vaw  lôhawh  chaimâhpa  kha  taozie  ngiapa  châ  hlei  vei. He  hawh  daihti he  daihti  rypaohpa ta  hmâh  ta  chyhsazy  hmiakô  ta  mohphana  tluapa ta  keimo  aohkhopa  maih  reina   su   châta  hmâh  hr’awpa  chhao  châ  hra  vei. Vâdua  pachârôh  penawhzy  taokhei  awpa  nata  palôhpahawh  hra  awpa ta a  kei  puapa  eima  châ  khiahta  cha, reihluh-kahluh  leipa ta  molo-salo  ta  ta  a  daihti   chhôh  zydua  a  su  liata  eima  y  awpa  tlao  a châ.

Khizaw  hmahsiena  vâta  nata  chyhsapa  thaina  â sâh  ngaitapa  vâta  moto ta  eimâ  phuhphiapa  ta  Cell  phone (Mobile) â  chaba   chyu  bâ  hra  pi  ta. Chyhsa  hluhpi  ta  deikua a  hmâna  dopa  liata hmâh  tyh  veih ei.  Cell phone   he mo pakha   likah(likawh) (Inter Personnel)   bie  â chhona  châta  hmâpa  châ ta, chavâta  he hawhta  zawpi pôhpakhynazy  liata  hmâh   awpa  chi  deikua  châ vei. A  thei  khiahta la  switch  off  ta  sopa  he  a pha  chai  aw. Cha leipa ta  silence / mute   chôta  a vaopa ta hmo  peimawhpa  vâta  call  zy  eima  dao  pathlei  khiahta  cha   thlaita  thyukheipa ta a  dadua  ta  ta  mapi  hmô  leina  lâ   vaw kheipa ta  bie  a  chhopa  he  taozie  ngia  kawpa  a châ. Zawpi  eima  zana  palâsana  chhao  a  châ  hra. Eima  Beipa  eima  reithaina  su, Achhyhna  O (Church)  zy  liata  chhochhi  cha, daihti  peimawhpa  eimâ  hmâh  chhôh  zydua  he  pachhipapua  lei  awpa  a pha  chai.  Kheihawhpa  daihti  he ma  eimâ  hmâh  ngâhai  tahpa  chhao  pachâ  khao  leipa ta   eima  handset  camera   a  sia  kaw  vâta  â  vaw  selfie  ngâpazy  he  hmo  ngia  lei  kawpa a  châ. Chyhsa  nohkhih   leipazy  taozie dei  a châ tyh.

Pihnô  Lalriliani (Pi  Rii, W/o. Lalthanhawla) he  mawrâh (Mizoram) liata  cha  public  manner , public  attention  a hnei  pha  chaipa  hawhta  rei  tyhpa  a  châ. Zawpi  hmia  liata   â  tyudua  dâh  he  reithai  tlâh   a  châ  kaw  thlyu  aw, “Pi  Rii  movement ”  tahpazy  ta  ama  reih  tyh.  Mawrâh  chyhsazy  nata  a pachaipa ta  keimo  a ngiapâtuhpazy  châta   a mopâtlâh  a  châ   kawpa  nata  taozie  a ngia  ngaitapa  a châ  tlai ! Zawpi-sâhpî   hry  liata  molo-salo  ta ta   ku  chakhi  na  chôta  a tyuduapa  hi. Zawpi   eima  zana  palâsana  nata  keimo  hlâta   chyhsa  hropa  eima  papeimawhsa  viazie  palâsana  a  châ  hmeiseih. Cha  dei  châ  leipa ta  eimâ  kei hlaopa   daihti   eima  pasôzie,   eima  papeimawhsazie  nata  eima  kiapâh  liata  a tyuhpazy  zana  eima  palâsana  chhao  a  châ. Keimo  daihti  sôhpazy   siesai  khaipa ta   kha  daihti  a  pasô  kawtuhpa, a  papeimawhsa  kawtuhpa  eima  châzie  eima  palâsana  a  châ  hra. “A  hrupa  chhao  he  a  rei leipa ta  â  tyuh  thlâh  ha  khiahta  cha  a  sopa  hawhta  pachâpa  a châ” tahpa  ta  bieso  ta  maniah  ama chho  tyhpa  hawhna  khata, zawpi  hry  liata  reihlei-kahleipa  ta  eimâ  tyuduapa  heta  chyhsa  sopa  nata  chyhsa  nokhihpa  eima  châna  a  palâsa. Ei  paw  ta  eima  chyta  nota  siku  liata  maniah  a pachu  tyhpa, “Kuang-kua”  he  zawpi  a hmaohnazy  liata  eima  hmâh  tyh  awpa  nata  eima  hnei  chyu  awpa  a pha  kaw. Ku  chakhipa ta bie  areihtuhpa  eima  uahnao  ha  khiahta  cha,  ano  tawhta  khâpa  hmo  phapa  tlyma  eimâ  chu  hai  tahna  a châ. 

Pathaihna   kyh  he a pachu  chanei  ngâthlâh  eimâ  ngiah  tyh. Abeipa  eima Khazohpa  eimâ  hnia  chaina  a châ  tahpa  eima  pahno  hnokhua  ta  cha  zyh  lyhlia  a  chhuah  ei  suh  u. Zawpi  sâhpi  pôhpakhyna  su  a châ  vâta  nata  keimo  pahrâna  suh  a châ  lei  vâta  thapasana   nata  kyhpachâna  hnei  leipa ta  papeipahliasa  lei kawna chôta  papuapalei  ta  paraoparâtuhpa  eima  châ  awpa  châ  vei. A  hneituhpa  palôh  phaohpa ta  thapasana  nata  kyh  pachâna  chôta  a  khâsiatuhpa  tlao  eima châ   hri  awpa  a  châ. Chyhsa  hlupi   ta  he  hawhta   zawpi  ahmaohpakhynazy  liata  niedo  awpa  nata  cha-eih-cha-â (pa-ô-pa-â)  awhpa  a  vao  thai  kaw tyh  ei ta, Thokha  chhochhi   cha  â  ngia lei  kawpa ta  âlâhâh  kawpa ta  zawpi  hry  liata  kaw  pachhi ei ta, ama viasa  sahlaozy  nata  a palopasah   kawpa ta  ama  niedoh (pa-ô-pa-â)  tyh. Ama  niedona  (pa-ô-pa-â  na)    hniehnôh,  a hyhkua  (Covers) pazy  cha  amâ  tyuna  su  liata   ama  siesai  heih tyh. He  hawhta  châ leipa ta  eima  vaw niedoh (pa-ô-pa-â)    khohpazy  a  vaw  châ  hapa  chhaota  a ru  lâta  eima  kiapâh  liatapazy  mohmô  lei ta pachhipa ta  niedohpa  châ  sala. Eima  niedona  laibâhpa  tlyma  a hyhkua  zydua  ta  chhao  keimo  viapakao   tlyma  Chaopasy  byh (Pocket) chhôh  liata  a  vao  pâ  tyhpa  châ  sala  a  pha  kaw  aw. Tawhta  la  he  hawhta  niedopa tlyma, pa-ôh-pa-â  pa  â  chakaih  n’awpa  he  a su  hmo  reizie  ta  a  châ. Apakhyna  daihti  nata  â  chareipakhyna  suzy  he  Abeipa  eima  Khazohpa  eima  reithaina  nata  palyupalihna  su  nata  daihti  a  châ  vâta  a  sohsi  thei  ei  sih  la  a  pha  kaw  aw. 

Eima  hronazy  ta  pasi  lyh  bao   sala,  hnatlâpata  eima  y  lymâ  thei  khiahta  cha, khizaw  liata  a  pahrâh  hrapa  chyhsa  eima  châna   hawhta   kheihawhpa  daihtizy  liata  ma  cha,  he   hawhta  zawpi   a pôhpakhyna  suzy  liata  eimâ  hlaohlina  daihti a  vaw  y  hra  thlyu  aw.  Cha  hawh  daihtizy  liata  he  liata  eima  reipazy  he  khâ a thei  tyh ei  sih  la,  he  liata  eima  reipa  hlâ  chhaota  taozie   ngiapa  nata  hrozie   ngia  viapa  eima   pahnopazy  chhao  zawpi  a  pahmô (Introduce) tuhpa  châ  eimâ  chhuah  awpa  a châ.  He  hawh  daihti   nata  suzy  pahnona  chôta  â  pielyu   thaipa  nata y  dâh  hro dâh a  thaipa  chyhsazy  he,  chyhsa  nohkhihpa,  chyhsa sopa, chyhsa  palôhah  kawpa  nata  chyhsa  za  â  chhihpazy  ama  châ. Tawhta  la  he  hawh  daihti  noh  he  cha  molai, mochyh, hneirôh, dyhchhie, hmipha, hmichhie  â  pathlûa-pathlâna  y  leipa ta  eima  zydua  ta  ta  â  lyupa ta  khotalaina (Equal  liberty) eima  hmâh  khohna (Enjoy)  daihti  a châ  vâta, keimo  ta  eihpa  daihti  hawhta  â  pachâ  ta, ryhpaohna  totie   lana  daihti  châ vei  tahpa  eima  pahno  awpa a pha. India  râh  democracy  râh  laichaipa liata a  pahrâpa  eima   châna  hawhta   eima khotalaina (Freedom) he  a phana  lâta  hmâh a  chhuahpa ta  Citizen  siavovâ  kawpa (Smart  citizen) châ  a chhuah  chyu  ei s’u. Cha  cha  eima  râh (nation) châta  eima  pie  theipa, eima  taothei  hria  theipa (eima Contribute theipa) nata  eima hlâ  theipa  miakha  a châ. Zawpi  heta  keimo  attention  hâ  leipa  sala, keimo  ta  zawpi  hnohta  eima  attention  eima  pie ( hlâ)  hri  awpa  a châ. 

Tahmâ  tawhta la  zawpi  ahmaohna  liata  eima vaw pua heih theipazy  a châ khiahta  la  hezy  he  kha  â  chakaihpa ta  â  chaba (Keep with) tyh  bâ  ei  s’u. A miakhana  liata  eima  thei  theina  nahchakao, nahkao(Ear) he  châ  se. A  mianona liata eimâ  sôh  theina, eimâ kohki  theina (Discipline)  he  châ heih  sa la. A  miathôhna  liata  eima daotheina, eima pathipalôh pachâna  nata pahnothaina (Our  Attention  and  Understanding) zy  hi.   

 

 

 

 

 

 

Machâ PT. Hlychho (L)

 nata Keima

~ HC. Malsawmthanga.

 

              Machâ PT. Hlychho (L) moh he ei nahkhaoh ta a theina rei ha ta, hmô byuh kaw tyh na ta, anodeikua charâta hmô thei va na. Kô 2004 khata Achuna asâh viapa pazao awpa ta Shillong khihpi pangai hra na ta, Shillong Mara Church liata ei pakhy tuachai nota ei vaw hmô. Ei hmôpa dei châ leipa ta, apakhyna liata biereihtuhpa châ ta, a biereipa chhao LIVE tlaita ei nahthlie. Hmia apahnosa ta, bie achho awpa khoh kaw taraw na ta, ei ngâhna ta â daih leipa ta, palôh-y kawna chôta ei disai haw.

              Union Christian College, Barapani lâ Graduate apazao awpa ta ei zu hapa vâta kô thôh chhôh (2004-2007 kô thaona taih) kha cha a phathipa ta apakyhna hnei thei leipa pi ta, keima ta pahnopasia kaw hr’aw sala ano ta deikua na pahno sala pangiasa va na. Graduate ei patlô tawhta kô 2007 kô thaona lâ tawhta deikua NEHU liata a pazao awpa a ngiah ha ta, Shillong khihpi lia pahrâ bâ awpa ta ei kaw pasie ha hra.

              NEHU Central Library ei ngia tuachaina liata ei hmo hmôpa chata Machâ PT. Hlychho ta molâhpa râh liata Marasaw hmia a pakai zie hmô na ta, ei pasâhsana cha thata a pôh rili. Library chhôh eimâ ngiana chachâh daih lâ liata Châbu sona lai kawpa he vaw y ta, cha liana chata North-east chi nata pho nano nanopazy thâtih (History) arona bu vaw soh pakhy ei ta. Ei mo pataw nahta a châbu ropa ‘Maraland: Yesterday and Today’ tahpa kha â lâhâh kawpa liata vaw y thlâh ha hra ta, ei viasazy hmiakô liata ei hmia a kai ngaita kaw.

              Ama veihseih kaw ta ‘Cha-ia sa lei, sa pachâsapa’ ama tahpa hawhta Shillong ei kaw ngai tawhta rei leipa liata MSO Sub-Headquarters Shillong liata Executive Member châta na vaw rao hra ei ta, he tawhta cha Machâ PT. Hlychho (L) nata Abeipanoh my apakhyna nata MSO Committee liata eimâ hmô hluh kaw bâ. A rei leipa liata ‘Pasaipha Monthly Newspaper’ liata Editor châta na rao heih ei ta, thâtihbu Mara reih ta eima vaw papua tawhta chhochhi cha keima ta hmia apahnosa angiah khao leipa ta, ano ta nâ pahnia ta, na pasopakâ ta, na reithai pakhei ta, ei luh na palai ta, thata eina deichhy.

              Mara reih pahâkhei kawpa ta Mara Literature thapasa kawpa a châpa vâta, Mara reih ro dâh nata bie siezie thata na pachu tyh ta, a châhta chhochhi cha eima pahnona dâh â lyu lei vâta thata eimâ eichhia daihti a za y tyh hra. MSO lia dei châ leipa ta Awnanopa liata chakaotuhpa châta eina vaw la tawhta chhochhi cha Awnanopa Committee lia taihta avaw hmô lymâ pi ta, eimâ vaw tlanô ngaita kaw bâ.

              A samoh rihchâhpa châ hr’aw sala, ei theina hawhta Mara reih ta apuapa thâtihbu ei buakhei tyhpa vâta ‘Viasa’ hawh tlaita nâ pakyh tyh ta, Mara reih rozie chôchâh liata pahruana pha viapazy eina reikhei tyh. A châbu ro chiehpazy na chhai ta, a ro haipazy na pahmô ta, a saduthlienazy na chho ta, ei pachâna chhiehrupa ei chho hrapazy cha daothei kawpa ta a nah a pachôh tyh hra. Mara-English Lexicon a roh haipa thâtih thathyu kawpa ta na chho tyh ta, eima pano ta eimâ ngiahtiah lei kaw tyh. Liahsa a patlô daihmâ hapa cha patlô hmâ khao leipa ta maniah a siesai hapa a châ.

              Mara reih nata Literature hmahsie n’awpa châta a daihti hluh via a hmâna thâtih zy, he vâta rairuna thata â tyh tyhna thâtih zy, eima râh a kaw vâ kaw tyhna thâtih zy nata Mara reih ta châbu hluhpi pua thei sala tahpa a khona thâtih zy na reikhei tyh ta, eima pano deita ta saduthliena meihthâh eima pazawh tyhpa kha a châ. Rei via awpa a hluh kaw, he rakha châ sala, ahyma Machâ PT. Hlychho (L) cha a châ tahpa duah vaw moh tua ei sih la, he tawh heta Mara Literature sahdô liata pawpi angia chaipa hry liatahpa a châna zie cha eima pahnothei ngyu aw.

 

PT. Hlychho (L) thâtih chyupa

Ano he 12^th June 1947 khata Siaha Vaihpi liata vaw pih ta, kô 1970 khata Cherrapunji Theological College, Meghalaya liata Diploma in Theology patlôpa ta, kô 1975 pa khata Eastern Theological College, Jorhat tawhta B.Th cha a vaw patlô heih. He kô  (1975) khata Garo Laihsa C.T. Sangma nata hrochhôh châta kaolâh awpa ta ahnei ei ta, sawchapaw pathôh nata sawchanô pakha ama hnei. A lahpinô Pihnô Sangma he Meghalaya Civil Service Retired a châ.

Lahpinô a hnei tawhta Tura High School liata Asst. Teacher rai hria ta, kô 1981 khata Bank miakha liata Officer rai a hria heih. Shillong khihpi liata ama chhôhkha ta pahrâ ei ta, Puhpa PT Hlychho he Shillong liata Mara sawzy â pakhy n’awpa su pasaina (order) hiahtuhpa hry liatahpa châpa ta, Puhpa RT. Zachônô nata Mrs. P. Beiha zy chhaota apakhy pasaina he ama vaw la. Shillong Mara Church paduatuhpa hry liata a kôpipa pakha châ hrapa ta Rev. P. Riabi, Rev. N. Haolua nata ahropazy chhaota ama vaw padua.

Shillong Mara Church â vaw dua tawhta kô khazie leichâ ma cha Awnano Hyutuhpa ta vaw y lymâ ta, ama chhôhkha ta Tura lâ amâ pasiena taihta he chakaona rai he a vaw hria. Shillong liata a y chhôh zydua liana heta MSO Sub-Hqrs. Shillong liata chhihthatuhpa nata Adviser/Sr. Adviser/Patron etc rai vaw hria lymâ ta, Marasawzy ta Shillong khihpi liata pawhrâh chaipa ta ama vaw mo tyhpa nata thlah amâ vaw palôhna chaipa pakha a châ.

Mara Literature châta a theina nata thaina zydua ahmâh tyhpa Puhpa PT. Hlychho heta English nata Mara ta châbu khazie rakha ma vaw papua ha ta, Article pha kawpa chhao vâro a vaw roh ha hra. Machâ PT. Hlychho châbu ropazy:

ENGLISH

1). English-Mara Dictionary

2). Mind of Christ

3). Maraland: Yesterday & Today

MARA

1). Via Dolorosa

2). Thy Kingdom Come

3). Saint Paul

4). Mara Proverbs

PT Hlychho nata Sangma zy heta sawchapaw pathôh nata sawchanô sia kawpa hnei ei ta, ama saw nah raihriana duahmo cha he hawhna heta a châ:

1). Abraham, Addl. SP at Baghmara, Meghalaya

2). Gracy, ano he Canada liata dyh châ ta, Lecturer rai a hria hai.

3). Benjamin, Junior Accounts Assistant Officer at Tura Treasury

4). Andy, Lower Divisional Assistant Officer at IG Office, Shillong.

Mara Literature châta a hriapasana nata paryupa zydua vâ heta Puhpa PT. Hlychho he Marasawzy ta my beih leipa aw pi ta, chhâ a vaw y awpa liata eima pasô via rili aw. Puhpa PT. Hlychho (Abraham Paw), Kô 66 ta uhtheipa cha vâropi Cancer pasana vâta Thohna-O liata mohôhpa a châ tawhta, he khizaw rietheina râh puasaipa ta a tlyzaw râh lâ cha târi noh 2^nd Nawh, 2014 @ 12:30 pa khata maniah a siesai haw. Tura, Garo Hills District, Meghalaya liata pabupa a châ.

 

SÂPHAO/CHHAOHPI

 

~ K. Pari

 

             

              ‘Sâphao’ tahpa he Matu reih châ ta, ‘Balyh’ tahna a châ. He liata Balyh eima tahpa he âmo chhaota Balyh palyusa kaw hra ei ta, chavâta âmo reih ta ‘Sâphao’ tahpa ta ama bi hra. Marapa ta cha Chhaohpi tahpa ta eima bi. A chhâpa cha alô he a chhaohpi ta a ypa vâta a châ thlyu aw. Lôpanô lai kawpa sâthôh sâpalih y ta, cha hryta sâkhapa cha Balyh a lyu kaw. He su he khahlâ tawhta eima mahnô-mahpawzy ta ahripa pahrâna supipa hawhta ama vaw pachâpa a châpa vâta ama ziehchhôh kaw.

              Saphao (Chhaohpi) he Palâ râh chhôh, notla lâ Beinô chavah liata a ypa châ ta, a su ngai awpa ta Lôdawh tlô tuapa châ ta, Lôdaw tawhta 5 Minutes rachhôh Motor ta arâ tawhta Beinô chavah za tla pi ta, cha tawhta a hnaw lâ 20 Minutes rachhôh Balyh (Speed Boat) ta eima ngai tawhta a su eima tlô thei. Phei ta khiah cha vâro sao a byuh aw. Atahmâ cha he su he Lai râh ôna chhôh lâta ypa a châ. Châhrasala, khahlâ ta Marapa râh a châpa châ ta, mahnô mahpawzy ta ama vaw laihzaolaona nata thâtih ahneipa a châpa vâta a suzy eima za tlypa a châ. Su ngiapa nata motlâh a châ kawpa, alô laipa nata tilih athu kawpa Feet 30 rachhôh ta athupa yna châ ta, he su he ahripa (khasôh) zy pahrâna supipa hawhta pachâpa a châ.

              Lôdawh khih he kô 1940-pa rachhôh tawhta Palâ beipa ta ochâ pachôsa ta, ama y tuana cha Chheihlu tlâh châ ta, ama thlâ nohdi lâ a châ. Atahmâ ta ama yna he ama khihsa einona a châ. Tahmâ he Odyh 60 hlei pahrâ ei ta, kha hlâta cha Motor chhao tlô leipa ta, kô 2012 pa tawhta ama khih he Puhpa Kunal IAS DC, Siaha, hmahlana zawhzi nata râh kyhpachâtuhpazy saiheina vâta Lôdawh dei châ leipa ta, Beinô chavah taihta Leisadi (Balu) la theina su taihta a tlô hapa a châ.

Sâphao (Chhaopi) he khahlâ ta cha â ngia kaw. Tahmâ deikua tilaipa nata noh kâhpa, ziza athlapa heta vâro vaw parao ta, a su chhao vâro tlai paraopa a châ haw. He Sâphao pangaina Beinô kaozy he a ngia kaw ta, a su tlô hlâ chhaota a chavah kiah alô tlâhzy chhao he mo-ai â chhih vei kaw sai. A râhzy he palôhlie achhih kaw ta, a chavahzy hra nai zualua ta loh lymâ ta, nohtla râhsâ lâ chhochhi cha palôhlie â chhih kaw. A ngiakâ chavei-chachâh ta tho chi nano nano aduahpa hluh kawpa nata pavaw ao nano nano sâhpazy chata palôhrupa miah a chakhei kaw. Eima kaw mo awpa Chhaohpi mahnô mahpawzy ta ama pachâna/hmôna zie palôh liata miah a chareisa kaw. 

              Speed Boat ta Minute 2o rachhôh a hnaw lâ eimâ râ tawhta Sâphao cha tlô pi ta, tilih he vaw y pathao tua ta, he tilih he lai kaw ta, â thu kaw hra. Khahlâ ta cha, Sâphao tilih vaw khai thei awpa ta, a Ziza Mei-ôh patyuna su y ta, tahmâ deikua a raokei khai laih ha bâ. A chavah liata dusawta ta ahiana chôta moh pi ta, ‘Sâphao opi’ ama tahpa cha y ta, he su he eima mohpasia khiata cha alô yzie hnei kawpa ta ama khaipa he a lyu kaw. O pha kawpa Building pangiapachâpa (design) hneipa tlai he lyu thlâh ha ta, Architect-zy paryh chiehpa nata taochhyhpa a lyu kaw, pachâna lia chhao rai ta, khasôh pahrâ n’awpa chhaota âhmie kawpa tlai a châ.

              Lôpanô sâkha â lâ dâh yzie hnei kawpa y heih ta, cha cha apahrâtuhpa beihchhona (azinô chôhkâ) ama tahpa châ ta, a lyu kaw heih. Meikhuh puanazy taihta y ta, hmo no-âhchhih kawpa cha â hla tawhta mopa ta ochhipipazy chhao lyu kaw ta, a mo pha kaw. Khahlâta Saopichoh tilai lichih ta cha he tawhna heta meikhuh puapa chhao ama hmô tyhpa hawhta ama reih. Cha leipa chhaota âhmie pasie kawpa roh nata sa chateipa ia-ô rohzy chhao thei tyhpa hawhta ama reih hra. He lôpanô sahlao he a pizie a nano kaw sai ta, â paryhparina dâh mopa chhao rai raita a ngia ta, hmo no-âhchhih kawpa chhao a châ hra. Lô akhai thaipa ta hmo nothlahpa alyu kawpa ta ama khaipa he a lyu kaw.

              Phai râh lâ eima sie nota Ku (Fort) zy angia pi ta, a chhôh liata Building rônah kawpa a pâhchhô zydua zôthaipa ta alô liata ama khaipa, nohthlah nano nanopa, yzie hnei kawpa ta ama khaipa he hmô tyh pi ta, mo thlâhthli hapa ta cha ama zôthaina patu thai’pa châ vei. Anodeikua raichai eima moh ha nahta cha ama zôthaina â lâ pasia ngâsâ.  Cha hawhpa tlai cha lyu kaw ta, he he âthaona tawhta Khazohpa kumâ tlaima a châ ma, daihti a sie lymâpa liata noh sapa nata avâ suapa alô atlô laihpa ta he hawhpa pizie a vaw pua thlâh hapa ma a châ ma tahpa pahnothai a ru kaw.

              Cha hawhna pyly chata alô lai kawpa, Mei Balyh laipa tie tlai, a pizie lyu kawpa y ta, cha tlai cha Sâphao ama tahpa cha a châ. Â lâzie zy, â reirânazie nata athyutô dâh rai rai Mei Balyh he a lyu kaw tlai.  Â hla tawhta mopa ta Ochhi nata Opyzy lyu kawpa y ta, a mopha kaw. Cha tawhta bâhta a kaw hnia via heih pi ta, lô âpahmaohpa chai taih saita asâhpa, â chamiehna dâh alyu khaipa, feet 50 nata 30 feet rachhôh ta aseihpa nata kawhpa su, Sâphao apahrâpa beipa ryureina su ama tahpa he tlô heih pi ta, no-âh â chhih kaw hra. Session Hall-zy a lyu kaw hra.  Sâphao su he a ngia ta, piry kaw ta, thâtih chhao a hnei kaw hra. Eima mahnô nata mahpaw no tawhta ama tly ngâh tu leipa nata a hi ama nâ tu leipa a châ.

              He hawhpa su phapa nata motlâh châpa Marapa râh liata eima hneipa he vâhnei a chhih hmeiseih ta, a râh zawpizy ta pabohsana rai chhao eima hria via lymâ awpa a peimawh kaw.  He Lôpanô â chahâna Tilih he Saphao tilih châ ta, ti chyh no chhaota lâh 25 rachhôh â thu zôzawpa hawhta ama reih. Ngazy hluh kaw ta, khahlâ ta cha he su liana heta cha saozy chhao vawh ngâh lihlâ leip’ei ta, atahmâ deikua cha a hluh kaw khao nahta chhaota a ngia khao vei.

Khahlâ ta cha a chheipâh he Azyh, Sawzaw, Taokie nata Sawsâ zy hluh kaw ta, tahmâ deikua a sôh kaw bâ. He Balyh ama tahpa pâhchhô liana heta a khaoh y ta, khahlâ ta cha he chhôh liana heta Taokie lai kawpa y ta, he Taokie he ano ta lao atlua khao leipa ta Ra-awhzy ta a lao ama pie tyh tahpa ta miah ama chho. Alô no-âhchhih kawpa nata angia kawpa a châpa vâta achô liazy kiah pi ta, nohthlahpazy thata eimâ la. He suzy he mylâ hânoh ta cha ti lâpizy vaw tao aw ei ta, parao pakeipa vaw châ khai h’aw ta, chavâta paraopakeipa a châ hlâta hmô cheingei awpa a pha kaw.

 

 

 

 

EI RAMÂ

 

~ L. Beimokhai

 

Pachyh zâ he cha zâ hro zydua hlâta â di patoh via tyh na ta. A chhâpa cha dyutlai lei kawpa nata sia lei kawpa ei châpa tlai ta, awnanopa zawpizy khokheina to pachaina chôta KHP Leader ta einâ tly ha hra tawh ei ta cha, ei hohpa tlyma, hoh leipa tlyma, a mylâpa pahânoh my he cha dawh 5:30 Am liata ei thyu tyh cheingei awpa he a byuh tyhpa vâta a châ. He zâ chhao he rei chiehpa hawhta thlaita a di na ta, ei pheizy a si para na ta, khôhphei chô cha kia pâ ha na ta.

              Khôphei chô tawhna chata ei palôruhpazy thata a pakyh na ta, atazâ ei ramâ lâta ahy rimâ ma ei hmô heih aw? tahpazy  cha pachâ na ta. Khatinorai ta ei my thei beih leipa nata mokuh ramâ ei khaih no maih ta ei mâ lâta khâ ei hmô tyhpa cha he zâ lia chhao heta ei hmô heih cheingei nahta khâchâ pangiasa na ta, ano sai cha pachâ thlâh ha na ta. Anodeikua he vâna heta zasâh manôh zydua na sikhôh khuh vy, azâ chareih ta hmô na ta, khatino hmahta my thei tlôh leipa na ta! Châhrasala, he zâ he cha â nano kaw, ei lôhdu nô khiama ei ramâ lâta ei hmô aw? ei tah ngâ nota hmo hropa pi he tlao hmô ha na ta, cha ei ramâ lâta ei hmôpa cha he hawhna heta vaw châ ta.

Mathlai chhaota zawpi hry liana chata â chahraoh laihna chôta mohmia he pasaih laih na ta. Zawpizy cha amâ para kaw saipa heta hmô na ta, a chhâpa deikua pahno hlei va na. Bazar lia chata Motor-zy chhao a noh hro hlâta vaw hluh via syulyu ha ta. Taxi la awpa ei chhuah ngânona chata ei viasapa ei pakyh kaw tyhpa he va hmô na ta, ano chhaota thlai na vaw hmô hra ta, eimâ hmôpa cha eima tha chhao a pawh kaw. Khataih lâ ma a vawh aw, tahpa ei hiahripa cha MADC Office lâ charei awpa â chhuahna zie thlaita na vaw chho ta. Keima nata eima charei chhuahna â lyupa cha aly kaw pi ta, thathyu kawpa ta â pazi laih ha pi ta.

              Lâpi liana chata  bielôhawhpazy reih laih pi ta, kei chata, “Council lâ charei awpa he la ei ngiaroh kaw tyh, a chhâpa la Mara Autonomaus District Council lia tlai na Tlaikao reih a hluh tu ha”, tah na ta. Ano chata, “Chuah, MADC Office lâ na charei leina a rei kaw khiamaw?”, na vaw tah hra ta. Eina palie dâh cha no-âh tah kaw na ta. “A vaw rei pâ thlâh ha hra” tahpa ta palie heih na ta. Ano chata, “A su tlô tua pi ta, reipa hlâta a sia viapa ta na hmô aw, tahmâ cha eima MADC Office liata Tlaikao reih thei awpa y khao vei mâtâh! Marapa sawzy eima chi nata reih pabohsana kyh liata â hra kaw sai pi ta, Council liata ahriapa Mara reih a cheih thai leipazy chhao khata thata achu ei ta, cha hleikhô ta Executive Meeting ta MADC Staff zydua Office chhôh liata Mara reih ngâlâh hmâh awpa ta bie pathlu ta. Cha hleikhô ta Tlaikao reih ahmâhpazy chô liata a pasa kawpa ta hmah ama la lymâ tyh. A su tlô tua pi ta na pahno thlâh ha aw”, na tah ta.

              Cha hawhta ei viasapaw ta a rei ha vâna chata MADC Office cha tlô para awpa cha a ngiatiah khao leipa na ta. A reipa cha hmodopa a châ awpa cha pangiasa kaw hlei hra va na. Anodeikua, a rei dâh kha a hmeiseih kawpa naihta pahnopasia para awpa cha ei byuh pachai. Thathyu kawpa nata tlô awpa angiatiah lei kawna chôta bielôhawhpa hropazy reih laih pi ta, daihti rei leipa liana chata MADC Office cha vaw tlô ha pita.

              Noh hro zydua hlâta MADC Office Gate eimâ ngiapa cha a ziza he â nano patlua kaw thlâh hapa heta pahno na ta. A chhôh eimâ zâ ngiapa cha Office liata ahriapazy cha vaw sia ngâsâ sai thlâh ha ei ta, ahyrai he zawpi châta he Office liata atyuhpa ama châpa â pahnopasia ngâsâ sai ei ta, â palai hmiphaohpa nata âdaoh ru kawpazy chhao vaw y tlâ hra vei ei. Ahyrai, eimâ daohpa nahzy cha vaw sia ngâsâ sai ei ta, eima tao awpazy cha buakha hlâ heta eima vaw taokhai lymâ thlâh haw. Hnôhlâ hawhta MADC Officer nata Staff nahzy â papisa kaw tyh ei ta, adaoh ama ru kaw tyhpazy kha hmô awpa rai vaw y khao leipa ta. Ei viasapaw hnohna chata, “Noh hro dia maw a lyu lei kaw, Officer nata he MADC liata ahriapa nahzy he dia maw noh hro ama lyu lei kaw, noh hro kha cha amâ palai kaw tyh mâmaw, atano dia maw areisina nata pahneisilina chô saita  he MADC Office he a bie thlâh haw?”, tahpa ta hiahri na ta. Ano chata, “Aw, he Office lâ na kaw charei leina a rei tu hapa vâta khâpa hmahta na pahno khao vei he zaw! Tahmâ cha he Office liata amâ tyuna chhâpa nata he liata hria awpa ta amâ ngia theina chhâpa he â pahnopasia kaw sai ei ta. Âmo hawhta khokheituhpa hnei ei sala, ama raihria hawhpa ahria thei awpa ama hluh kaw, tahpa nata ahy ta tlyma a khokhei kaw vâta he Office liata ahria theipa ama châpa apahnopasia kaw sai ei ta. Cha hleikhôta zawpizy châta hria awpa ta he su liata âtyuhpa ama châpa â pahnopasia kaw sai ei ta, zawpizy he ama za kaw sai mâtâh…”, tahpa ta na chho ta. Cha bie ei theipa cha aly ngâsâ thlâh ha na ta, eima râh châta cha ‘AHRANA’ a vaw tlôpa hawhta ei pachâ.

              Ei viasapaw ta a rei chiehpa hawh tlaita MADC Office liana chata Tlaikao reih thei awpa he vaw y rai rai leipa ta. Noh hro liata tlaikao reih sai khiama a hmâh ei tah tyhpazy chhao khata Mara reih sai he vaw cheih ha bâ ei ta. Ei no lâta za-âh ta, ei tha he a thyu ngâsâ.

              Chadei chhao châ vei, Mara Autonomous District Council a châna hawhta Marapa a châ leipa nahta Mara reih athaileipazy cha he su liata nata MADC ry liata rai la awpa raita amâ chhuah khao leipa thâtih ei theipazy chata thathyuna thata na pie ta. He Mara chi nata pho maniah padua ta rei â ngiah ngâsâpa maniah apietuhpa KHAZOHPA palôh chhao eima patlâh pathao ha bâ aw, tahpazy thata pachâ na ta, ei tha a thyu ngâsâ.

              Eima hnôhlâ liana khata cha Mara sawzy pi byuchhiahpa kheihawhpa vâta tlyma MADC Office lâ eima kaw charei daihti liata Tlaikaopa tlyma, Pypa ma ama châ sualua tly, Tlaikao reih ta maniah a vaw chhy ei ta, maniah amâ vaw palaithlu kaw tyhpazy kha eima palôhzy vaw pasa kaw tyh ta, “Kei, Marasaw ei ngia thei leina su liata, nama Vote ama khohpa vâta rai ama chapiepa tlai namâ palai kaw hra bao”, tahpa ta ei palôhrupa ta a vaw paphôh ngâ tyhpa hawhpa zy kha la hmô awpa y tlâ khao vei.

              MADC Office cha reichiehpa hawhta Marapa châna â lâna supi chaipa vaw châ ta. Sawkha rai ahriapa amâ reisi chaina su vaw châ hra ta. Zawpizy chhaota ama pangai chaipa nata, ama thlalôhna  supi chaipa chhao a  vaw châ hra. Marasaw kheihawhpa kyh liata rairuna atyhpazy ta ama pangai chaipa su vaw châ ta, “Kei la, na pie khoh hlei vei ei, âmo py châ tlôh leipa na ta”, tahpa nata, “Ano la keimo py châ vei”, tahpa reikahzy he thei awpa rai vaw y khao hra leipa ta. Election zizazy nata apathluana palôhrupazy cha he su tawhta a chadai papua hapa a châ zie ei viasapaw ta eina chhopa cha ei palôh he za tlâh tu ha ta, thata lâh ngâ kaw awpa he ei kho pâ ngâkaw.

              Cha hawhta bielôhawhpazy nata  eima MADC chôchâhzy reipâna chô chata eima hmotao awpa cha vaw tao khai ha hra pi ta. MADC Office cha apalaikhei kawna chôta vaw puasai ha pi ta. Eima hmotaopazy liata eima hlaotloh kawpa vâta nata eimâ hnabeiseih pha leipa pita eima MADC Office a vaw y thlâh hapazy cha bielôhawhpa ta vaw reih lymâ pi ta, Siaha Traffic Point eima za tlô chyta liata buakha eimâ pahâ chhôhta ei nawhta heta, “Thyu bâ tyh, KHP Pakhy â daih ha”, tahpa ta na vaw pahra ha ta. Sana dawh ei za mohpa cha Dawh 5:30Am he vaw châ ta. Thlai thyu na ta, KHP pakhyna lâ cha khy ha na ta.

 

 

 

 

 

Machâ reih

 

 

1.       Chaw  : Rilâhpa

2.      Chhânô         : Chhâ (Daihti)

3.      Châdi : Châ, châpaphaopa, châropa

4.      Châhdi           : Lyu sâh tai khaina daihti

5.      Cheihdô        : Abei, khih beipa

6.      Cheihdôripa : Abei hlôpa, abeipa saw

7.       Chhivaw        : Abei zuah laihsa chhithaipa

8.      Chhivawhronô        : Abei zuah chhithai ngaitapa

9.      Chyuh            : Hiah, lahpinô châta hiah (hnei, ati)

10.   Chhôhhno    : O chhôh

 

 

 

 

Mara reih rozie dopa

 

 

Khao (m)           : A chao lâ â khao (Verb)

Khao (r)             : Tao khao khâ (Adv)

Khaoh(d)          : A khaoh a vieh (Noun)

                               Eina khaoh (Verb)

                               Ei ky eina khaoh (Verb)

 

Khai(m)             : A tao khai haw (Adv)

Khai(r)               : Alô a khai (Verb)

Khaih(d)           : Mei-ôh a khaih(Adj)

 

Khei(m)             : Tavia nie’pa a pakhei mah y.

Khei(r)               : Sôh a khei (Verb)

Kheih(m)          : Akheih ta a sie(Noun)

 

Khia(m)             : Â khia kaw (Adv)

Khia(r)               : A khia lymâ (Verb)

Khiah(d)           : Na tao khiah a pha (Conj)

 

Khie(m)             : A hykua â khie (Verb)

Khie(r)               : A khie khao khâ (Verb)

Khieh(d)           : A khieh kaw (Adj)

 

Khua(m)           : Sâh khua kha a pie (Noun)

Khua(r)             : Lôkâh khua lia â duah (Verb)

Khuah(d)          : Khuah a reih ha tyh (Adj)

 

 

 

 

 

 

SOCIAL MEDIA NATA THYUTLIAPAZY

 

 

~LS. Beihropha

Camp : New Delhi

 

 

Social media eima  tapa heta a pahlypa hluh  kawta, chazy cha za reihpasia via tuapa a zâ chhuah  sih la.

1. NEWSPAPER: India râh  liata thâtihbu (newspaper) ama print tua chai kô  cha 1674 Bombay (Mumbai) liata kha  châ ta, cha khai tawhta kô 1772 liata Madras ( Chennai) liata print heih ei ta. Kô 1780 liata Calcutta (Kolkata) ta pazi heih ta. Daihti vâropi vaw sie heih ta, kô 1927 liana khata News Agencies chhao India râh liata  padua pathaopa achâ hra.

2.TELEVISION: Televisions Broadcast India râh liata âduah tua  chaina cha September 15, kô 1959 a châ. He daihti no he All India Radio (AIR) Delhi station tawhta  programme sâno ngâlâh ama  pie papua tyh, dawhkha  chhôh rairie. Noh nata daihtizy vaw sie lymâ ta, kô 1972 pa ta Mumbai liata paduapa vaw châ heih ta, kô 1975 liata cha Calcutta, Chennai, Lucknow zy liata chhao ama vaw padua lymâ hra . Kô 1975 taihta khala  India râh liata Doordarshan Channel ngâlâh a y chy.

3. RADIO: Radio India râh liata a hmiatua chai awpa ta Radio Club of Bombay zy  ta June kô 1923 liana  khata ama vaw padua hrapa achâ. All India Radio he khizaw liata media organisation lai chaipa  py a châ hra. Regional stations 105, Local stations 65 ,Vividh Bharti Broadcasting 3 , Reih 23 nata FM radio 18 channel zy ama hnei.

4. INTERNET: Internet online newspaper, e-mail, Instagram, WhatsApp, Twitter, Facebook, YouTube etc zy heta eima yna  khizaw he apahly tah sih la rei chhei ngyu ma pi. India râh chyhsa he 1.35 billion  hawhta reipa châ pi ta, eima Mizoram chaki kawpa zy chhao atahmâ cha social media heta  maniah apahly khai ha bâ hra. India  râh liata, internet he kô 1986 liana khata cha (GIAS) The Gateway Internet Access Service ry  liata Mumbai, Delhi, Chennai, Kolkota, Pune, Bangalore zy ta vaw hmâh pathao ei ta, thla 6 chhôhta  (VSNL) Internet Service zy ta 10,000 subscribers ama  hnei hmâ  hra. Broardband Internet he kô 2004 pa ta pathaopa  châ ta, mobile phone sim 3G chhao kô 2010 pata activate pa  a châ hra. Daihti vaw sie lymâ ta 4G chhao kô 2012 tawhta cha  hmâ pathaopa a vaw châ hra.

              Khi a chô liata  eima palâsazy khi ta eima nohto hro liata a phana nata a chhiena lâta eima hmâna dâh reih awpa a hluh kaw, a viapachai  ta ei thyutlia heihpa zy hnohta. Atahmâ he Mara râh liata chyhsa a ypa cha 60,000 hawhta pachâpa eima  châ. Nohto ta thyutliapazy hry liata smartphones ahmâhpa pôh via lymâ pi ta, Mara thyutlia smartphone ahmâh leipa he y khao ma pi  tah sih la ei reichhei nahta pangiasa va na. Siku hawti py 8 tawhta a chô lâ la mobile phone hria eima  thai khai. Call, message, internet, etc hria dâh chhao eima thai khai hra. Anodeikua a hmâ dâh liata deikua eima thai leina hluhpi reih awpa a y. Chazy cha a point ta eima za reih laih awpa châ sala.

1. ECONOMY PARAOTUHPA: Smartphonezy hnei  hra sih la,Top up dâhdei ry n’awpa chhao  a hnei leipa he Mara thyutliazy hry liata eima hluh via thlyu aw. Thyutlia a hluh viapa pi he rai chhao hria hoh lei ta achie  ta nôpaw hria chiehpa ahly ta niekheipa eima châ. Keima he arohtuhpa chhao he siana hnei hra va na. Eima râh liata 4G a active tawhta chhochi cha Top Up dâhdei chhao maniah â vaw daih khao  leipa  ta, Internet pack vaw byuh pâ heih ta a vaw bua kaw ty. Thlakha chhôhta â daikhyh kawpa ta y awpa  ta cha approximately ta Rs 300 zy vaw byuh ha ta, biechhona liata balance  pahryuh kawpa nah chhochhi la eikha ta Rs 200 mâzy khoh ei ta, eima thlakha mobile expenditures cha Rs 500 khôlâzy sai a vaw châ ha bâ. Achuhaipa nô nata paw phusâ ahlypa châta cha eima economy paraotuhpa a châ hmeiseih.

2. HNATLÂHNA A PARAO : Social media nata Internet zy a tlô hlâta eima nôpaw daihtizy za saipakhuapa ta, atahmâ ta eima thyutlia lâhpazy he heta  mo phaleipa hri veipa ama hluh kaw. Mo phaleipa hri he pihkheipa hluhpi y aw ei ta, anodeikua PC games nata mobile hriapa ngâkheina vâta mo phaleipa mobaina leita châ chhao reih thei khao ma pi. Viasa apakyh ta bielôhawhpazy reihpa hlâta cha eima daihti hluh viapa cha computer games, social media etc liata hmâ hluh via pi ta. Eima viasa nata chhôkha y lâhpazy nata apakyh khao leipa pita he vâta thokha cha yrupa ta depression zy hnei ei ta, hawti kaw tlôh ta stress a hneipazy eima hluh kaw bâ. Mood swing zy chhao a tlôkhei hra.

3. EIMA DAIHTI NIETUHPA : Internet khizaw liata pahrâpa châ pi ta, hmoto he a rai nao ta theater lâzy vawh byuh leipa ta a rai nao kawpa ta online tawhta movie zy moh thei pi ta, Instagram, Facebook, WhatsApp zy vaw y ta, a lôhawh tah pi ta eima yru papai n’awpazy ta hmâh pi ta, anodeikua hmo productive kawpa eima hro liata tlôkhei hmeiseih vei. Marasaw social media hmâpa ta phusâ niebaw tlua n’awpa nata chhôhkha chyhna Khi social media hmâpa ta athôhkhei kawpa he eima y nahta pangiasa âchhih vei. Eima vaw y hapa chhaota kupazah khi dâhdei hmahta châ m'pi. He vâta a phapa ta eima pachâ khiah eima daihti sôh kawpa maniah nietuhpa a châ. Japan bieso ta “time is more  precious than  money” ama vaw tahpa he â do kaw. Nohkha ta dawh 24 hnei chyu pi ta, athai sopa nahzy ta ama research tawhta ama hmô papuapa cha keimo generation asie ngâhaipa thyutlia thokha cha dawh 24 liata daw 10 chhôh online liata daihti hmâhpa ama y. Eima hmialâ liata rai hmô thei awpa nata chhôhkha chyh thei awpa ta maniah pachhuanohtuh awpa, châzy reih hoh khao leipa pi ta, eima daihti sôh kawpa a hluh viapa cha Games, Online Movies, Korean Serial Drama, YouTube etc  liata eima hmâh khai. Eima daihti sôh kawpa maniah a nie hluh ngâsâ.

4. THATHINA A TLÔKHEI : Eima reih chiehpa hawhta Internet  a vaw y tawhta cha hmoto he a rainao ta, anodeikua Internet a pua hlâta eima nôpaw, eima mahnô mahpawzy daihti kha za saih pakhua sih la, atahmâ generation hlâta tiama via ei ta, kha tiamana hro atanoh Internet chhâ liata chhao amâ chakaih. Keimo atahmâ ta generation liata thyutlia sapha kawpa nata pôraoh chhao â tlai kawpazy pi heta rai chyh nawh kawpa chhao hria hoh khao leipa ta châ minute 30 chhôhta eima reihpazy he raihria pasa kawpa hawhta a hmôna eima hnei. Beihchho, o pathaizy tao awpa hlâta la Facebook, whatsapp, Instagram, games etc zy eimâ tlyh via. Eima nôpaw ta phusâ hyhkha hryuhpa ta College zy kiah pi ta, class a chiepa ta tlâ eima kiapazy chhao he rai pasapa hriapa hawhta a pachâ pi ta, class liata chhao lecture notes zy dâhdei chhao hmahta roh hoh khao m’pi. Notes patlypa chhao hoh khao leipa pi ta, material dâhdei hmahta eima screenshot lei khiah camera ta zy a nothlahpa tlâ eima la bâ. He vâ heta writing skills liata chhao eima tla pahnai kaw. Eikha cha  2^nd  Semester ei chu no châ ta, thlakha chhôh tlai ta writing a vaw practice khao leipa  ta y na ta, assignment hyutuhpazy ta maniah ama piepa vaw roh’pa ei chhuahpa cha, ei ku lâchakâ chhao â do thai khao leipa ta, seilakohpa speed hawhta ei kuzô cha dusaw ta, keima liata hmo pachâna â vaw ngiapa cha practice a peimawhzie nata notes zy roh ngâthlât awpa peimawhnazie he a châ.

              Âthaona lâta ei vaw reipa hawhta Internet phana he za roh sih la roh tiah awpa châ vei. He châpaw liata ei vaw highlight khohpa deikua cha eima hmâchheina dâhzy vaw reih hluh na ta. Areituhpazy ta rie vaw pachhaih thai u la. Social media nata Internet hro hro he phana kao hluh ta, eima hmâhthai khai awpa châ ta, a hria thai leipazy chhaota eimâ chu awpa a châ. Anodeikua vaw tah hei tuah sala- ahmâna dâh he keimo achuhaipa nata thyutliazy pita la eima balance thai kaw awpa a byuh. Chalei khiahta la hmialâ liata IAS, MCS, Doctors, Scientists, Pastors etc châ awpa eimâ chhuahna zydua maniah pakhâtuhpa a châ pathlei tlamaw aw.

FOR GOD AND MARALAND

MARA

CULTURAL MEET EI 1-NA

TIPA (V) LIATA

 

~ T.A. Chhôhu

 

              Râh nôpawpa nata MTP HQ chhihthatuh penawh palôh liata Marapa Lâ nata Hla pasôna nata cheihchalo khohna vaw pua lymâ ta, Mara Cultural Meet hnei awpa ta ama vaw pathlu. He daihti (1985) nota Mara Autonomous District Council liata Chief Executive Member Puhpa S. Vadyu nata a hrialâhpazy, Puhpa Vabeiha Hlychho, DI & PRO nata MTP HQ hriaparaohpa ta ei no ei thôh tlai ahmaohpakhypa ta târi 07.12.1985 liata Cultural Meet hnei awpa ta vaw paryhsa ei ta, Chief Guest châta Mizoram Chief Secretary apahawhpa a châ hra. Puhpa Vabeiha Hlychho nata Puhpa TA. Chhohu cha Tipa (V) tlyliah liata atyuduana nata tobina chôchâh liata Plan & Estimate tao awpa ta raopa ama châna hawhta, a dôhna (fencing) zy, Poh-rai ngiapa zy, Gate zy, chyhsa peimawhpa atyuna awpa (Stage) zy, lâh awpazy yna nata ama lâ n’awpa su zy ‘Plan’ tao khai ei ta, he Plan & Estimate he Chief Executive Member ta â pykhei tawhta he hawhta siekhei awpa ta hmahlapa a châ. Ahmâ n’awpa su Tipa (V) tlyliah dôhna dâhzy mokhei awpa ta Puhpa TA. Chhohu sie chhielie awpa ta tuapa châ ta, ano (TA. Chhohu) cha a Scooter liata Puhpa Vabeiha Hlychho ta Petrol Litre 5 (sâpangawh) a rypa khai tawhta a sie. Tipa tlyliah cha tho-âpa 4"x3"x12" tôh hmâpa ta latho poh ta vaw dôh khai ei ta, he he â lâna dâh â ngia âh leipa vâta paphiesa khaipa a châ. MTP Member tiama viapa nata Forest Staff zy ta Rahvaw (Ramawh chi kha), Diary vaih tikhaoh hnawh liatahpa chhawh parapa ta Tlyliah cha yzie hnei kawpa ta dôh pathipa a châ. Tlyliah angiana  Ochhi ( Gate) he a eihhrâhpa ta tao (Plan) pa châ ta, a  tobina poh chhao bieh khai tawhta a pasy ta pasypa châ ta, a rai a ru pâ kaw. Rôh râhpa, vyhpa nata a saihpa ta â tôh lâta i-âhpa châ ta, zakhei â chhih lei kaw. Tlyliah he pathaih ngâsâpa ta phipa châ ta, sipopa pyuh tlakaihpazy chhao hao khaipa a châ. Plan & Estimate khô lâta Thâtihbu chyhsa (press) nah atyuna awpa su chhao a noh-eih tlaita Dawhkâh chhaota taopa a châ hra (He daihti liata zawpi ahmaohpakhyna su liata thâtihbu chyhsa châta atyuna eihhrâhpa tao tua chaipa a châ thlyu aw).

              Cultural Meet a ei 1-na a châ vâta tlyma zawpi zydua thathyu kawpa nata thapawh kawpa ta apachhuahpanohtuh penawh baokhâ ei ta, palôhtlâh â chhih ngâsâ. Hlâno Marapa lâ nano nanopazy pamosa awpa ta hruapazy lâh pha kaw sai ei ta, he hry liata zawpi mo la kawpa nata zawpi phuh nâ kawpa cha Tisi khih tawhta nôtlohpa nata pawtlohpazy ta hlâno atobi dâh do kawpa nata hmeiseih kawpa ta ATHIH LÂ ama lâpa  kha a châpa ta â lâ. Chyhsa hluh via châta cha ama ei 1 (kha) hmôna châ thlyu aw ta, liathih kavoh niena chôta ama mohpa a lyu kaw. Zawpi moh penawhzy chokaro achalihpa ta ama dia sili ha. MTP Member satlia-laihsazy palôh pahnie kawpa Puhpa J.R. Sanga Hla ‘Tlâhpi tawh vapiati pasohpa naizualua ta a lona. Cha-aw chalaihpaw bâ hra ei si, Mara sawzy laihna su,’ tahpa Saikao MTP zy ta ama sapa kha he daihti ahmâhpazy palôh lia la a châh ngâthlâh thlyu hra aw. Lâsopa dei châ leipa ta, paro-pasyupa lâchhâh chhao pamosapa châ ta, Siaramo tôpa zy, Châ-ei tôpa zy, Ôkarao totâ topa zy nata Tlaipi tôpa zy nahthliepa châ ta, lymâzy chhao a rakhapa taopa a châ hra. Hezy he lymâ ala/daopa ama châ. Siaramo tôpa liata Puhpa Nôhro Hmôkô, New Colony Siaha châ ta; Châ-ei tôpa liata Puhpa S. Tlachai, Zyhno nata Ôkarao totâ liata Puhpa B. Tekô, Zyhno zy ta ama dao.

              Cultural Meet patohpatiatuh penawh palôh liata thyutliapazy Hlasana kyh liata palaiseihsa khona a lai kawpa vâta Hlasa ataopasuana pachhuahpanohpa châ ta, he hla asapasuana liata Ls. S. Ngodei, Tipa ta lymâ 1-na dao ta, Mara chanô hlasathaipa hry liata a kaw khaih phapa ta Cassette tao tuachaipa, a ao Tape Record tawhta eima nahthlie tuachaipa a châ.

              He Cultural Meet lia heta nôpaw khochhihpa hluhpi ahlao ei ta, âmo hleikhô ta satlia-laihsa hluhpi Tisi, Saikao nata Zyhno tawhta ahlao ei ta, Cultural Meet hlao patlohsatuh chaipa chhao ama châ hra. He liata ngiatlâh châ kawpa miakha cha Mister nata Miss Cultural Meet atlyhpa he a châ. Tovyuh piena chôchah liata ama tao awpa mody kawpa ta a taopa, ama hmisâ nata pôraoh chhao zakheichhih leipa atlyna hneipa châ ta, chapaw tawhta J. VACHYU, Tisi nata chanô tawhta ESTHER, Zyhno zy atlyhpa ama châ. He atlyhpa he Miss Mara atlyhna lâhaw chhawhtuhpa a châpa ta â lâ.

Khichhai Laipa (Chief Guest) châta Mizoram Chief Secretary apahawhpa cha â mâ leipa vâta Puhpa Haukhum Hauhzel, IAS, Secretary to Govt. of Mizoram ta a hmâkhei. Daihti chhâna liata lymâzy raipapua awpa ta Puhpa BT. Sanga, IAS, Deputy Commissioner, Chhimtuipui District, Siaha ta a hmâkhei hra.

              Lâpa nata daihti hmâna zydua he Video nohthla lana ta lapa châ ta, Puhpa K. Lalreia, Information Officer, Directorate of Information & Publicity, Aizawl tawhta a vypa ta phahnaingiah kawpa ta a la lymâ. He he Mara râh liata Video Camera hmâna hmiatua chaipa a châ hra.

              Hlâno mahnô-mahpaw lâ nata hlazy he Marapa miah syhpakhytuh chaipa miakha cha a vaw châ tlaipa ta â lâ.

 

 

 

Source: Board of Mara Literature, MADC, Siaha.