KFC Restaurant Chanmari Aizawl Address with contact numbers

 Machâ S. Hrachu

Chhaolô

Kei he 15.5.1933 liata ei nô  N. Nôkua nata ei paw S.Keichhyu ta uhthei chaipa châ awpa ta Chhaolô khih liata ama sapa châ na ta. Ei nô ei paw dyhchhiepa ama châpa vâta Middle Siku taih ngalâh ei chu theipa a châ. Kô 1952 liata class V1 (Five) passed na ta, 1953 tawhta 1995 taih Primary Pachutuhpa rai ei hria. Ei vaw Pension tawhta Mara Autonomous District Council ta Mara reih Achuna bu a tao awpa nata Proof Reader awpa ta na hrua ta tahmâ chhao he ei hria hai no a châ.

Ei lyna chhâpa: Kô 1978 nopi noh ta râh a khieh laih na ta, Lôpanô chô liata ei tyu thlâh ha nota ei luhchô thokôpa liata Beitlychaokawhpa pavaw he sâh ngâ kaw ta. Cha pavaw sâpa tlai cha nohhro ta ei/thei tyhpa châ hrasala cha noh liata ei theipa cha ei palôh liata bie a reipa ta pahno na ta. Pakhâta ta raihchaih nahthlie na ta, a chhâna lâta cha ei palôrupa liata he hawhna heta â vaw lâ.

“Beitlychaokawh” tahpa ta a sâpa cha, ‘m r m d’ tahpa ta a sâpa ta thei na ta. Chatawhta ei palôh liata a vaw lâ pazao heihpa cha, “Mara reih he ‘d’ aony hlâta a nai viapa y khao leipa ta,’m’ ao hlâta a sâh viapa y khao hra leipa ta, Marapa reih he ‘d r m’ liata aki khai ta; chavâta â nai chaipa ‘d’ level (akhopa) lia maih ta ‘h’ bai u la, a sia aw. Sentence ahnykhaw leipa ta pahno a nao hra aw.

Tawhla pakah âpa ta ‘â’ reipa maih liata ‘â’ luhkhûpa hmâpa ta Mara reih ro dâh liata a sia khai aw, tahpa ta a vaw lâ ta. Aly chaihmâh na ta a hro lâ akhieh awpa chhao pachâ khao leipa nata, khih lâ thlai kua na ta, O ei tlôpata nahta Ballpen nata roleipa thlai paza na ta thapawh kawpa ta roh na ta vaw su kaw ta Khazohpa ta ei na pahnosapa ta pachâ na ta.

Chatawhcha Mara Literature Board liata angiakhei awpa angiahtiah lei kawpa ta hâ thlâh ha na ta. Ei hâpa hawh chata Literature Board Commmittee maniah aw ei ta. Chatawhcha ei ro chiehpa cha Puhpa C.Dawthe, Khôpai P/S Teacher chhao Board Member a châpa vâta pahmô na ta, aly kaw hra ta. Keima ta, “Nâ he riahpha viapa na châpa vâta aduakhei la ei cha vaw bao lymâ aw” tah na ta, ano ta aduakhei ta kei chhaota aduakhei lymâ na ta, Edn. E.M. Puhpa K.Paichhô ta khoh leipa ta, Vote maniah palasa ta akhohpa vote a hluh via hapa vâta apypa châ ha ta ei ly hmeihseih.

Chatawhta cha hriapazao lymâpa châ ha bâ ta Puhpa S.Vadyu CEM a châ nota 7.8.1987 noh ta pa i nawpa ta mietôhpa thie pâ ta a Quarter liata Board nawh zydua ta patidôhkhohna maniah taopa pâ ta, cha tawh châta Achuna text bu liata hmâpa châ bâ ta, ECM lâ ta chhao Hlabu nata Biehrai liata hmâpa a châ khai ha hra. He hawhta pahnosana ei daopa he Tisôpi khih liata Primary Head Teacher ei châ nota châ ta, ei hmôna (ei daona) su cha Baihkiapa lôkâh nata Tisôpi khih luhchô Meiraona byuh likawh liata sâpôhpa liata a châ. A kô cha 1978 kô châ ta, a tarih noh dei Diary bu a lei hapa vâta pahno khao va na!

IE: Ie, tahpa he MADC ta Siku avao awpa pasaina Mizoram Sawhkhâ tawhta a hmô tawhta Education Officer tua chaipa cha Puhpa K.Laihei B.A. chô ta. Ano chata Mara reih ta Siku eima padua ha awpa vata ‘Mara Alphabet nama kho dâh hawh chyu ta vaw tao khai tua muh vy’ tahpa ta Circular papua ta. Cha liata ‘ie’ he thyu (roh) na ta. Noh hro via ta Puhpa K.Laihei ta ” ‘ie’ na vaw taopa he pha tah kaw hra na ta, Teachers Conference Indoor liata eima hnei awpa liana heta eimâ duakhei sy” na tah ta, aduakhei tlai pi ta passed pa a châ ha hra.

Ei hrialâhpa thokha (Teachers) zy chhochhi cha ” Nâ pathaisa tu haw” tahpa ta nâ thla ngâpa chhao ama y. Chyhsa hropa a vaw pangia hrapa ama y nata y lei deikua la pahno tlai va na. Puhpa K. Laihei hra maniah hrolâh khao tlôh leipa ta.