Puhpa Beirahmô Syhly, EM (Sports) ta Cement Mistiri Training Programme pahy

PRESS RELEASE

No.129/2020

SIAHA, 16 Thlarâh, 2020 – Atanoh my dawh 11:300 Am pa ta Sports & Youth Department, MADC Siaha  hmahlana peimawh kawpa “Cement Mistiri Training” cha Vocational Skill Development Center, New Colony - IV, Siaha liata Puhpa Beirahmô Syhly, EM (Sports), MADC zachhihpa ta pahyna a hnei. 

He Vocational Skill Development Center (Vocational School of Education) he November 04, 2015 nohta Ministry of Labour and Employment, Government of India ry liata registration vaw tao hapa a châ.

Puhpa Beirahmô Syhly, EM (Sports) zachhihpa ta biereina chyupa hnei ta, atanoh Programme peimawh kawpa liata Chief Guest (Khichhai laipa) châ awpa ta hruapa a châpa cha â ly zie reih ta, daihti pha kawpa a pietuhpa Khazohpa hnohta nata tovyuh saiheituhpa Vocational Skill Development Center, Siaha liata hrialâhpazy hnohta alynabie a reih. Puhpa JH.Beihnai, S&YO cha Guest of Honour (Khichhai zachhihpa) ta raopa a châ. Chief Guest (Khichhai laipa) bierei peimawh viapa thokhazy ary liata palâsapa a châ:-

Cement Mistiri leipa ta cha eima rah hmahsiena tlô thei leipa ta, cha hmahsiena lâpi keih chakâ awpa ta Cement Mistiri training he eima peimawh ngaitapa a châ.

Atanoh ta he Cement Mistiri training hnei thei awpa ta hmahlatuhpa Satlia Thatha Khaimeichhô, Principal VSE nata Puhpa JH. Beihnai, Sports & Youth Officer ta idea na vaw pie ei ta, he training programme pahy thei awpa ta a vaw ypa he ama chô lâ liata alynabie ei reih hmeiseih.

Khizaw liata eima y chhôhta eima peimawhpa cha Phusâ châ ta, hnatlâna cha Khazohpa tawhta eima daopa châ ta, khihsana liata eima peimawhpa Phusâ patohpatia n'awpa châtaty thata achu pi ta, Thokha ta Officer châ awpazy achhuah ei ta, thokha ta Politician châ awpa, Politician cha ama vaw tloh khao lei daihti liata biehneina Power hnei khao v'ei. Chahawh pyly ta Officer nah chhao ama retire (Pension) nata biehneina (Power) hnei khao hra v'ei. Mistiri thaina a hneipa cha Pension y thai leipa ta, ama thi hlâ lei ama thaina kha lei thai khao vei. Ama thi daihti kha ama pension daihti a châ.

Eima pahâna line a lyu khai hapa châ sala, eima zydua ta châ ngâlâh achu hapa châ ei sala cha, Mistiri y tlâ khao leip'aw ei ta, eima O miahsapatuh awpa y khao leip'aw ei ta, eima nie awpa Lyu taotuhpa chhao y khao leip'aw  ei ta, eima khihsana a bua khai ha aw. Chavâta, Mistiri thai kawpa eima y'pa byuh ta, Lyu tao pahâhpa chhao nata talent nano nanopa eima hnei awpa he hmahsiena châta eima peimawh ngaita.

Sawhkhâ rai ngâlâh ta cha miah akhi thai'pa châ khao leipa ta, Mawrâh liata chhao Fourth Grade Peon rai pahy ei ta, a vaw hiahtuhpazy MA nata BA via sai rô ama châ. Châthaina peimawh vei tahna châ leipa ta, châthaina cha a peimawh kaw. Anodeikua nietluana liata hmahsie lymâ awpa heta Talent nano nanopa Khazohpa ta miah a piepa he eima line chyu eima pahno thai via lymâ awpa a peimawh hmeiseih.  

O sa awpa ta Engineer nata Architech zy ta a nothlah draw ei ta, Mistiri a thaipa ta a nothlah ama draw pa amopâpa ta O ama sa. A pachaipa ta eima râh liata Mistiri O satuhpa zy cha Viahnah sai ama châ. Mistiri training na liata pha kawpa ta training ta eima thai hra awpa he a peimawh. Keimo Mara sawzy pi ta Cement Mistiri thai kawpa eima pua hluh lymâ khiahta cha Viahnah O pasasa khao leip'aw pi ta, a chhâ chhâna lâ cha Viahnah cha ama râh lâ amâ lie khai thlâh ha bâ aw. Mara sawzy pi ta Cement Mistiri eima thai hra awpa he a peimawhnazie pahno pi ta, chavâta he Training-na he eima pachhuahpanoh hra e tahpa kha nama pahno awpa a peimawh. 

Cha hnaihta Engineer nata Architrech zy ta O nothlah ama draw pa mopa ta O eima sa thai awpa a peimawh. A practical thai pâ, a theory thai pâ tahpa eimâ chhuah awpa a peimawh. O a sapa ama hluh kaw hnaihta a châh ta cha Cement hmahta chalei'pa y tyh vei, cha yzie cha Cement rai eima râh liata a hluh kaw tahna a châ. Cha Cement rai cha ahyzy ta maw hria tyh ei, eima tah khiahta cha Viahnahsai ama châ. Eima râh liata Phusâ hluh via cha Viahnah ta ama la khai haw tahna a châ. Chavâta Cement Mistiri rai he eima kaw thai lymâ awpa a byuh. 

Head Mistiri zy he atahmâ cha ama nohkha rate he Rs.1000 (Sâkha) rachhôh châ ta, ama hriapa y lilâ vei, a taotia dâh n'awpa rakha chho ei ta, ama rai a chyh kaw. Marasaw Cement Mistiri a thaipa eima hluh khiahta cha eima râh hmahsiena a y lymâ aw. Marasaw ta Cement Mistiri pakha a thaipa nama y khiahta cha mo hropa athai leipa pakhazie ma ei pathaisa thei hra tapa he eimâ chhuah chyu awpa a byuh. Cha hnaihta Thlathôh (3 Months) chhôh nama training awpa lia heta tiama papua u la, thai cheingei achhuah ta, Certificate la thei cheingei namâ chhuah chyu awpa a byuh. Nama vaw thai ti chhaota eima râh nôpawpazy ta vaw pahno hra ei sala, chi hro pho hro Cement Mistiri a thaipa hlâ ta keimo lâsaw Cement Mistiri a thaipa kha eima khokhei via lymâ awpa a peimawh ngaita. A chhâ chaina liata cha he Cement Mistiri training he eima râh châta hmahsiena peimawh kawpa na a châ e tahpa eima pahno chyu awpa a peimawh. Ei châ ly kaw ei.

Puhpa JH.Beihnai, S&YO, Guest of Honour (Khichhai zachhihpa) chhaota biereina hnei hra ta, eima râh Mara râh ta Cement Mistiri eima peimawhzie chhao a reih hra. Atanoh daihti liata eima thyutlia nahzy khâpahmah tao leipa ta paripangapa ta y ei ta, a daihti lei kawpa liata ama hronazy ama vaw pahlei pahlao thlâh ha tyhpa he palôhpasa â chhih ngâsâ. He training na liata â vypazy paripangana liata nama y ei tahna châ leipa ta, nama viasazy ama thatlô daihti satlia daihti liata khâpahmah tao leipa ta a y thlâh hapazy Cement Mistiri pathaisa namâ chhuah lymâ hra awpa he a peimawh ngaita. Mara sawzy Cement Mistiri athaipa eima vaw hluh lymâ khiahta cha Viahnah peimawh khao' ma pi. Pua la tah ngâ kaw byuh leipa ta Cement Mistiri rai eima thai khai hapa a châ khiahta cha eima râh ama puasai lymâ thlâh ha aw. Viahnah hlâta eima lathli pha via ta, eima thatlô via ta, palôh hmeiseih piepa ta eimâ training khiahta cha Viahnah hlâta eima thai via aw. Viahnah chhao he Helper hawhta kaw y laih ei ta, tiama ei ta, Cement Mistiri athaipa ama kaw châ laih hra. Cha hnaihta eima Puhpa Beirahmô Syhly) Sports EM a châ chhôh heta Marasaw Cement Mistiri a chyh chai ta zakha (100) chhâ papua awpa he eimâ chhuah. Cha hnaihta palôh hnei kawpa nata tiama kawpa ta training u la,  Cement Mistiri pha kawpa nama kaw pua awpa he eima khoh kawpa a châ. Cement Mistiri hleikhô ta Steel Fabrication lâ chhao he keimo Sports Department, MADC tawhta training pachhuahpanoh via lymâ eimâ chhuah.  

He training programme lia heta Miss ST. Lalnuntluangi ta chair la ta, Satlia Thatha Khaimeichhô, Principal, VSE ta Vote of Thanks reina hnei ta, daihti pachhâsapa a châ.

ISSUED BY:-

Information & Public Relations Department

Mara Autonomous District Council

Siaha.