Machâ L.Chatô Sermon 7 - CHHÔHKHA HE CHI NATA PHO A VAW THAO NA PEIMAW CHAIPA A CHA

Sermon 7

CHHÔHKHA HE CHI NATA PHO A VAW THAO NA PEIMAW CHAIPA A CHA (Gen. 18:18-19)
                                                                                                       - Machâ L.Chatô, Iana

Eima Khizaw pahrana lia heta eima chyhsa châna pathipalôh hro y zie he zasai tua sila hlaotlohna nata hlaotloh leina, palôrupa rietheina nata thaphana nôpona nata alyna zydua avaw thaona thaby chaipa cha chhôhkha tawh heta a cha khai tahpa cha a sia. Chhôhkha hro paryh pasu nata pasu leina heta y zie ahnei pathu ngaitapa a cha.
            Abaraha cha, phopi rônapa nata hmotao thei ngaitapa a vaw cha tlai bao naita ano liana chata Khizaw liata phopito ama huhie pata y tlô awh eita, ABeipa lâpi ama chhih theina awpata ahnôlâta a saw zy nata a chhôhkha pazy hmo a sia ngaita pata tao awpa nata adona kyh hawhta tao awpata bie a pie theina awpata ano cha rao haw tlôh nata, ABeipa chata Abaraha kyh liata a reipa mai cha apa tlôtheina awpata" tahta (Gen 18:18-19).
            Eima pahrâna o zy he a rôna tlyma rônah vei tlyma thahphana nata a lyna ziza taotheina su peimaw chaipa cha, chhôhkha pyly he a cha. Khizaw nata khihtlâh hrozie asia nata aphapa zydua a vaw thaona thabypa zydua chhao chhôhkha tawh heta a cha. Sahma, Tôkâkheh paruna, liahnycheina zy nata molei hmotaona a vaw y hlu chaina chhâpa chhao he nô zy byh chô liata nô zy bie reizie nata apie lyu zie, ama palôrupa siezie hro la tai he nô zy byh chô liata a chupazy sai a ma châ.
            Sahma nata hmo phaleipa lâ taita padia theina pha chai pa cha, hmo phaleipa tao lei awpata mohôh pha aw pa he a châ. Chaliata hmo phaleipa, hmoparupa, hrozie chhiepa, hai pa bie rei lei awpa zydua pahleina phachai pa chhao chhôhkha liata Khazohpa bie pa laiseihsa awpa he a cha. Eima hro kaw sie lymana awpa lathlô chhao he eima chhôhkha tawhna heta a thaota khôtholâ kaw hrokhei chyupa he a cha.
            Nohkha cha, Thlahpa chyhsa rôna pa pano Glastone nata biechho tuhpa rônah pa Talmage zy heta Khizaw sawkha a zao khina chôchah zy reikhoh lai ei ta Glastone cha ta, hmotao pado â ngiahpa sakha he yta, cha cha eima Krizyna dah hena a cha he he tao pado ei sila hmohropa zydua hela a sia khaithla ha awna" atah.
            Eima Krizyna dah he eima chhôhkha chyu liata taopado khai ei sila hmohropa zydua heta a zipado khai thla ha aw. Chhôhkha hro hlâta rah nata khihtlah hro he a sâh via hlei vei. Frence zawpi zyta khapa ma eima peimawh chai? tah pata Nepolian hiahri eita anotah â chhyna cha, "Nô zy hena" tahpata â chhy a matah.
            Nô thokha zy pita, a chhyna O liata vârâh a phana thatih zy reipha ngâsâ pita eima chhôhkha liata Vârâh a phana kyh zy rei cha yleipata hrienasu ziza eima tao thlah hatyh. Chahawhpa nô chhiepa hro hmôtheina dopa cha, ama chhôhkha liata ama pa ysa pâpa ama beihachho tuhpa zy tawh heta ama pahnothei chai tyh. Keimo nata eima chhôhkha liana heta pathaisana sabaw hmâ tlôleipata a chhyna olia deitatah pathipalô pathaihna peimawh zie thai ngâsâ pata reipadei he a dai vei. Eima hrozie nata nôchâ â thaona peimawh chaipa thabypa cha, eima chhôhkha he a cha awpa a châ. A chhôhkha liata a hryuh baleipa nata a tudaih bâ leipa cha khôtholâ chyhsa zy nata buana nata atudaina a taopa y bei vei ei. Eima chhôhkha hro chyu kha khôtho lâ eima hro chhao a châ lyma pa a châ.
            Biechhotuhpa rônahpa Henry Grady ta chi nata pho paduana thabypa a hmô papuana dah he hawhta reihta, Washington Khihpi liata ryureina o lai kawpa Capital a ma tahpa cha kei hmô ta. "He he ma a châ, eima ti na râh pho a thaona thabypa, Khazohpa mohmô liata chi nata pho rônah chaipa a vaw thaona Orônahpa cha" tahpata mothli chhaota a sai, ama tah. Cha khyuh a rei leipa liata thotlah khih miakha liana cha ta nohkha nata zâkha kei y ta, O sâkha lâ cha vawhta cha o liata ama paw chaipa chata apalôrupa zyduata Biehrai reina nata pachuna hneita, chakhai nata pakhu pahneihna chôta a lahpi nata a sawzy chhaota thlah ama chhâ ngâpa cha Keihmôta " E !! Lôsôhpa o lai ngaitapa kha khiama eima rah chi nata pho rônahpa a vaw thaona thahbypa a châ vawtah nata ei vaw pacha chhei ngâsâ dia, he hawhta thotlah khihsa rietheipa zyta Khazohpa hmialiata chhôhkha pakhu paneih tyhpa zy he chi nata pho a vaw padua tuhpa ama vaw châ hri hi" a tah e ama tah.
            Chhôhkha he chyhsa taopathina su peimawh chaipa a vaw cha. Abaraha cha, Khazohpa a chipa chhôhkha pawhrahpa a cha vata a pathla zyduata Khazohpa chhôhkha Khazohpa chi nata pho apadua tuhpa a vaw châpa hawhta, Khazohpa a chipa chhôhkha pawhrahpa zyta chhôhkha Khazohpa bie apachuna nata chhôhkha thlachhapa mai he chi nata pho a padua tuhpa cha ama vaw cha. Chavata chhôhkha maisa he hlâno mopathaipa Abaraha zy Nawa zyta chhôhkha maisa he ama padua lyma pa a cha. Chhôkha nô nata paw pi he eima chi nata pho a kaw laisei lyma thei nawpata chhôhkha liata Bie hmeiseipa thatipha nata thlachhana he palaiseisa chyu a chhuah su u. ABeipa a bie a chyuta ei vaw rohpa he a ngiachhiena byhna mania piepa mawsy. Amen.