BML Issue April & May 2020

              Editorial

  

                Eima pahno chyupa hawhta zâkô, November 2019 rachhôh tawhta China râh tawhta âthaopa, Novel Corona Virus (Covid 19) chata Khizaw patypamâ chaimâh ta, eima râh India chhao maniah angiahnaopa ta chyhsa hluhpi ta he pasana he veipa ta,athi kheipa chhao ama y hôlô bâ hra.

              Sawhkhâ ta India râh pôhpalôhpa liata Lockdown a phuah hapa vâta Hla nata Bie Pachawh (April) 2020 Issue chhao vaw papua thei leipa pi ta, pei tah kaw pi ta, atahmâ he Pachawh nata Patô  p[akaohpa ta vaw papua pi ta, Hla nata a latuhpazy nama pachâthaina eimâ haw.

              Mizoram State liata chhao he pasana hri vâta avaih awpah a peimawh kawpa vâta sawhkhâ nata moto ta avaih chaimâh pi ta, India Prime Minister ta he hri tawhta avaih a byuhzie pahnopa ta zawpizy khôtho pua tlâ lei awpah ta pakhânazy vaw tao ta, chyhsa hluhpi ta biepiepa zyhpa ta ama y hai nota thokha, sawhkhâ biepiepa raita apapeisa leipa ta, khôtho a pua ngâthlâh hapa eima hluh kaw tyh bao.

              Sawhkhâ nata Awnanopazy ta eimâ boh n’awpah ta pachâna hluhpi hmâhpa ta ryh ama raopazy he moto ta zyh chyu tyh sih la, cha chata eima râh, eima khitlâh, eima ochhôh châta rai rônah ngaitapa hriapa ta, eima unawh, eima sawnah, eima opalyuhrizy eima pabohsa tahpa eima pahno awpah a pha ngaita.

              Hmialâ daihti liata chhao, he hlâta pasana hri chichhih viapa vaw pua aw vei tah thei’pah châ leipa ta, pasana hri cheingei leipa chhaota sawhkhâ nata pyzy ta eima râh châta ama hmahlanazy deichhytuhpa eima châ lymâ awpah he Mara sawzy châta hmo peimawh ngaitapa a châ.

              Ngiapâ pha kawpa chhao eima vaw châ thei aw, thi thlalôhna chhao eima hnei ha ngyu thei aw. Chavâta thi awpah achi leipa hawhta avaih leipa ta eima y khiahta la hmo pei kawpa a châ aw. Keima mo pakha thi awpah ei chi leipa khata ei thi hnôhlâ ta eima lahpi sawnah, eima unawh nah ahy ta a vaw mohôh aw. Hri chichhihpa vei awpah ei chi leipa khata ei chhôhkha nata opalyuhri zydua paka khai h’aw sala, cha nah chata chyhsa vaw paka pachhuah khai ha heih ei sala, Mara saw, maluh chyhtazy cha thlaita eimâ mua khai thlâh h’aw cha zaw,

              Chavâta, patlâhpa hlâta avaihpa a pha via ama tah tyhpa hawhta, moto ta eima hnatlâna nata hri-iah pathaihna he pachâ peimawhpa ta sawhkhâ, NGO nata Awnanopazy hriaparaoh lymâpa ta, ama rei angiah via lymâ ei suh u.

 

 

 

 

 

Plastic  Nata  Apuapa

 

~ H. Beilaikô  Nôhro

New  Colony-II,  Siaha

 

                                                                                                                                 

                                                                                                                                               

 

              Na  vaw  hmô  tyh  hr’aw  nahta  ei  pangiasa ?  Khichhôh liata  nâ  khiekhâ  laihna  liata  eima  chheipâh  liata  apuapa  eima  thypakhypazy  hi. Eima  tihry (nallah)  nata  side  drain  zy  liata  hnaihny   eima  patoh  pakhypa  a  thu  hôlôpazy  hi !   Eima  sôhdaohna  su  nata  eima  thopi   daohzy   kiahpâh  liata  apuapa  eima  sohpakhypazy  hi.  Eima  khihtlâh  hmi  a  pachhie  tlaina  ta  tyh ? A  sia  viapa ta  nâ  kei  khiekhâ  laih  khiahta la  zawpi  eimâ  hmaohna  su (Our  Public  Amenities) field, Hall, Office, Quarter etc  zy  chheipâh  liata  apuapa  eima  thypakhypazy  na  kei  hmô  laih  heih  aw. A  chakhiehcharieh  viapa ta  na  kei  mohpasia  laih  heih  khiahta la,  cha  suzy   liata  kuvâ  eima  niena   chinai  eima  baipa, pachih   eima  pachhaona   nata  thihniah  hawhpa   â  bai  hôlôpa  na  kei  hmô  laih  heih  aw. He  he  tahmâ  ta  marapazy  eima  hrozie  nata  eima  khihsazie  cha  a  châ. He  heta  eima  chî  châna  maniah  a  phualuah  kawpa ta  ei  pahno. Hmahsiena, a sosâhna   a  chadaipata  hmophapa  hnei  eimâ  chhuahna  lâ  liata  eima   pahrâna  suzy   nata  eima  chheipâhzy  â  pathaina  châh  chhao  pahno  khao  mapi.

              keimo  mo  pakha  he   â  pasipathai  kawpa ta  a  mohôh  pha  kaw  ei  sih  la, eima  ochhôh  pathai  beih leipata  â  thlâ-zi   thai  beih leipa  sa la. Eima  Ochhôh  ngâlâh  ta  he  mohôh  phapa ta  pathai  tyh  ei  sih la, eima  chheipâh  pathai  beih leipa  heih  sa  la. Cha  hawhna   chata   eima  khihliah (Streets) zy  cha  phei  ta  charei  khoh (â khiekhâ / â  hlaihlâ  khoh) lei  awpah ta  a  puapa  nata  pasi   â chhihpa  châ  heih  mawh  sa  la. Khôtho  lâta  chyhsazy ta  chyhsa  â sosâhpa, chi   nata  pho  hmahsiepa, laiseihpa,  zah  âchhihpa, mopâtlâh  a  châpa  ta  maniah  ama  rao  beih  ma ? Nâ  nata  kei  chhaota  rao  chachei  ta  hr’aw  ma  pi. Chyhsa  vâtlâhpa  ta  la ‘Pathaihna’ he  hmahsiena  nata  laiseihna  sâkhâ  hawhta  eima  pachâ. Pathai  awpah ta  deikua  mo hropa   ku  liata   soh  thai’pah   châ  leipa  ta,  keimo  tlai  ta  eima   tao, hria  hra  awpah  tlao  a vaw  châ  tyh.

Cha  cha  moto  ta  eima  chhôhkha, eima  khihtlâh, eima  society  nata  eima  râh  hnohta  eimâ  bâhpa  miakha  a  châ. Cha  eima  tao    hialia  awpah  cha   moto  ta  pahno  leipa ta  eima  vaw  uasa  tyh  beih leipa  vâna  tlai  chata   eima  Ochhôh, eima  chheipâh, eima  khihtlâh, eima  society, eima  community  nata  eima  râhzy  cha  thata  a  vaw  pua  ha  tyh. Eima  vaw  pahno  hawh  tuna  chhao  he   hmo  pei  ngaita  kawpa  a  châ !  Eima  pahrâna  su  he  ahy  ta  hmahta  maniah  vaw  pathaipa  cheita  beih  aw  veih  ei. Khizaw  hmahsienazy  vâta  chhao  a vaw  pathaih  thei  rimâ  awpah  châ  hra  vei. Keimo  a  pahrâtuhpazy  chô  lia  tlaita  â  pahniehpa   dei  a  châ. Baih(blame)  awpah  tluapa ta  â  heihpaliepalâ  ngâh  hr’aw  sih la  keimo  vâ   hleikhô   ta   ahyhhmah  ta  y  chachei  ta  veih  ei.  Cha  khiahta la   eima  maohphaohna   cha  eimâ  pyh  thei  aw  ma ? Tao hria   khoh  leipa ta  eimâ  râsai  thlâh  ha   aw  ma ?  He  hlâta  pha  viapa  pahrâna  hropa  hnei  khao  tlôh  pi  va ! Eima Tî  nata  Râh  he  khoh  khao  leipa ta  puasaipa  châ  heih  mawh  ei  sih la,  chi  hro  pho  hropazy  cha  keimo  hlâta   â  pathaipahâ  viapa,  â  mohôh  pha  viapa  sai  châ  lao  heih ei..!  

              Apuapa  he  moto,  chhôhto, khihtlâh  nata  sawhkhâ  pî  tlai  chhaota  eima buakhei   awpah   â  ngiah  hmeiseih.  Ahyhmah ta  su  pathaih  leipa  nata  apuapa  su  liata  pati  nie  khoh  lei  p’aw  pi ta, ngai  â   si   khoh  hra  lei  p’aw  pi ta, â  mô  khoh  beih  hra  lei  p’aw  pi ta, a  tyudua  khoh  hr’aw  ma pi. Vâtlâh  nata  sawhkhâ  chhaota   cha  hawhpa   su   pathaih  leipa, su  puapa  nata  roh  chhiepa  suzy  liata  zawpî  a  hmaohsiahna  pachhuahpanoh  beih  hr’aw  veih  ei. A  chhâpa cha  kha  su  khana   a  pathaih  vei. Kheihawhpa   a  châpa  chhaota   chyhsa  payzia  n’awpah  ta la  pathaih   ha  tua  awpah   a  byuh. Chatanachata   su  pathaihpa, su  hmâtlâhpa  a vaw  châ  thei  aw. Cha  khiahta la  kha  su  a  pathaih  leina  chhâpa  kha   khazia  e ?  kheihta  e  kha  su  kha  a vaw  pua  thai ?   no  khota  a  vaw  puapa ma  a  châ  aw ? Ahy  ta  e  vaw  papua ?  Khazia  e   a  vaw  papua  thlâh  haw ?  Tahpazy  cha  hiahrina  a  y  theipazy  a  vaw  châ. Kheihawhpa  su  nata  hmo  rai  he  ano  kho  tlai  ta  pualei  thei (thai)  vei  tahpa  cha  moto  pahnopa  a  châ.  Cha  khiahta la  a  papuapaleituhpa  cha  ama  y  tahna  chhao  a  châ. Cha  cha  keimo  a  su  liata  a  pahrâtuhpazy  he  eima  châ  tahna  chhao  a  châ  hra.

              Apuapa  thyna  kyh  he  eima  pahno  kaw  saipa ta  â  lâpa   a  chķ  tarawpa ta,  eima  thyna  dâh  nata  eima  thyna  su  deikua  a  pahno  beihleipa  eima  lyu  kaw. Chyhsa  hluhpi   ta  apuapa   eima  thyna  dâh  he  reipachhie   khi  a  tlohpa  a  châ. Eima  yna  suh  tawhta  deikua   apuapa  hawhta  pachâ  pi ta  eima  kei  thyna  su  deikua   tlao  eima  kei  papua  lilaw (hrih)  ha  tyh. Eima  pahrâna  Ochhôh  nata  eima  chheihpâhzy  cha  â   pathai  tlai  hra  pi ta, eima  pahmaoh  pakhypa  apuapa  deikua  eima  kei  thy  nahta   chyhsa  hropa   châta  hmo  pualeipa  nata   â  tymâpa  tlao  a  kei  châ  heih  tyh. Keimo  ngâlâh  pathaih  ei  sih la  mo  hropazy  cha   ama  vaw  pua  hapa  chhaota  pei  tah  leina  pathipalôh  eima  hnei  tahna  a châ.  Cha  cha  pathipalôh  do lei  ngaita  kawpa, keimosasyh (ngâlâh)  kyh  â  pachâna  palôh  a  châ. Chahawhpa  pathipalôh  eima  hnei  khiahta  cha  chî  nata  pho   â  sosâh  leipa (uncivilised), vaih  nata  tlâh  pachâ peimawhna   a  hnei  leipa (Civic  sense)  eima  châ  tahna  a  châ  aw.

              Kei  cha  eima  O  liata   apuapa  eima  hneipazy  cha  lapakhy  na ta, suno  lâ  ta  pachhaih  na  ta. Plastic  he  a  no-eih (separate)  tlai  ta  soh  na ta, a  pha  viapazy  cha   sukha  liata  sohpakhy  heih  na  ta, âhmie  a zuah  tyhpazy  hnohta  hmâh  chanei  heih  awpah ta (For  recycle  use) ei  pie  lilaw  tyh  ei. A  chhie  viapa  hmâtlâh  a châ  leipa  zy  cha  pachôpakhy  na ta  eima  O  pâh  liata  saimakaopa, tihry (nallah)  liata   mei (fire) ta  ei  kei  rao  ha  tyh. Cha  hawhna  chata  eima  niedona  a  pualeipazy  cha  sukha  liata  pachôpakhy  heih  nata  eima  O  kiapâh  liata  râh  ruapa (small  garden) liata  alei phapa (Furtilizer & Fossils) châta  ei  soh  pakhy  heih  tyh. He  hawhta  a-puapa  yzie  hnei  kawpa ta  ei  pahleipadia  tyhna  vâ  heta, apualeipa  a  thytuhpa  motor (Sanitation  vehicle) â  vy   tita  chhao  apuapa  thy  awpah  rai  hnei  beih  va  na. Alei  phapa  chhao  chalei  byuh   leipa ta  keima  ta  tlao  ei  tao  tahna  a  châ  hra. He  hawhta  taopa  he  a rai  chhao  vaw  ru  tiarâh  vei. Chhôh to (moto)  eima  tao  chyu  thei  hr’aw  nahta  ei  pangiasa. Vaolao  chhao  O  to  ta  eima  lapakhy  hoh  khiahta  cha  he  chhochhî  cha  hmo  rainao  viapa  a châ.

              Eima  sawhkhâ  tawhta  zawpi  vâtlâh  pathaihna (Public  Sanitation)  pachâ  peimawh  ngaita  ei  ta, chhôhto  ta  apuapa   eima  pachôpakhypazy  cha  ama  motor (Saniation Vehicle)  ta  maniah  vaw  lapakhypa  tyh  ei  ta. Kho  â  chhih  hmeiseih  tlai.  Châhrasala  cha  ama  lapakhypa  apuapazy  cha  eima  pahrâna  chheipâh  liata  kei  thypakhy  heih  tyh  ei  ta,  keimo  châ  pyly  ta  hri  nata  iah (Disease) lâ  ta  â  vaw  lie  lilaw  ha  heih. He   hawhta  eima  pahrâna  chheipâh  liata  tlai  ta  hmô  thei  awpah ta  apuapa  â  pachô  hôlôpa  he   a  mo  chhao  â  ngia  leipa  ta, eima  khihtlâh  hmi  chhao  a pachhie  kawpa ta  â  lâ. A  kiah  liata  apahrâpa  chyhsazy  châta  chhochhi  cha  hri-iah  chichhih  kawpa  a  châ  nahta  ei  pangiasa. Plastic  chhochhi   cha   eima  pahno  chyupa  hawhta   alei  ry (Under  earth)  liata  kô  rei  pi  chhao  â  pabu  ha  hra  sala  zao  pathlah  thei  tlôh  lei  khâh  ta. Keimo  hra  cha  eima  khihsanazy  â  sâh  via  lymâ  ta  plastic  he   hmâh   hluh  via  lymâ  pi ta,  thy  hluh  via  ngâ  kaw  heih  tlôh  aw   pi  ta !  keimosasyh  châta  rairuna, pasana  hri  nata  iah  eimâ  tao  via  ngâ  kaw  tahna  dei  a  châ.

              Athaipazy  reizie  ta  cha  plastic  he  alei  ry   liata  a  y  tawhta   kô  1000   khô  lâta   a zao  theipa  hawhta  reih  ei  ta. Cha  liata  polythene  bag  zy  cha  kô  10  tawhta  kô  1000  chhô  liata  zao  thei  ta, Tî  paloh (Bottle)  zy  hawhpa  chi  he  cha  kô  450  khô  lâta  a zao  tyh  ama  vaw  tah. Plastic  he  chi  7  tawhta  taopa  châ ta,  chazy  cha ; polyethelyne Terephthalate (PET / PETE), High  Density  Polyethylene (HDPE) , Polyvinyl Chloride (PVC), Low Density Polyethylene(LDPE), Polypropelyne(PP), Polystyene(PS)  zy  tawhta  taopa  a  châ. Plastic  he  khizaw  râh  zydua  ta  buakhei  ha  tlai  ta, râh  hluhpizy  liata  cha  hmâh  pasaih  khao  leipa  ta  pakhâ  hapa (Ban) chhao  a  vaw  châ  haw. Eima  India  sawhkhâ  chhaota   pakhâna  vaw  tao  hra  ta,  eima  khihpi  hluhviazy  liata  cha  hmâh awpah vaw  pasaih  khao  veih  ei. Keimo  mawrâh  state  chhaota  târi  noh  29^th  August, 2019  tawhna  khata  ama vaw  khâh  pathao  ha  hra. Châhrasala  a  taopapuatuhpa (Company) he  pakhâpa  a  châ  hlei  tlôh  lei  khiahta  cha  keimo  zawpi  lâta   hmâh  pasai  leina (pakhâna) he  cha  yzie  a hnei  tu  nahta pangiasa   â   chhih  vei. Ângiachâna  ta  dâh  nata  phôh (Rulse  and Regulation)  taopa  (ama  tawpa)  hawh  dei  a  châ  aw. Chyhsa  to  ta   a  rainao  ngaitapa  ta   eima  hmâ  chaipa, khihsana  liata  hmo  peimawh  ngaitapa, a  y  leipata  eima  y  thei leipa (khih  eima  sa  thei  lei)    châ  tlôh  ta. He  hawhta   pakhâ  chakhyh  thlâhpa  heta  cha  Zawpi  vâtlâh  chhôh  a  khai  tu  nahta  pangiasa  tlai  va  na. Paritheipa (Drugs)  eimâ  dyuhna  hlâta  chhao  a  rai  a  ru  via  syulyu  ha  aw. Khizaw  hmahsiena  eimâ  thôhkhei  chaipa  nata  eima  hmâh  phahnai  chaipazy  hry  liata  a  peimawh  chaipa  sâkha  châ  hra  tlôh  ta.

              He  hlâ  heta  cha  plastic  eima  châta  rairuna  chichhihpa  maniah  a tlôkhei  theizie,  eima  hmiahaopa  a  châ  hrazie  nata  eima  châta  hriiah  lâ  ta  â  lie  theizie  he  â  pachu  tiama  hri  ei  sih la. Yzie  hnei  viapa ta  a  hmâna  dâh (Recylce use)  nata  a pasopanôna   dâhzy  he  thata  tlao  â  pachu  hri  ei  sih  la  eimâ  thôhkhei  via  nahta   ei  hnabeiseih. Plastic  he  hmâh  leipa ta  y  thei  aw  ma  pi, cha  khiahta  la  hmâh  ei  sih la  eima  châta   rairuna  maniah  a vaw  tlôkhei  lilaw  lei  n’awpahzie  ta  hmâh  a chhuah  ei  s’u.  Hmâh  chanei  thei (Recyle) awpah  ta   apasopanôna  dâh  chhao  he  â  chu  via  ei  s’u. Polythene  laipa (Rambo polythene) liata  eima  hmâh  chanei  thei  awpahzy  cha  pachôpakhy  ei  sih la, cha  hawhna  chata  eima  hmâh chanei  thei lei  awpahzy  chhao  cha  sukha  ta  sohpa ta  mei  ta  rao  thei  awpah ta  pachôpakhy  ha  heih  sih  la  a  pha  chai. Cha  hawhna  chata  palo (Bottle)  eima  hmâh  chiehpazy  chhao  he   thychakhyh  khao  leipa  ta  polythene  laipa  liata  pachôpakhy  ha  tyh  ei  sih  la,  hmâh   chanei  thei  awpah ta  paso  pha  tyh  ei  sih  la  a  pha  chai  hra  aw. He  hawhta  a rainao  kawpa ta  a pahleipadiana dâh (Easy  dispose)  he  â  pachupa  ta  eima  hmâh  hluh  via  awpah  he  eima  châta  hmopha  chaipa  tlao  a  châ.  

Eima  India  râh  khihpizy  na  tlyna  liata  vaw  mohpasia  via  laih  tyh  hra  la, plastic  thychakhyhna  vâta (Reckless  use  and  depose  of  plastic) khihchhôh liata  tihry (Nallah) nata  khih  chheipâhzy  liata  hnaihny  thupa (ih)    rohhiahzy  na  hmô thei (theih  thei) aw. Keimo  râh  hawti  ta  liata  plastic  thychakhyhna  vâta  a  lei   â   i  leipa  ta  â  khao  hapa (Landslide)  chhao  na  hmô  laih  hra  aw. He  tawhna  heta  plastic  ta  khihchhôh (khih-liah) hmi  a pachhie  zie  nata  râh  a  paraozie  cha  na  pahno  thei  thlyu  aw. Râh  âsosâhpa  foreign  countries  zy  liata  ama  vaw  hmâhpa ‘Bio-degradable  Pipe’ alei  ry  liata  ama  sopa  hawhpazy  he  cha  eima  râh  ta  â  kaw pha  tiarâh  mâh  tlôh  leipa  pi  ta. Eima  India  khihpizy  liata  hmahta  ama  hmâh  pathao  mâh  leipa  a châ. Chata  a châ  vei  khiahta  cha  chhâvei / chhameih kô, chicheipa  sathaw  nata  Tilaipi  sizy  tawhta  ama  taopa  Bio-degradable  plastic (bio plastic)  zy  deikua  he  taopapua  hluh  viapa ta  kaw  papuapa  hluh  via  mawh  sala  eima  châta  a  pha  via  ngyu  aw. Cha  leipa  khiahta   Domestic  Incinerator  zy  he  raih  theipa  châ  maw  sala  eima  phahnai  khei  via  hra  ngyu  aw. He  chhao  he  Rs. 50,000/-  khôlâ  tahpa  sai  châ ta,  eima  budget  ta  a  pahnie  nahta  chhao  pangiasa  achhih  vei.  Tahmâ  ta  duasuh  liata  deikua  cha  thata eima  hmâh    chaipa  châ  tlôh  ta.

He  hawhta   zawpi  vâtlâh ta  ama  thy  ha  chiehpa,  a  pualeipa  lâta  â  lie  ha  chiehpa  pathaipa ta  eima  buakhei   ngâthlâh  hawh  khiahta  cha   khatita  hmahta  eima  khih  nata  râh  vaw  pathaih  thei  cheita  aw  vei.  Sôhdaoh (Shop) sâkha  tawhta   apuapa  ama  thypa  he  hmahta  vâro  tlai  châ ta, a  pathaituh  awpah ta  chyhsa  pathôh (3 heads) a byuhpa   a  châ. Chhôh  to  tawhta  eima  thypakhypa  nata  sôhdaoh  nata  office  to  tawhta  eima  thypa  zydua  pahlyhpa ta  chhochhi  cha  khatlu  ta  ma  hluh  aw  ta  a  pathai  a  ru  aw  vâ  tly ?  Mizoram  sawhkhâ  chhaota  Chite  Lui   thata  buakheipa ta  pathai  â  chhuah  ta,  châhrasala  a  hlao  tloh  hlei  vei. Kô  to  ta  apuapa  nata  plastic   ama  thypa  cha pôh  via  rili  ngâ  kaw  tlôh  ta. Yzie  hnei leipa  liata  ama  tha (Man power) nata  phusâ  tâkâ (Govt Money)  tlâ  ama  pahryuhpahripa  dei  a  châ. He  hawhta  policy   yzie   a  hnei leipa   he  keimo  chhaota  eimâ  mopâ (Copy) ngâhaipa ta  â  lâ.

He  hlâ ta  cha  ei  vaw  reih  chiehpa  hawhta  a hmâh  phahnaina  dâh  nata  a naosia  kawpa ta  a  pahleipadiana  dâh  he  â  pahmô (â  pachu) hluh  hri  ei  sih  la  a pha  via  nahta   ei  pangiasa. Eima  sawhkhâ (Biehneituhpa) lâ  tawhna  heta  a  taozie  awpah  â  pahnopahnâsana (awareness  campaign) miah  hneikhei  hluh  ei  sala. VCs  nata  NGOs  zy ta  maniah  mokhei (Check) hluh  via  ei  sa la. Chatanachata  chhôhto  ta  apuapa  nata  plastic  cha  anoh-eih  tlaita   pachôpakhy  tyh  ei  sih  la, cha  cha  eima  sanitation  department  lâ  tawhta  motor  ta  maniah  vaw  lapakhypa  tyh  ei  sa  la.  Khih  khôtho  lâ  syulyu  liata  thypa  châ  sala, plastic  zy  deikua  cha  su  bypa (Plain  Area) liata  pahmaohpakhypa ta ‘Patrol  nata  Diesel’  zy  bao  thlupa ta  mei (fire)  ta  rao  tyhpa  châ  sala. He  Plastic   raopa  khuh  tawhna  heta hriiah (disease) ; hydrochloride  acid, sulphur dioxide,  dioxins,  furants  nata heavy metal   zy  tlôkhei  thei  ta, cha hry  liata  bisphenol-A (BPA)  ama  tahpa  heta  cancer a tlôkhei  via  pachai  tyh. Chavâta  a thei  khiatala  khih  khôtho  la  cheingei  ta  rao  awh pa  apha. Cha  hawhna  chata  Plastic Cane  nata  Botol (Bottle)  zy  chhao  cha  polythene  laipa  liata  pachôpakhy  khaipa  châ  sala, motor  ta  lapakhy  khaipa  châ  sala, a  company  lâta  hmâh  chanei (Recycle  use)  thei  awpah ta  paphao  lilawpa  châ  sala  a  pha  kaw  aw. Chatanachata  hâta  eikha (weekly) ta  ei kha  lymâ  he  tao  thei  ei  sih  la, eima  khihtlâh  cha  reileipa  liata  tahmâ  ta  eima  duasu  hlâta  pathaih  viapa  nata  khochhih  viapa  lâta  eima  palie  thei  thlyu  aw. Eima   hnatlâh-zôtlâhna (health)  chhao  tahmâ  ta   eima  hneipa (châna)  hlâta  a vaw  pha  via  cheingei  hra  aw. 

Apuapa  he  khâpa  ma  a  châ  tahpa  ta  eima  hiahri  khiahta  cha, hmo   kheihawhpa  rai  a  y  lei  naw’pah  su  liata  a  y  hapa  maih  cha   apuapa  a  châ  tahpa  ta  chhopasiana  eima  dao  tyh. Chata  a  châ  khiahta  cha  eima  Ochhôh  nata  eima  chheipâh  liata  hmozy  cha  yzie  hnei  kawpa  nata  a  châna  dopa  nata  a   y  n’awpah  su  dopa  chyu  liata  eima  soh  chyu  awpah   a  byuh  tahna  a  châ. Apuapa  eima  thy  awpah  chhao  a  thy  n’awpah  su  dopa  ta  liata  eima  thy  cheingei  hr’awpah  a  byuh   tahna  chhao  a  châ. Chata  châ  leipa  ta  eimâ  ryhpaohna  maih  liata  apuapa  eima  thychakhyh  ngâthlâh  ha  khiahta  cha  eima  vaihzy  nata  eima  khihtlâh  châta  rairuna  eima  kei  taopa  dei  a  châ  aw. Cha  hawhta  vaihzy  châ  nata  khihtlâh  châta  rairuna  a  tlôkhei  ngâthlâh  hapa  chyhsa  cha  chyhsa  hmahsiepa, âsohsâhpa, chyhsa  phapa, hmatlâh a  chapa  châ  thei  vei. “ a-puapa  na  thy  dâh  tawhta  na  chyhsa  châna  hrozie  â  lâpasia ”  tahpa  bieso  chhao  he  â  vaw  do  ngaita  kaw. Chyhsa  hluhpi  cha  he  apuapa  eima  thy  dâh  tawhna  heta   eima  hrozie   awpah  pahno   theipa  eima  châ  tlai. Papeipahliasa  leipa  nata  mo hropa  pachâ  peimawhna  dita  chhao  hnei leipa ta  chyhsa  thokha  ta  apuapa  he  ama  thychakhyh  thlâh  ha  tyh. He  hawhpa  habit (practice)  pha  lei  kawpa  he  eima  thyutliapa  châ  athaipa (Educated / Intellectual)  nata  sawhkhâ   rai a  hriapa (Govt  service / Office  Goers)  hry  liata  chhao  eima  hluh  kawpa ta  â  lâ. He  hawhpa   hmo  pha  viapa  nata  taozie  ângia  viapa  (Good  habit / Practice) zy  cha  eima  châ  athai  viapa  nata  sawhkhâ  rai  a hriapa,  chi  hro  pho  hropa  hrozie  nata  taozie  a phapa  a pahno  viapazy  ta   maniah  ama  pachu (pahmô)  laih  hri  awpah  tlao  a châ.

Keimo  mara  râh  cha  chyhsa  chyhta  eima  pahrâna  su  châ  ta, a  chyhsa  apahrâpazy  chhao  â  pahnopahlie  thei  kawpa   sai  eima  châ. Hmo  kheihawhpa  rai   vaw pathâh  mawh  sala  thlai  ta  pahno   thei  pi  ta, eimâ  chho  pahmô  thei  khai  ha  tyh. Tahmâ  chhaochhi  cha  network  siepahliepa ta  thlai  thlai  tlai  ta   thâtih (Information) eimâ  pie  thei   khai  ha  bâ  hra. Thotlâh  khi  chakî  lâ  tawhta  deikua  cha  eima  khihpi  siaha  he  eima  Idol  khâ  a  châ. Chavâta   eima  khihpi   chaipa  tawhna  heta  hmophapa  nata  taozie  ngiapazy  he  pathaopatô  tua  ei  sih  la,  eima  thotlâh  khihzy  chhao  ta  pachutuh  chhao  byuh  leipa ta  thlai  ta  amâ  vaw  mopâ (copy) pachhuah  khai  thei  nahta  hnabeiseih  â  chhih. Cha  hawhta  a châ  khiahta  cha  khihpi   chô  liata  apahrâhpazy  pi he  eima  peimawh  ngaita  kaw  sai  tahna a châ. A pachaipa ta  eima  khihchhôh  amohôhna (Administration)  a  chabatuh  penawh  VCs  nata  NGOs  zy  taih  chhao  ta. Eima  vaih  zy  nochâ  he   a pha  ngaita  kawpa ta  eima  mohôh  ta  eima  chahlô (check)  pahnie  awpah  a  byuh. Eima  Autonomous  Council  nata  eima  District  Megistrate  tawhta  chhaota  hmah  maniah  ama  lakhei via  lymâ  awpah  nata  maniah  ama  baokhâ  via  awpah  chhao  â  ngiah. Biehneina  chhaota  zawpi  vatlâh  pathipalôh  a  pahnie  thei  viapa  chhao  ama  châ. Chatanachata  eima  râh  panyupa  nata  hawti  ngaitapa  he   Smart  Cleanliness  Project  policy  hmâpa ta  pahrâna   râh  hluhpizy  hry ta  su  phapa,  suh  kho  â  chhihpa, râh  phapa  nata  râh  ngiapa, moto  palôhtlâhna  nata  hro thaphana  hmôna, hro  lyna  nata  hro  khaihna, laiseihna  nata  hmahsiena  râh  lâta  eima  pachâsa  thei  ha  aw.

 

                                                                                                                  

                                                                                                    

 

MARA REIH HE

AHY TA E PASÔ AW?

  

~ Ls. LV. Jenet Rose

 

 

Mara reih he Khazohpa ta maniah a piepa châ ta, khizaw râh hropazy ta ama hnei leipa nata ama thaileipa reih, ângia ngaita kawpa a châ. Reih he a lei theipa nata a pôh via lymâ theipa a châ hra. A lei khiahta la a  chyhsazy ta ama hmâh leipa vâta nata ama pasô leipa vâta châ ta. A chyhsazy ta hmâh hluhpa ta ama pasô khiahtala a pôh via lymâ thei.

Mara reih he Marapazy deita ta hmâh pi ta, eima thai hra, chata a châ nota khizaw hmahsiena nata thaina sona â sâh lymâpa â chadai chhei hapazy ta  pasôpa ta vaw hmâh khoh khao leipa ei ta, Cha tawhna chata a chyh chyhta ta a vaw lei pathao lymâ haw.

Châhrasala chyhsa thokhazy ta a lei awpah pasaih leipa ta apabohsana rai vaw hria pathao ei ta, Chyhsapa amâ sosâhpa hawhta Mara reih chhao thata laiseihta, asosâhta, hmah a sie pathao ngâhai tahpa hmô thei’pah a châ ha bâ hra.  

Chi nata pho hmahsiepa nata hneirôhpazy hawhta eima reih he  pasâhsa ta, apalaikhei ta, pasôpa ta eima hmâh hluh lyhlia  awpah a châ.   Mara râh  nata Mara reih he ano khota hmahsiepa nata laiseih theipa châ leipa ta, a râh chyhsazy vâta thata laiseih thei ta, thata hmah sie thei ta, a leidia thei hra. 

Mara reih he athaiso viapa nata ahneirôh viapazy deita ta pabohsa thei leipa eita, pasô ta ahmâh hluhtuhpazy ta ama pabohsa tyh. Khizaw liana heta reih hluhpi y ta, anodeikua alyu khai vei.  

khizaw asosâh lymâpa hawhta thokhazy pita eima pikheipa reih Mara reih thyusai pi ta, reih hropazy hmâh pi ta, Mara râh chhôh lia tlaina chata Mara reih hmâh awpah eima noza pathao ha ta, reih hropa ta eima palei miah a chhao ha tyh.  

 Zawpi apôhpakhyna su hluh viapa liata cha Mara reih hlâta reih hropa ta su to hluh via ha ta, reih hropa ta ryureih pathao ha ta, chyhsa tota thai achhuahpa ta ama tei hôlo ha bâ . Râh chhithatuhpa nata râh ryureihtuhpazy ta reih hropa hmâpa ta râh chhihtha pathao ha ei ta, ama ryureina dyuchhai tawhta Mara reih cha thypathlahpa ta reih hropa ta cha su cha tlao a to ha bâ.

Mara reih ângia kawpa cha nâ nata kei ahneituhpazy ta eima zakheipa vâta lâkia liata thypathlahpa a châ haw. Ahy e amaoh phaoh aw??  Mara reih eima cheipa heta arâh chyhsa châna deita maniah pie leipa ta, kyhpachâtuhpa châna dopa maniah pahneisatuhpa achâ.

Chavâta Mara râh ryureina lia maihta Mara reih parosa ta, Marapa saw pakah tawhta Mara reih a pua hluh awpah ângiah ngaita kaw.  

Mara sawzy he palôh hmaohkha phaohpa ta eima reih eima pabohsa awpah â daih ha bâ. Chi hro phohropazy ta, Mara reih he cheih ta, pasô ta, cheihchalo ta, pabohsa thei veih ei. Nâ nata kei arâh chyhsazy ta eima reih he pasô ta, cheihchalo ta, pabohsa awpah he eima raihria awpah dopa a châ.

 Eima chhôhkha liata eima pikheipa reih hmâpa ta sawzy chhihtha adaih ha ta, Awnanopa liata chhao Mara reih ChôKhazohpa ta maniah piepa reih hmâpa tlaita a bie eima reih awpah â daih ha bâ.

Mara reih châbuzy rei hluh ta, pasâhsa ta, athai leipazy pachu awpah he Mara sawzy  eima tao awpah nata maohphaohna a châ . ChôKhazohpa ta Mara râh he chi nata pho reihtlâh lei awpah ta maniah tao leipa ta, chi nata pho reihtlâhpa, hmahsie lymâ awpah nata reih eihrâhpa hneipa ta nata ryureina eihrâhpa hnei awpah ta tlao maniah a tao.

 Achuna sâhpa khopa vâta nata thaina sonazy chadaipa ta eima pahrânazy anano tyh hra sala, Mara reih, eima pikheipa reih cha my leipa ta, chi hro pho hropa reihzy chata maniah disao awpah eima pasaih awpah châ vei. Eima reih cheingei hmâpa ta Abeipa bie  achhopa ta, Byhnâ eima  awpa chhaota eima reih hmâpa ta Byhnâ eima aw awpah a châ.

 Chatanachata Byhnâ cha eima râh liata tlô aw ta, Mara râh ta Byhnâ a to aw. Chi hro pho hropa reih hmâpa ta Byhnâ eima hiah khiahta la chi hro pho hropa râh liata eima Byhnâ hiapazy cha a tlô tlamaw aw.

Mara sawzy pi he alapa-eih khi y leipa pi ta, reih hropazy apasâhsa hmâ awpah châ ma pi. Mara reih hmâpa ta hlasa ei sih la, eima reih hmâpa ta Biehrai reih ei sih la, eima reih hmâpa ta râh chhihtha ei si la, eima reih hmâpa ta Mararâh thiehpa eima padua thei.

Chi hro pho hropa reih angiah leipa pi ta, peimawh hra ma pi. Râh thokhazy ta ama reih ama pahleina chhâpa cha chihro phohropa reih ama hmâh hluh tupa vâta a châ. Ahneituhpazy ta ama reih a thai leipazy reih ahlykhei lymâ ha ei ta, âmo reih ama siesai lymâna theilâpa cha ama reih leina chhâ chaipa a châ hra .

 Châhrasala, chi chynawh kawpa thokhazy ta ama reih pasô thai kawpa ta hmâh hluh lymâ ei ta, ama râh liata a pahrâpazy chhao chihro phohropa ama châna reih hmâh thai lei awpah ta tao ei ta, ama reih cha a boh ta, ama reih ta achuna nata châ ro nata reizy ama tao hluhpa vâta chihro phohropazy ta za ei ta ama reih â boh tyh.

Chavâta eima ryu hneichhôhpa Mara reih he pasâhsapa ta, cheihchalo ei sih la, hmâh hluhpa ta pabohsa tua ei si. Mara reih la a ru tu ha tahpa ta a chalihsaipa ta lôkhôh ahli leipa  ta, achu lyhlia ta thai achhuah sih la, roh hluh lymâ awpah he eimâ chhuah awpah achâ.

Cha tita Mara reih pasana cha tlâh aw ta, reih thatlôpa nata hneirôhpa a châna cha hmôtheipa ta a vaw y ha aw.

 

 

 

 

 

CHAUTHIA

~ K. Pari

 

( He châpaw (Article) he Pihnô K. Pari châbu, “Hlâno Mara su peimawhpazy” tahpa tawhta lapachhuahpa a châ. Ed)

             

              Chauthia khih he Dawlei khih tawhta a ry liata eima vaw palâsapa khihzy eima chapia khai tawhta eima tlôpa a châ. Tahmâ cha Lôbô-Vyhtu lâ tawhta cha he su he a lâh ta hmahta â sie thei haw.

              Chauthia he odyh 240 khihsapa châ ei ta, maluh 1700 rachhôh châpa ta amâ reih. Eima Missionary-zy ama daihti no cha odyh chyhta châ ei ta, alô ama bôna chhao he Saikao khih lâ tawhta ama khih tlô chy râh liata ama bôpa a châ. Atahmâ cha maluh vaw hluh laih ei ta, odyh chhao ama vaw pôh lymâ. Chavâta alô bôna su chhao he khihchhôh lâta â vaw lie hapa a châ.

              Eimâ chhuah chaipa cha Chauthia liata eima Missionary ta râhri lô abôpa he hmô awpah eima khoh chaipa a châ. He lôbôpa thâtih he atliata taihta khâ thei tyh na ta, thokha ta, “Nama Missionary lôbôpa dua ma ama uasa vei, alô he aduah thlâh ha ta”, tahpazy ta na chho tyh ei ta, hmô’pah ei byuh ngâsâ. Rev. RA Lorrain he Marapa sawzy châta thlahpa lâ châ ngâlâh ta rai hria leipa ta, sapa liata eimâ sosâh n’awpah chhaota hmah thata miah alapatuhpa a châna hawhta Marapa râh ngiana lô abôpa cha hmô awpah ei byuhna rei ha ta, a hnohhrâh lâta a thâtih ei hiahripa eina chho heihna dâh ta cha, “Zophei Baptist Association ta ama Office padua ei ta, cha nota lôbôpa kha phia ha ei ta, Tlâripaw ta a vaw chhu pakei khai ha”, tahpa ta eina chho ei. Anodeikua a su he hmô ta, ngiana khâpa chhâ ma tao awpah khona ei hnei kaw, chavâta he su pangaipa ta eimâ râ lymâ. Dawlei tawhta Rev. Tlabie chhao miah a zi hra. Dawlei tawhta dawh 1:15 eimâ râ tawhta Chapy nata Dawlei amâ rina chavah Lahua vah tlô pi ta, dawh 8:35am ta Chapy eima pangai. Chapy khih he odyh 50 hlei ama châ. A râ lymâ pi ta, dawh 9:00 am ta Chapy eima tlô. Awnano Machâ Pâhmô o liata thopi nata âhmie pahâh kawpa miah padosa ei ta, eimâ ly kaw.

              Ama khih liata awnanopa sâthôh y ei ta, cha liata MEC odyh 36, Baptist odyh 8 nata Roman Catholic odyh 5 ama châ.  Dawh 9:25 am ta Chapy eima puasai heih. Eima tlô tua awpah cha Zaoma khih a châ. He khih he odyh 20-pa châ ta, he liata Baptist 18 y ei ta, MEC cha dyh 2 ngâlâh ama châ. Dawh 9:40am ta Tare va tlô pi ta, 10:20am ta Taru vah eima tlô. Taru vah tawhta Zaoma cha 11:00am ta eima tlô. Kaw sie heih pi ta Zaoma nata Lythatlâ amâ rina vah Rasu cha dawh 11:20am ta eima tlô heih. Cha tawhta Lythatlâ cha 11:55am (Rev. Tlabie eima za pa-awsana khih) cha eima tlô. He khih liana heta Baptist odyh 42 y ei ta, MEC odyh 13, RC odyh 1 ama châ. He khih liata Mara Hlabu nata Biehrai eima raih. Dawh 12:30pm liata pua heih pi ta, Sawhti odyh 80 pa tlô pi ta, Sawhti nata Rezuah amâ rina vah Vyphaoh vah cha 1:15pm ta eima tlô. Dawh 1:40pm ta Rezuah eima tlô heih. Rezuah khi he khih laipa odyh 300 rachhôh khih asapa châ ei ta, ama khih chhao ngiaryh â chhih kaw.

              Rezuah pheisaih ahmô’pah a byuh hapa vâta ama Camp lâ miah achhi ei ta, eima sievaw n’awpah dâhzy chho pi ta, Rev. Tlabie ta Kaoh reih ta chho ta, Motor cha Rezuah liata soh ta a râhchhôh Motor Hire awpah ta miah chho ei ta, eima rairunazy eima chho tawhta eima Motor ta sie ta, cha zâ lilaw ta kua heih awpah ta miah ama chho. Rairu tah kawna chôta sie pi ta, Rev. Tlabie ID zy Record ei ta, Motor Nuhbyzy chhao ama lapa ta ei pahno. Eima siepa chhao pahâh leipa ta, kua thai rimâ’pah châ tlôh pi va. Motor lâpi thokhapa liata cha ama sawkhâ ta hmah ama vaw la thiehpa naihta lai kaw hra sala lâpi buahpa sai tlâ achhih pi ta, eima nohi kawpa ta eima khôsai ha chiehpa liata cha kua heih’pah raita eima palôh liata y vei. Miah chho hr’ei sala baotuhpa tlâ eima tua aw tah pi ta, palôh liata akheih thlâh hana chôta dawh 2:50pm ta eima pua. Raovah khih dawh 3:35pm ta tlô pi ta, Azaoh râh eimâ ngia pathao haw. Leika (Lytu) khih dawh4:30pm ta eima tlô. Raovah khihthieh tawhta khih parohpa cha Minute 25 eima sie. Cha tawhta Leika he eima tlôpa a châ.

              Leika he odyh 180 rachhôh châ ei ta, MEC cha dyh 30 ama y.  He khih liata Rev. Khatlo (Vazathapaw) Leika biatuhpa o liata pati nie tua pi ta, dawh 5:25pm ta Hraipi arie awpah ta eimâ thao. Dawh 5:50pm liata Fawta tlô pi ta, 6:25 pm ta Hraipi khih V. Choza puhpa yna su eima tlô. Ama khih he odyh 130 khihsapa ama châ. Khih parohpa lâ odyh 40 y ei ta, Khihthieh lâ odyh 90 ama châ. Puhpa V. Choza puhpa Zahmo (Simaipaw) o thlai pangai pi ta, miah ama vaw uasa kaw, eimâ ly ngaita kaw; eima ngaizy asi pi ta, patizy eima nie.

              Liahsa eimâ mâ tawhta viasa rihchâ penawhzy apakyh pi ta, eima thâtihzy Rezuah pheisaih nah liata miah bao awpah ta chho pi ta, ama pheisaih molaipa pakha Hraipi lâ ama chhôhkha ta avy ta, chavah lâ vaw siepa thâtih nata ama khih Hraipi chyhsa achhipa ta, chavah lia ama y thlâh ha tahpa miah chho ei ta, keimo ta Rezuah lâ kua khao leina dâh miah tluakhei awpah ta eima chho ei. Âmo chhao miah ama buakhei kaw, eima Target Hiakha nata Rezuah cha a hla tlôh ta, kua heih awpah hlâta cha Sangyu lâta sie ta, Siaha angia’pa cha a hnia via syulyu tlôh ta, sie syulyu mawh sih la Rev. Khabi ta a tao aw tahpa chi tlôh pi; eima palôhru ta cha eima bua kaw. Cha hmo chata eima khitlypa hu maniah a pahiehsa lei kaw. Cha hawhna chata my vaw châ ta, ama pheisaih molaipa ta ama khih chyhsa amâ chhipa cha za pa-awsa ei ta, a kaw tlô tlai hra. Eima rairunazy reih pi ta, ano ta, “Palôh pahâh kawpa ta va sie t’u, ei vaw chho khai’ khawh”, miah tah ta, cha tawhta eima palôh pahâh ta, chhôhmoh kawpa ta eima sie laih bâ.

              Ama khih cha a chakua pâ kaw. My ta Puhpa Zahmo ta nâ khiekhei ta, my ta awh miah thiepa ei ta, nie khai tawhta Hnaro ngaipa ta sie pi ta, Puhpa Zahmo nata a sawchapaw, hawtita (15) bike haoh thai kawpa châ ta, ano ta a paw cha a phaoh lymâ. A paw cha chapawsaw kawpa a châ, leipalie by liata nama pavia aw miah a tahpa vâta miah a pathlie. Dawh 8:45 Am ta Hraipi puasai pi ta, dawh 10:30 Am ta Hnaro eima tlô. Lopaky by, Ielo chavah liata Hnaro tlâhrai ahriapazy chhaota eimâ hmô. Hnaro khih cha dawh 10:30 Am liata eima tlô. Hnaro khih cha khih laipa a châ hra. Odyh 500 khih asapa ama châ. Dawphunsung thopi daoh liata a pahâ pi ta, â hlâhlô kaw. Ano ta Laneline zy hnei ta, Hiakha lâ biezy achho pi ta, vâro eimâ pahâ.

              Cha tawhta Puhpa Zahmo cha miah kuasai ta, dawh 11:30 am ta pua pi ta, Awsâ dawh 12:20pm ta eima tlô. Sie lymâ heih pi ta, Tisai ‘A’ cha dawh 12:55 pm ta tlô pi ta, arâ via pi ta, Tisai B dawh 1:2pm ta tlô pi ta, ama khih he khih kha châ tlôh leipa liata cha â hnia kaw. Cha tawhta dawh khophie hlei arâ pi ta, Iabao eima tlô. Iabao he odyh 180 khihsapa châ ei ta, ama khih ngiaryh â chhih kaw. Apahâ leipa ta sie heih pi ta, dawh 3:30pm liata Leita eimâ ngia heih. Leita he odyh 70 khihsapa ama châ. Cha tawhta Minute 20 eimâ râ tawhta Hmytlah odyh 150 khihsana su eima tlô heih. Apahâ leipa ta arâ lymâ heih pi ta, Minute 25 eimâ râ tawhta dawh 4:15pm ta eimâ chhuah chaipa Chauthia cha eima tlô.

              Sabyh liata eimâ pahâ nota Chauthia lôbôpa thâtihzy kha hiahri pi ta, “Apahno chai awpah cha Bawithaipaw”, tahpa miah ama chhopa kha eima palôhru liata eimâ vao thlâh ha. Eima tlô pataw nahta Zophei Baptist Association Office cha ngai pi ta, eima vaw pahno sadupa kha lôbôna su cha Zophei Baptist Association ta Office sa ei ta, alô kha ama phia ha, tahpa ama reipazy eima thei tyhpa vâta nata, khachâ rakha ma a thâtih eima pahnothei nata eima pangiasapa  vâta ama Office cha eima ngai tuapa a châ.

              Ama Office ama sana cha lâpi tawhta bahta a hnai via ta, ama tlyhmia kawh kaw ta, lâpi nata a Level sala cha Office tlyhmia kawh kawpa a châ awpah a châ. Lâpi tawhta ahnai zyly (Slope) ta ama Compound angia pâ pi ta, ama Office tlyhmia eima tlô pâpa a châ. Ama Office mahthi lâ Pastor Quarter-zy cha y ta, General Secretary nata ama Assistant General Secretary zy y ei ta, hmiapie kawpa ta miah amâ vaw ly, eima tha miah ama padâh kaw. Thopizy miah pado ei ta, cha tawhta bielôhawhpa nata eima khyna chhâpazy eima reih. Lôbôpa thâtih eima hiahripa cha vaw pahno rai rai leipa ei ta, pei ama tah kaw. Nohkhih lei kawpa ta â reih ei ta, ama pahno leipa cha thailei amâ pachâsa kaw, Châhrasala âmo cha a y thieh viapa ama châpa vâta he hmo he ama vaw pahno leipa a châ.

              He daihti nota ama G.S cha Rev. Thansui (Hmawngtlang) châ ta, AGS cha Rev. Hremang (Ngalâ) a châ. Âmo ta ama khih moh ama ro dâh cha ‘Congthia’ tah ei ta, Thlâtlâh Township, Chin State liata ypa a châ. Âmo ta ama pahno leina thâh lâ cha, Sabyh liata miah ama chhopa  ‘Bawithai paw’ kha eima palôh liata thlai a vaw lâ ta, âmo hiahri pi ta, “Atahmâno cha apamosa awpah ta Yangoon lâ na a sie ha”, miah tah ei ta, a Phone thei’pah a châ nahta châ lei hiahri pi ta, thlai miah  Phone-pa ei ta, thâtih ama hiahripa cha  he hawhta â kaw chhy: “Alô bôna su cheingei la dy thei leipa nata a su deikua cha he Zyuphei Baptist Office Compound liata na a châ”, tah ta, eimâ ly kaw. Âmo ta, “A pahno awpah Machâ pakha y ta, cha cha duah hiahri heih tua rai ei sih la”, tahpa pahruana tao ei ta, ama khona hawhta kei hiahripa châ heih ta, Bawithaipaw ta â vaw chhyna hawh tlaita ano chhaota â vaw chhy ei.

              Cha hawhta a vaw châ ha nahta cha a siapa ta pahno pi ta, alô hra hmô’pa y khao vâ, eima tao awpah cha R.A. Lorrain ta keimo châta alô miah bôpa ha ta, eima uasa leipa vâta  pahlei pahlôpa vaw châ ha ta, anopa chhao tlai  tlâh miah khôsai ha ta, ano athei thlâh n’awpah ta khâpa chhâ ma eima tao hr’awpah byuh ta, atahmâno ta hmo lai’pi tao thei mâh vei hr’aw sih la ano athei thlâhna lôbô chhâ cha eima tao awpah a byuhpa ta pahno pi ta, cha bô naw’pah su chhâ eima hiah tua awpah a peimawhpa vâta G.S nata AGS  liata hiah pi ta, eikha thlahrai ta tao awpah cha vaw ngiaroh pâ ei ta, “Vaw reipahmaoh via tua ei sih la, a suzy chhao cha vaw hiahri pasia via sih la, pha vei ma?”, miah tah ei ta, keimo ta, “Khâparai châsala keimo châta a khy heih n’awpah ru kaw ta, atahmâ nota bâh miah pasia thlâh ha kaw u la, a su chhochhi cha khei hawhta ma Research tao ngâ hra u la, a Point cheingeipa la dy thei’pah cha tlâ vei, he rachhôh a châ tahpa a  sia thlâh cha maw, bâh paryhsa kaw t’u”, tah pi ta, zua vaw paryhsa ei ta, lôbôna khi tlai miah pie ei ta, a su liata biehrai hlâna nata thlahchhânazy hnei pi ta, nohthlahpa alana chhao eima hnei pâ hra. A su eima kaw tlôpa dei châ leipa ta khachâ rakha ma lôbô n’awpah taihta eima kaw pasia theipa vâta a ly kaw pi ta, GS nata AGS chô lia chhao eimâ ly kaw.

              Marasawzy châta cha Saikao, Pâkao nata Chauthia râhri ngiana lôbôna suzy he su pathaihpa a châ. He su liata kuzy pathla hra ta, eima Missionary Marapa kyhpachâtuhpa athei thlâhna hmo eima tao hr’awpa a pha kaw. Thlahchhâna O lai kawpa nata athei thlâh hana lôbô pha kawpazy tao hr’aw sih la tahpa kho â chhih kaw.  Mylâ hânoh la Saikao, Chauthia nata Pâkao he cha Marapa sawzy ta pasôna châh eima pahno khiahta la Marapa sawzy châta su pathaihpa, Khazohpa hmotaotheina âlâna su a châ thlyu aw tahpa hnabeiseih â chhih.

              Eima tao awpahzy eima tao khai tawhta dawh 5:20pm ta Chauthia cha eima puasai. He su liata dawh kha hlei tlai eima daihti eima hmâh. Arâ lymâ pi ta dawh 5:55pm ta Kuchha eima tlô, cha tawhta a râ lymâ heih pi ta, dawh khophie eimâ râ tawhta dawh 6:25pm liata Thlatlâh tawhta miah vaw dypa pano K/M Chhiemo (Beirahmôpaw) nata Beidao S/O Hyutu Simau zy eimâ tyh. Eima Motor India Nuhby a châpa vâta thlai miah paduasa ei ta, keimo chhao chô pi ta, atlâh biezy reih pi ta, a ly kaw pi ta, eima thlah chhao a lôh kaw bâ. Âmo ta hmia miah sahpa lymâ ei ta, eima tlô chy su miakha daoh liata do awpah chakuapazy maniah lapa ei ta, miah ama pado, eimâ ly kaw. Cha tawhta thlai eima sie lymâ heih. Daw 6:45pm ta Thlatlâh eima tlô, hyutuhpa Simau o liata miah ngaikhei ei ta, cha liata MEC Member-zy ta miah ama vaw ydy, eimâ ly kaw.

              Thlâtlâh khih he odyh 1200 châ ta, eima khy no cha Marasaw odyh 53 y ei ta, MEC dyh 29 ama châ. Thlâtlâh he khahlâ ta eima mahnô mapawzy khih ama vaw sa tuana a châ. Thlâtlâh liata Tlâhlyna chhaota khih vaw sakhoh ei ta, atahmâ taihta Thlâtlâh nahta ‘Marapa thlâ nata khih hmo parohpa’ tah ei ta, hmô theipa ta a y thlâh haw.

              Keimo cha eima zydua ta hyutuhpa o liata tlô pi ta, vâro eima tlôna o liata apakyh pi ta, eima kaw tlyna chhâpazy pahnosa pi ta, amâ ly kaw hra. Amôna rakhô pha ngâsâpa liata maniah paziasa ei ta, mokuhpahâh kawpa ta amô pi ta, my ta eima thyupa cha eima tlâ kaw. Thlâtlâh eima kaw tlô lâlao tawhta cha Hiakha–Beinô hnaw bana kaw hmô ta, a kiahpâh Sôkhaoh khih liata Vakia Museum cha moh lâlao awpah eima khohpa vâta Hiakha tlô’pah eimâ chhuah heih. Eima Motor cha chei lei’pa a phavia thlyu aw tahpa paso-pakâna eima daopa hawhta Bus Ticket la pi ta, Hiakha sie awpah ta eimâ pachhuahpanoh khaipa a châ.

              Zâlâ dawh 1:oo pm ta Bus apua awpah châ ta, dawh 11:00 Am tawhta Bus Station lâ miah ama chhihtha ha. Eima tlôna tawhta phei ta Minute 15 sie a châ aw. Cha liata Ticket-zy liahsa miah ama pasiapanôkhei khai tawhta vâro miah ama hâkhei heih. Bus Station liata eima y thlâh ha nota KNP President ta na aw ta, Bus pua n’awpah o sâkha chhôchâ–ama chôkâ nata Opi likawh liata nâ tyukhei ta, KNP ta Thlâtlâh liata râh ama hneipazy na pahmô ta, a rônah kawpa ta ei pahno. Kha daihti no kha Marapa yna su parohpa nata thlâ suzy a y tahpa ei pahno leipa vâta hiahrina châh vaw pahno leipa na ta, atahmâ ei palôh a y kaw.

              Cha tawhta Bus eima kiapa cha dawh 1:00pm a vaw paro pâ laih ha tlai, Bus liata miah ama khô khai tawhta atlâh bie reih pi ta, eima sie lymâ haw. Sie lymâ pi ta, dawh 2:00pm ta su miakha thopi daohzy chhao y ta, cha liata chô pi ta, thopizy eima doh. A likawh liata ei vaw rei khoh kawpa cha ama Bus he a châ. Bus hropa hawhta â khophie liata chyhsa ahlaihlâ n’awpa ta patly ei ta, chavei nata chachâh liata atyuna 2/3 lymâ ta atyu thei awpah tah ei ta, eima pua khohpa chhaota ahyhmahta patypamâ leipa ta eima puapa kha châ tyh ta, eima kiapa Bus deikua cha a likawh ahlaina chhao kha dyuchhai tawtawpa ahniehna chhaopa tao khai ha ei ta, ama pua khoh khiata cha kha lâpi liata atyuhpa ualua kha thyu khai h’awpa byuh ta, a bua ngâsâpa ta ei pahno. Kha kao liata sôh kha ahneituhpa châta cha i a chhih kaw tlai ta, Passengers deikua ama rie a thei kaw aw. Motor Company ahneituhpa ta ataopa la a châ nahta pangiasa leipa na ta, ahneituhpazy phahnaingiahna vâta a châ thlyu aw. A chhôh liata eimâ paryh thai kaw, su ruapa rai sâkha hmah y vei, â rai thai kaw.

              Thopi eima do khai nahta cha kia khai heih pi ta, dawh 3:00pm ta Beinô hnaw (Timei) eima tlô. Chhunchung tah ei ta, za loh lymâ ta, Thahao vah nahta â tyhna Phaite (Ngiaphiata) nata Hraipi likawh tawhna heta ‘Beinô’ tahpa ta ama vaw bipa a châ. Cha su cha keimo châta hmo peimawh kawpa a châpa vâta nothlahpazy la khoh pi ta, Bus paduasa ta, apahâsa awpah eima ngiaroh kaw, anodeikua eima khô thlâh ha awpah kha châ thai va, eima hmia pakawh pi ta, Driver hiah pi ta, eima kialâh penawh chhao Research ataopa eima châna miah pahnothai kaw ei ta, buakha aduah pi ta, nothlahpazy la pi ta, Minute 5 rachhôh eima ryu ma tahpa a châ aw. Cha su tawhta Hiakha cha Minutes 30 eimâ râ.

              He Beinô hnaw he by kawh kawpa châ ta, a ti chhao a chyh kaw. Akaopa a châpa vâta eimâ râ n’awpah hleidy dao ei ta, ti la a chyh kaw. Ei mothlaw ta Kaochao nata âtyhnazy za hmô na ta, eima kaw yna suzy ei no a âh kaw. Khazohpa ta eina chhihtha laihna dâh ei pachâ nahta la a rônah ei tah kaw.

              Dawh 3:30pm ta Hiakha tlô pi ta, Bus Stand sukha liata MEC Awnano nôpaw thokhazy ta miah vaw dy ei ta, Rev. Khaibie, ama Nurse Quarter liata KNP President (Dawhnie nô) nata a viasa nahzy ta thopi nata âhmie pahâh kawpa miah amâ chhuahnohpa. Eimâ ly kaw. Â ryhpaohna hawhta tlôna, arie n’awpahzy miah taopa ei ta, a nie deikua Restaurant liata miah ama niekhei.

              Azo ta pakhyna miah pachhuahpanohpa ei ta, daihti chhao Rev. NC. Vabeilua nata miah ama taopa rairie. Eima vaw bâ tawhta eima tlôna o lâ nôpaw thokha miah vaw zi ei ta, a mylâ ta eimâ tyudua n’awpah dâh ryu miah ama reikhei. He liata Puhpa Vacho chhao â vaw hlao hra. Ano he keimo ta State Member cha MLA eima tahpa hawhpa kha châ ta, âmo lâ deikua cha State MP nata Central MP ta pachhaih ei ta, ano cha MLA eima tahpa hawhpa State MP a châ. Bielôhawpazy reihpa ta, apakyh pi ta, vâro eimâ pakyh tawhta âmo a di ei ta, keimo chhao eimâ mô ha hra. A mylâpa ta Puhpa Vacho, MP nata MEC nôpawpa nata Rev. Zakhaw, Baptist-zy ta Hiakha su peimawhpa Missionary nah thlâ zy, ama Tlyliah zy, CACC, CCC nata Acape Church, Rev. Zakhaw ta Awnanopa amohôhpa Baptist Achhyna o zy miah tlykhei ei ta, eimâ ly kaw. A chhâna liata Rev. Zakhaw nah o liata thopizy eima doh pâ.

              He su peimawhpa eima mopa hry liata ei palôh nâ hria chaipa cha, Chin liata Missionary hmia tuachaipa A.E. Carson thlâ zy, Tidim Missionary JH. Cope nata Chester U. Strait, Hiakha Missionary zy thlâ nata ama nohthlapa taihta ei hmôpa cha Pâkao eina vaw patheisa kaw. Eima Missionary nahta râhri kyh liata amâ pabuapa moh nata thâtih ngâlâh thei tyh pi ta, a chhâna liata ama nothlahpa nata ama thlâ lôbôpa taihta ei kaw hmôpa cha ei palôh a tlâh kaw.

 

 

 

 

 

LAIHSA NAHTA

AMA PAHNEISAPA

SYUKI PHÔHPA

~ M. Nyusô

( He phôhpa he Pihnô M. Nyusô châbu, “Nôpaw ryusôh Mara phôhpa” tahpa tawhta lapachhuahpa a châ. Ed)

 

              Zâkhano he khih miakha liana heta nôvah baokha he y ei ta. Sawchanô hmipha ngâsâpa he hnei ei ta. Ama khih liata satlia nah chata hmipha tahpa ta khoh kaw sai ei ta. Chatanachata satlia nah chata zâ chareihta laihsanô cha charei tyh ei ta. Satliapa hry liata pakha nah chata laihsanô cha kyh a pachâ kaw ei ta. Satliapa cha lyu lâ tawhta a vaw tlô pataw nahta tizy a si para, ta pati a nie khai pataw nahta laihsanô hmia hmô awpah a ngiahtiah leipa ta thlai va charei tyh ta.

              Cha nona chata, khichhai satlia hmipha kawpa nata pôhraoh atlaitlâ kawpa pakha he vaw charei tyh hra ta, cha satliapa cha syukipa he vaw châ ta. Laihsapa nô chata pahno tiarâh leipa ta, a sawchanô hnohna chata, “Khichhai satliapa kha a hmipha ta, a pôhraoh hra â tlaitlâ bailai, nahva awpah ta ei cha khokhei. Eima khih satlia kha la hârapa tlâ châ ta, cha khokhei va na”, tahpa ta chho tyh ta. Châhrasala, laihsapa chata ama khih satliapa kha kyh pachâ ngâsâ ha tlôh ta. A vaw chareina daihti liata laihsapa nô ta a sawchanô hnoh chata, “A mô bâ tyh, zâ a rei ha bâ hih”, a tah tyhpa cha a no za ngâsâ thlâh ha tyh ta. Charei lei awpah ta a laihsanô ta, “Vaw charei cheingei mah y, ei cha vaw mokhâh aw”, a tah ha tyhpa vâta, lyu lâ tawhta a vaw tlô pataw nahta a ngai zy asi ta pati a nie khai nahta vaw charei heih ta. Chatanachata Syuki satliapa chhao cha vaw charei hra ta. Khichhôh satliapa cha a di patoh via ha ta. Khihchhôh satlia â di pataw nah chata Syukipa chata, “Ei pihnô y, na sawchanô he khoh tu ha na ta, ngiachhiepa ta na pie thlâh ha teh”, tahpa ta hiah ta. Chatanachata a laihsapa nô chata chyh-eih (paryhsa) ha ta.

              A mylâ hânohpa ta ahnei awpah chata pathlu ha ei ta. Chatanachata amâ hnei n’awpah noh cha vaw tlô ha ta. A khopa paw (khihchhôh satlia) cha a palôh a lie ngaita ta, amâ hnei noh cha lyu lâ sie syulyu ha ta. Laihsanô nata Syukipa cha a hnei ha ei ta, a mylâpa cha Syukipa nah khih lâ cha sie ha ei ta. Syukipa chata a lahpinô cha dao ngâsâ ta, lyu lâzy siepa ta a rie tyh ei ta. A lahpinô hnoh chata, “Nâma la Chapu liana  heta vaw y la, beihzy tlâ vaw chhoh mah y”, a tah tyhpa vâta a lahpinô cha chapu liata tlâ ypa ta, beihzy chhoh ta tizy thaih tyh ta.

              Nohkha cha a vahpa chata Sakhih hrohpa he thie ta, noh hro cha lyupâh liata a hmaozy phie ahru khai ha tyh ta, cha noh deikua a hru’pa my ha ta. Zâlâ â vaw dipa cha a hmaozy saih hôlô thlâh ha ta, a lahpinô chata vaw hmô ha ta. ‘E, ei vahpa he Syukipa a châpa he, kheihta ma ei tao rai vâ i?’ tahpa ta chi kawna chôta pachâ ta. Hetana heta tao sala a pha ngyu aw tahpa pachâna chôta ama paw hnoh chata, “Eima paw, atazâ dia ma ei chhôh tlai a pasa kaw, O lâ sie sala a pha thlyu aw”, tah ta. Ama paw chata, “Cha kaw chhitha sa y”, a tahpa cha ama nô chata, “Lyu thlyu he ahrâ tlôh ta, Li na pazaopa la, keima deita tlâ sie lahvâ na”, tah ha ta.

              Chatanachata, ama paw ta Li zy pazaopa ta, ama nô cha khih lâ sie ha ta. Lâpi liata Li sâkha he chôh ta, poh ta khu ta sie lymâ ha ta. Thokôpa miakha liata Li he chôh heih ta, a hnorâh ta khu ta, siesai ha heih ta. Khih tlô chy liata Li sâkha chôh heih ta, khih cha va tlô ha ta.

              Chatanachata, Syukipa cha beih chho n’awpah ti hmâ awpah a y khao leipa vâta ti thaih awpah ta tikhaoh lâ cha ti thai awpah ta zu ta. Tikhaoh a za tlô tawhta, “Eima nô he eikha hmahta he hawhta y beih leipa ta, atazâ ei chhôh na a pasa a tah thlâhpa he dia ma..”, tahpa pachâna chôta ti liana chata a hmia cha za moh ta, a hmia a za mopa cha Sakhih thisaih sai he vaw y thlâh ha ta, “He vâ tlai he a châ he maw! A chadai sala ei thie ha tua aw. Eina pahno ha tawhta cha na khoh khao tlôh leip’aw ta”, tah ta, a chadai lymâ ha ta. Lâpi sukha liata Li a chôpa kha va hmô ta, a lahpinô a y khia ma tahpa ta, “Nâma tlai he ma na dôvei chi”, tah ta a kei zawthlu ta, a py liata Li chata vaw chhô ta. Hiehâh kawpa ta li cha phia ta, pasa tah kawna chôta a chadai hnolo lymâ heih ta. Thokôpa liata poh a paraipa cha va hmô heih ta, “Khi liana khi a y cheingei aw”, tahpa ta kaw kiahnao heih ta, â kei zawthlupa cha ama nô cha vaw y heih tlôh leipa ta, li chata vaw chhôh ha heih ta. Ama nô cha riethei kawna chôta a kaw chadai hnolo lymâ heih ta.

              Khih tlô chy liana cha kaw pha daihmâ ha ta, a lahpinô cha a para kawpa ta a râ lymâ hra ta, khih cha a kaw ngia hmâ ha ta. “Satlia saih, na pachha u la, eina kaw pha daihmâ ha na”, tahpa ta awh ta. Chatanachata, satlia a y chhôhpa zydua cha vaw puapakhy ei ta, opâh lâ cha zu ei ta. Syukipa cha opâh liata a lahpinô ta li a chôpa poh paraipa cha a vaw zawhnao heihpa ta, li ta a chhôpa vâta a thyu chhao vaw thyu thei khao leipa ta â byu thlâh hapa cha za hmô ei ta. Satlia nah chata, “Nâma tlai he ma eima khih laihsa vaw dôvei chi”, tah ei ta, phy khy phy khy ei ta, a su liana chata ama thie pâ lâlao haw. Chatanachata, laihsapa cha palôh pahâh kawpa ta a y ha bâ hra.

 

 

 

 

Mara reih rozie dopa

 

 

 

 

 

Kô (m)               : Isah kô a châ (noun)

Kô (r)                 : Kô 100 a châ (noun)

Kôh(d)               : Kôh ta a rô  (noun)

 

Ku (m)               : Ku a ôpa ta a sie (noun)

Ku (r)                 : A ku ta a chabaih (noun)

Kuh (d)              : Kuh chhôh liata a y (noun)

 

La (m)                : A la khoh vei (verb)

La (r)                  : Châbu va la teh (verb)

Lah (d)                            : Lahpinô ei hnei (noun)

 

Lâ (m)                : Saikao lâ a sie (pose)

Lâ (r)                  : Awhsi a lâ vei  (verb)

Lâh(d)                : Ama lâh ngâ kaw (Verb)

                            

Ly (m)                : Ei doh eina ly haw

Ly (r)                  : Ei ly kaw (verb)

Lyh(d)               : Â lyh thai kaw (verb)

 

Lo (m)               : Theilâpa a lo haw (verb)

Lo (r)                  : Noh a lo kaw (adj)

Loh (d)              : Bia ama loh (Verb)

 

 

 

 

 

 

 

Marasaw Thatlôpa

KHIMY CHOZAH

 

~ Dr. S. Hrachu ‘L’

 

Khimy Chozah he Chhaolô beipa Bisâ Chozah sawchapaw châ ta, kô 1909 liata pih ta, târi noh 1, Nawh, 1991 liata N. Siaha liata a thi haw.

A thatlôzie : Serkawn, Lôlei liata Siku a kia nota alô bô awpah satlia 6 ta amâ chatôhkhei ngâpa cha, 'Khah he kei tuasâ' tah ta a laihtôh liata apu lymâ ta a tlôkhei syulyu thlâh ha. Cha rakha tawhta cha ama chi kaw sai.

Aizawl nata Lôlei likah liata anodeita a sie nota satlia thatlôpa 'Keima' â tahpa pa 5 ta abaopasu awpah ta a vaw byhkhâh ei ta. Lâpi dohkâh lâ tawhta ama zydua ta â paraohpa ta zâ zawhnao ei ta, ama 5- ta laikathi lâ a pazaw khai ha ei. Ama ngâh khao leipa vâta amâ râsai khai haw.

Lôzuachô liata kyhchhi sa pasyuhna, beih kha 10-pa, bietalipa, ahyhmah ta chalo awpah amâ ngâ leipa cha tlyhmia tawhta laikah lâ a khaih syulyu haw. A khihpi ta no-âh tahpa ta ama mokhâh thlâh ha.

Adyuhpi einona nota Tipâ liata CI ta soh ei ta. A tunô nô beih a chhopa awpah ta â sopâ ta. Cha a tunô nô cha pheisaih pathôh ta hnabeiseihpa ta vaw charei ei ta, Khimy cha khôtho lâ pua chy awpah ta chho ei ta. A khoh leipa vâta khôtho lâ papua raruah achhuahpa ta abaopasu ei ta, ano ta ama pathôh ta khôtho lâ tlao a chati papua khai ha ei. Ama meithei tlai 3, amâ râsaipa cha chabapa ta ama Quarter Guard lâ cha khykhei ta ama hyutuhpa lâ kaw report ta, ama hyutuhpa chata hâta eikha chhôh a hrie ei.

A nawhta Iahmô Chhaolô beipa lahpinô châta Lytaih beipa Lalhluna Sietanô Sungchi ama pakia nota Khimy Châpia/Wrestling/ pahao khopa vâta Lytai, Tlaopi, Lôtia, Vyhbu thatlôpa zydua tlô pakhy ei ta. Chhaolô beipa tlyhmia liata Khimy cha pahaopa ta apia ei ta, buakha chhôh dâhdei chhao amâ tlieh hlâta ama zydua ta pakha pakha ta a tai khai ha ei. Cha hawhta thatlô tlôpakhypazy hry tawhta pakha hmahta ama tai thei leipa vâta, 'Khimy he a thatlô tlai na' tahpa ta ama khih lâ ama siesai khai haw ama ta.

 

 

 

 

No.MADC.1/EDN/M&P/2019

MARA AUTONOMOUS DISTRICT COUNCIL

SCHOOL EDUCATION DEPARTMENT

 

Siaha, the 23^rd March, 2020

 

 

NOTIFICATION

 

 

              Executive Committee, Mara Autonomous District Council ta a paryhsapa hawhta târi 01 . 04 . 2020 noh ta Mara Autonomous District Council ry liata Middle School nata Primary Schoolzy admission pahypa ta School pathao awpah ta order pua chiehpa kha phiepa châ ta Covid-19 hri tawhta eimâ boh thei n’awpah ta School pathao mâh lei awpah nata Admission chhao pahy mâh lei awpah a châ aw.

 

              School kiah pathao n’awpah daihti cha he tawhta eimâ pahnosa heih aw.

 

 

 

( K. VANLALLIANA )

Senior Education Officer

Mara Autonomous District Council

Siaha

 

 

 

 

 

MARA LÂ NATA HMISÂ

CHIHROPAZY HRY LIATA

PHUAHZÂHNA HMIATUAPA

 

~ TA. Chhôhu

 

( He Châpaw (Article) he Puhpa TA. Chhôhu châbu, “Eima vaw pahno hra awpah ta” tahpa tawhta lapachhuahpa a châ. Ed)

 

Nohthlahpa he âryhpaohpa hmâpa a châ.

 

 

              Marapazy ta Regional Council ama hmôna kô 1951 tawh heta India Sawhkhâ nata Assam State Sawhkhâ liata biehneituhpazy ta Marapa chi he kheihawhpa hmisâ aphaohpa ma ama châ tahpa nata ama mahnô-mahpaw no daihti liata ama hmo tao dâh, tobi dâhzy hmô byuhna vaw hnei pathao ei ta, he daihti tawhna heta Marapa Lâ mohpathâhpa nata angia ngâsapa SAWLAKIA cha chi hropa hmiakô liata pamosana daihti ama vaw hnei pathao ha hra.

              Kô 1953 liata India Prime Minister hmiatua chaipa Jawaharlal Nehru ta Assam State kaw tly ta, he nota Mawrâh chho chhâna lâta apahrâpa Lakher nata Pawi chyhsa hmia hmô’pah a byuhnazie reih ta, he a biereipa achadai pazipa ta Puhpa SN. Barkataki, ICS, Superintendent of Lushai Hills ta Lakher chyhsa nata Pawi chyhsa tuah awpah ta ryhraohna a vaw hnei. Lakher vyuhpa ta Puhpa A. Saimaw nata Pawi vyuhpa ta Lôtia beipa Puhpa Thangkunga cha atlypa nata tuapa ama châ. Shillong taihta chhihtha awpah ta Puhpa C. Zochhuma, Lôlei, SDO Office liata Clerk rai hria ngâhaipa  nata a hnôh lâta Chief  Executive Member, Pawi-Lakher Regional Council, hmiatua chaipa vaw châ hapa cha  raopa a châ hra.

              Regional Council ryureina liata amâ vaw hlaona kô 1953 tawhta Pawi (Lai) nah cha Lakher nahzy hyutuhpa hawhta ama vaw châ pathao haw.

 

KÔ 1954 INDIA REPUBLIC DAY LIATA MARASAW AHLAO TUANA NATA LÂ (SAWLÂKIA) PAMOSA TUA CHAINA

 

Chi nata pho lâ pamosa awpah ta he kô he Lushai Hills District tawhta he hawhta atlypa ama châ. Tlaikaopa tawhta chyhsa 17 (pahrawh hleisari), Lakher tawhta chyhsa 4 (papalih) nata Pawi chyhsa tawhta chyhsa 1 (pakha) ama châ.

 

              Lakher pho tawhta asiepazy cha -      

              1) A.Saimaw, Saikao

              2) Tluachhô, Laki.

              Chanô lâta                                    

              1) Laihsa Ngôchi

              2) Laihsa Seichi, Saikao zy ama châ.

 

              Pawi pho tawhta Laihsa Thangliani, Lôlei Rahsivaih a châ. Âmo achhihtha awpah ta Puhpa Lalhmuaka, Headmaster, Govt. High School raopa a châ.

              He liata sie penawh ta Lâ ama pamosa awpah he Lakher nahta SAWLÂKIA châ ta, Tlaikao nahta KHUALLÂM a châ (Tlaikao nata ama lâ pha chaipa hawhta ama pachâpa Cherawkân cha a lâ pha mâh vei).

              Sawlâkia lâh awpah ta Lakher 4 (papalih) ngâlâh ama châpa vâta Tlaikao nah tawhta 5 (papangawh) amâ hlao chhi, chazy cha:-

1)           Pu Lalhmuaka

2)          Pu J.Buana

3)          Pu Dura Sawchanônô

4)          Pu Sumleta Sawchanônô nata

5)          Serkawn M.E School Headmaster zy ama châ.

 

Ama sie hlâta Lôlei su liata Sawlâkia nata Khuallâm he achu rairie ei ta, a chhâpa cha maluh chyhpata ama châ vâta ama thai veichâh awpah nata ama lâ thei khai awpah a byuh (Pu Dura Sawchanônô, Pu Sumleta Sawchanônô nata Serkawn M.E School Headmaster-zy moh he ropapua thei leipa châ ta, a pei kaw). Lâna liata hmâ awpah ta chhaichhi amâ phaopazy cha:

 

1) Kaliah Meithei

2) Dawhkhoh kha 8 (Charie) pa

3) Chiahmie 

4) Khoh tawtawpazy amâ phao.

 

Mara pho lâ pamosa awpah ta ama siena dâh chhao he riethei â chhih kaw nahta pangiasapa a châ. Lôlei tawhta Motor kia ngiaryh achhih lei kawpa, One Tonner nata Jeep ta Silchar taih, Silchar tawhta Rel (Train) ta Calcutta ngai tuapa ta, New Delhi ama tlô heih. Lôlei nata New Delhi likawh he no 7 (sari) lâsie ta ama hmâh. Phusâ nie n’awpah nata hmâ awpah ama piepa chhao Silchar taihta adaih awpah ta Rs 150/- (Tlaw zakha nata sypangawh) ngâlâh a châ.

Hiakha lâta ama vâhnei kawna cha New Delhi liata ama y no (châh chhôh) heta President O Rastrapati Bhavan zy pamosa ei ta, a O chhôhzy chahryhkhei ei ta, thopizy ama vaw padosa. Ama poh-o (Tent) liata ama y nota chyhsa peimawhpazy ta tly (ahmô) ei ta, atlytuh penawh hry liata Prime Minister Jawaharlal Nehru nata a sawchanô Indhira Gandhi-zy amâ hlao hra.

He daihti liata Marasawzy ta India Republic Day ama hmia pahnona heta daihti vaw sie lymâpa liata Sawlâkia pamosa awpah ta ryhpaohna Marasaw châta a tao lymâpa ta â lâ. A ei 2-na liata A. Saimaw nata Saikao satlia-laihsa thokha nata Zyhno khih satlia-laihsa tawhta Delhi Republic Day he amâ hlao heih. He khô lâta Mara satlia-laihsa Siaha khih tawhta Sawlâkia pamosa awpah ta â ryhpaohna dâh hawhta ama sie lymâ. Sawlakia pamosa awpah ta cha lâ hneituhpa Marapa ngâlâh he hrua lymâ tyhpa ama châpa ta â lâ.

 

 

Source: Board of Mara Literature, MADC, Siaha.