Mara reih machâpa

Mara  reih machâpa,

 Bieso nata achhopasiana

~ S. Nusei, Tipâ ‘V’

1.       Lôhchhai Lôhkhy :  He he viasa apakyh kawpa hnei taraw ta, a viasa hropa a hmô nahta a viasa âpakyh kawpa siesai ta viasa hropa âpakyhpa reina.

2.      Meilô nata Sykhao : Viasa rihchâh âkhy ngâsâpa, khatino raita âchhaih thei leipa reina.

3.      Nohchhô thyu leipa : Thyutliapa châ tlôh ta a thi patoh tupa reina.

4.      Chaizôh parai : Vâneihpa, vâsuah chaimâh ta a hia awpa nota meihdozy avaw pai laih, bâhta vaw pathai laih tahpa reina.

5.      Lyupi seirâh : Lyu kawh kawpa, lyu lai kawpa reina.

6.      A chô châki zoh, ary viahsi laih : He he chyhsa ta ama chô lâ pha pakhei kaw a ru lâta chhieta, ama chhie n’awpa tlua, palôhrupa liata isi, hiatlia hnâchhao kawpa reina.

7.      Mie ta châki zoh : Chyhsa ta ama chô liata hmophapa vaw tlô, hmophapa ama hmôpazy, amâ lytu ngâsâpa vâta reina.

8.      Seihta Hârapa matli : Hârapazy cha mohnao sikhôh ama dao hluh kawpa reina.

9.      Byta lyuhchâ : He he chyhsapa ta nôvah ahiah awpa ta lyuhchâpa, chyhsa atuah awpa reina.

10.   Hrâsie : Chariah adyuhpa reina.

11.    Valâzohpa : Nôpo pachârôh tupa vâta a paraparôhpa ta hmotaopa, he he khitlyh hnâtlyna liata chhôhkha vâdua atyhna liata hmotaopa a chakhi chai.

12.   Pheithua zo : He he chyhsa ta ama tlâh lei nota ama chhôhkha nahzy ta ahmô ei ta, siepa pasai leina chôta ama siepa cha ama byhpi hrei ta, “atlâh leipa pheithua aso khâh ei” tahpa reina a châ.

13.   Rihchâh vâ-ia : Khih hro lâta ama viasa amâ khy ngâsâpa reina.

14.   Boby othieh ly : Chyhsapa ta athiehpa maihta âlypa, palôh pitloh thai leipa reina.

15.   Chyh-ei sikhôh : Chyhsa ta aruta lâta a thâtih, kyh rei hlarei ahlao tyhpa reina.

16.   Sikhôh pameih : Chanô chapaw châna kyh liata aphathei leipa a sohsi leipa reina.

17.   Hialia sâhsyuh : Chyhsa ta khihliah liata amâ hlaihlâna liata awhsâh laih, reihkah hluh kawpa reina.

18.   Sihnôh kua : Chyhsa ta a chô liata bie kheihawhpa rai ma hiahripa ta tlyma, cha leipa chhaota nô hiapa tlyma, bie âvaw lie heih n’awpa nata â vaw chhyh heih n’awpa reina.

19.   Raisâh sa : Chyhsa ta rai ama hriana, ama hmotaopa to reina.

20.  Nohly chhiki : My tota nohchhi tyhpa reina.

21.   Pathi sâh tlao lao, molâh vaw : Manô mapaw nata nô nata pawzy ta, ama sawzy ma, ama samohpazy ma, chyhsa hropazy liata biechhie thâchhie tlyma, bie pasa kawpa amâ tyh pathleina liata, ama tha pasana nata ama palôhpasa tuna reina.

22.  Keihpi cho ta, keihtaw taihta a cho : Bie peipa, a apeimawh kawpa pachâ awpa cha nôpaw viapa nata uhthei viapa a pachâtuh awpa ama y thlâh hapa hry ta hawti sawnawh viapa amâ chahraoh tyhpazy reina.

23.  Kumâ sihraih : Chapawzy ta lyurâhpa liata sa, pavaw nata pazuzy a ao n’awpa ta a kheihawhpa rai ta chôhchâpa lâchhâh ta ama taopa maihta reina

24.  Chaihrai chaihnaoh : Thua nata ti, hmobaoh lâchhâh reina.

Mara reih âpakaohpazy:

1.       Thopi sâlâh : Thopi pa-eihpa lâchhâh reina.

2.      Khihsa tôhtu : Chyhsapa eima khihsana lâchhâh reina.

3.      Pathipalôh: Eima palôhrupa lâchhâh reina.

4.      Chasi chazôh : Chasi kawpa hryta hmotaopa reina.

5.      Pahnia pahnao : Sie n’awpa ta a pahnia kawpa reina.

6.      Adâ daoh : Khiliah tlyma, o tlyhmia tlyma a dâpa reina.

7.      Ytu khihsa : Chyhsapa âpielyuzie reina.

8.      Chahracharôh : Chyhsa ta rai a hria thei zie reina.

9.      Thathi zôhmypa : Chyhsa ta rai a hria hoh leipa reina.

10.   Pochhi hrikhô : Pasapanana reina.

11.    Hnatlâh zôtlâh : atlâhpata ta yna reina.

12.   Hnazô tliatlâ : Ama hmisâ reina

13.   Pakhu pary : Kahraosaohpa ta pakhu pâpa reina.

14.   Pasie pahloh : Tihâh, âhmie pahâh kawpa reina.

15.   Thâchhie nohchhie : Chyhsa thâtih chhiepa reina.

16.   Biechho thâhchho : Chyhsa  lâpi biechhozy pha kawpa reina.

17.   Hnachi hnachô : Pasa hmeiseih tlôh leipa ta y pahâh thai leipa reina.

18.   Beihchho phiahchho : Pati nie awpa ta beihchhopa lâchhâh reina.