Mara Reih tlaita Biehrai, Hlabu eima hneipa

*MARA REIH TLAITA BIEHRAI, HLABU EIMA HNEIPA HE A SÔHZIE NA PACHÂ BEIH HRA TLY MA*?

         ~L.B.Thatlô

Eima Missionary  Rev.RA.Lorrain khata Mara sawzy he thatihpha ngâlâh padi ta Zisu ngiapâ awpa dei ta miah khokhei leipa ei ta, kao totie lia hmahsie ta khizaw liata Chipho pahnopa eima châ thei hra n'awpa ta hmo hluhpi maniah a vaw pachâkhei thlyu aw tahpa cha ama hniehnôh tawhta pahno theipa a châ.

Châhnawh A AW miah taopa ta Biehrai nata Hlabu Mara reih tlaita miah â vaw chhuanohpazy he a rônahzie nata sôhzie eima pachâ tua ei suh u. Biehrai vâta Chipho eihrâhpa eima châzie khizaw lia maniah phualuah ta, Reih hropa rai ahly byuh leipa ta eima reih tlaita Biehrai reih thei pi ta, Hlabu eima pakai theipa he vâhnei ä chhih kawpa ta ei pahno.

Nôpaw thokhata reih ei ta, Mara reih Biehrai ama pataosa awpa no khata Mizonah ta *Marapazy cha Mizo reih pahnothaipa ta reih thei thlâh ha ei ta, âmo reih ta a eihrâhpa ta taop'awpa byuh hlei vei* tahpa ta ama vaw reih cha maw.!

Châhrasala eima Missionary zy khata Reih hropa ahly awpa cha vaw khoh leipa ei ta, ahy reih hmah ahly byuh lei awpa ta Bible Society liata Mara Biehrai cha miah vaw taopa ei ta, Mizonah hlâta Biehrai cha Kô 1956 vaw hnei tua ha pi ta eimâ vâhnei hmeiseih.

Châhrasala atanoh eima duasu hih nama pachâ beih hra tly ma? Mara Biehrai nata Hlabu hmâh khao leipa ta reih hropa Hlabu hmâhpa Mara saw eima hluh kaw bâpa ta ei pahno. Eima Missionary zy thlâkhao tawhta kaw thyu ei sala Mara Awnanopazy miah padua tlôh ta Reih hropa hmâpa ta Biehrai Hlabu eima hmâ ngâkawpazy he ama palôh a pasa kaw hra nahta ei pangiasa tyh.

Ei palyusapa cha Izarei sawzy Bäbylaw seichâna lia amâ tâh nota ama totä zy râhbuh lia bai ei ta Zaio hla ama sa thei khao leipazy ei palyusa cha maw. Reih hropa ta miah a pahnie tu hapa vâta eima Biehrai nata Hlabu zy he râhbuh lia baih khai ha khiah pi maw! tahpa pachânazy eina pahneisa.

Chavâta Mara sawzy eima Missionary ta Mara Awnanopazy miah padua ta, eima reih tlaita Biehrai nata Hlabu maniah ama taopazy he a sôhzie nata rônahzie alaichadai thai ei sih la eima Mara reih he pasô via lymâ ei suh u.