MARA REIH CHÔCHÂH

MARA REIH CHÔCHÂH LIATA

 EI PALÔH NA KHAI KAWPAZY

- Hv. Beihalua

Mara reih rozie âdo kawpa ta châ ei roh thei n'awpa ta keimasasyh ta chyhsa hropazy châropa tawhta avaw chu tyh na ta. Cha liata keima mopakha pachâna palôh liata âvaw lâpa, ei pachâ peimawh kawpa nata ei palôh na khai kawpa vaw y hôlô ta; anodeikua, chazy cha reihpasia thai khai awpa ru kaw ta, 'he hawhta châ sala, cha hawhta châ vei tlymâ' tah awpa a hluh kaw tyh. A Grammar atlychakapa ta chhochhi cha 'he biesâ he kheihawhpa ma a châ' tahpa chhao pahno thai khao leipa ta, no maohkhei ngâkaw awpa a châpa ta ei pahno tyh. A kheihawhpa a châ hapa chhaota, Mara reih chôchâh liata keima palôh liata ahloh hawhta na khai kaw tyhpa atahmâ ei vaw roh. Âsu leipa nata âdo leipazy cha nôpawpa nata a thai viapazy ta he Hla nata Bie siepahliepa heta padona chhao hneipa châ sala tahpa ei khoh kaw.

1.  Mara Châhnawh:

            Eima Khazohpa ta eima misawnari nah siepahliepa ta Marapa Châhnawh pha kawpa maniah pie ta, cha cha eima râh nôpawpa nata thai-sopa zy ta hmah pasiesa awpa nata pasosâhsa via lymâ awpa ta hmah a thata la ei ta, eima reih ta ropa châbu hluhpi chhao hnei baichha lymâ pi ta, achuna Siku lia cheingei chhao Mara reih achu thei awpa a vaw châpa he aly âchhih ngaitapa a châ.

            Cha hawhta a châ nota eima Châhnawh chôchâh liata keima padisaihpa tlaina heta reihkah pathlie theina awpa a dikari ta hmahta ei hnei lei tarawpa ta, ei palôh khâcharâ eina khai hapa vâta pachâdâh reih awpa kho kawpa ei hnei. He ei rei awpa he a thaiso viapa hluhpi nata nôpaw palôh pasoh kawpazy nata, literature board lâ tawh chhaota a thata ama pachia ha chiehpa a châ nahta chhao ei pangiasa. A kheihawhpa a châ hapa chhaota ei ykhei thei khao leipa vâta ei pachâna he hawhta ei vaw roh.

Mara Châhnawh cha -

                A AW Y B CH D E F H I K L

                M N NG O Ô P R S T U V Z

zy he châ ei ta.

            Mara reih ta châ eima roh nota Châhnawh liata a y leipa 'Â/â' hmâna hluh kaw ta, 'A/a' cha he ngiana '^' châhnawh liata a y leipa pyly hmâhpa ta a luh pakhu pi ta, he he keimo a pahno chiehpazy pi ta cha  rairukhei leipa pi ta, châhrasala, Mara reih châ rei nata ro a thai leipa, achu awpa ângiahpazy châta cha thai/pahno a ru pâ khiahma ei tah tyh. Châhnawh liata âlâ tlôh leipa, hmâh/roh awpa ângiah ha nahta tâkuh ânyupa, âvaw palâpa hawhta eima roh palâ thlâh heih tlôhpa he a pha thai âh tlama i... tahpa pachâna eina pie tyh. Chatawhta, 'A' he 'Â' châ leipa ta, châhrasala, châhnawh eima reih papua awpa nota 'A' cha 'Â' hawhta tlâ eima parosa/reih tyhpa nata châ rona liata 'A' cha 'Â' hawhta eima hmâh khao heih leipa he asu thai hra vei. Châhnawh liata a y leipa, a byuh ha nahta tlâ pa-ysa chhyhpa hawhta a lyu thlâhpa hlâta cha eima nôpaw penawh ta pachâ pathi heih ei sala, Châhnawh liata 'O nata Ô' eima hneipa hawhta,  'Â' he tlâ bai ei sih la, 'Â nata A' tlâ hnei hra ei sila tahpa he ei palôh na khai kawpa cha a châ. 'Â' baipa châ ha sala, eima châhnawh cha-

                Â A AW Y B CH D E F H I K L

                M N NG O Ô P R S T U V Z

zy he ama châ aw.

2. Mara reih liata 'pa ' peimawhna:

Mara reih ta châ eima roh nahta biesâ thokhazy chhâna lâ liata 'pa' bai cheingei awpa a byuhna daihti y tyh ta, bai a byuh leina daihti a y tyh hra. 'Pa' baina awpa liata bai leipa heta bie â icha leipa nata a pitloh leipa dei châ leipa ta, bie â chhuahna panano thei ta, yzie hnei leipa lâta a pachâsa thei. Cha biesâ thokhazy chhâna liata 'pa' eima bai tyhnapa cha a tlâhpipa ta Mohchho (Noun form), Mohchho reihpasiatuhpa (Adjective form) nata Adverb zy liata baipa ama châ via chai. Kheihawhpa biesâ lia tlyma cha prefix hawhta 'pa' eima hmâna daihti a y hra. Atahmâ ta ei reih khoh kawpa cha noun form, adjective form nata adverb zy liata suffix hawhta 'pa' eima baina, â hlao leipa ta Mara reih ângia thai lei zie nata bai cheingei awpa a peimawhna he a châ. Biesâ liata 'pa' bai a byuhna nata a byuh leina cha he ary liatapa pamosana biezy tawhna heta duah moh tua ei sih la:

Pamosana:

1)."Chakeihbarôhhneipa cha â rôh ngâlâ". 

 A chô liata ‘Chakeihbarôhhneipa’ tahpa liana khita ‘pa’ bai leipa ta ‘Chakeihbarôhhnei cha â rôh ngâlâ’ tahpa ta eima roh khiahta cha pahnothai awpa a châ tarawpa ta, a biepa a icha leipa ta, pitloh leipa ta, aki hra vei.

2). "Chakeihbarôhhnei lochopa cha â rôh ngâlâ".  

            He liata deikua cha noun ‘Chakeihbarôhhnei ’ nata adjective ‘locho’ tahpazy a pazi ei ta, chavâta noun liata ‘pa’ bai byuh leipa ta, adjective liata tlao eima baipa a châ. A sâno lâhta pa’ baipa ta ‘Chakeihbarôhhneipa lochopa cha â rôh ngâlâ’ tahpa hlâta cha, adjective 'locho’ tahpa lia ngâlâh ta pa’ baipa ta ‘Chakeihbarôhhnei lochopa cha â rôh ngâlâ’ tahpa ta ropa khita Mara reih a pangiasa via syulyu.

3). "Hawtipa a cha". 

          'Hawtipa' tahpa liana khita 'pa' bai leipa ta, 'hawti a cha' tahpa ta roh ei sih la, â chhuahna pahno thei awpa a châ thlâh taraw nota, a bie a icha leipa ta, a bie pitloh leipa ta, Mara reih pangiasa thai vei.

4). "Lailai cha hawti ngâchhihpa a châ".

            He liata cha Hawti (noun) nata Ngâchhih (adjective) âmâ pazipa vâta 'ngâchhih' lia ngâlâh ta 'pa' baipa a châ. Sâno lâhta 'pa' baipa ta, 'Lailai cha hawtipa ngâchhihpa a châ'  tahpa hlâta 'Lalai cha hawti ngâchhihpa a châ' tahpa cha bie rozie âdo viapa nata ângia viapa a châ.

 5). "Machâpa a thi". 

            "Machâ a thi" tahpa ta eima roh khiahta cha Awnanopa liata Machâ ahy tlyma a thipa reina a châ syulyu ha. 'Machâpa a thi' tahpa khita pawpipa/uhthei kawpa a thipa reina châ ta, 'pa' bai lymâ awpa a châ.

6). "Machâ R. Chichô ta biereina a hnei".

            He liatapa 'Machâ' he Awnanopa liata Machâ châna(title) reina châ ta, 'pa' bai cheingei byuh vei.

7). "A reipa a pha kaw".

           He he chyhsa ahy tlyma ta bie a reipa a phazie reina châ ta, 'pa' bai leipa ta 'A rei a pha kaw' tahpa ta eima roh khiahta cha, chyhsa ahy tlyma ta châ a ropa, a rei pha kawpa reina a châ syulyu haw.

8). "Taopa awpa a byuh / Taop'awpa a byuh".

            He he chyhsa ahy châta tlyma hmo tao awpa a byuhpa reina châ ta, 'pa' bai leipa ta "Tao a byuh" / 'pa' baipa ta "Tao'pa/ Tao awpa a byuh" eima tah khiahta cha, chyhsa ahy  châta tlyma châ hlei leipa ta, hmo tao awpa a byuhpa reina tlâ a châ.

9). "Satliapa ta tho a thlu".

           He liata 'pa' eima baipa heta bie pa-i-pachasa ta, a pitloh kaw. 'pa' bai leipa ta "Satlia ta tho a thlu" tahpa he a bie a icha leipa ta, pitloh leipa ta, Mara reih pangiasa tu vei.

10). "Satlia, atanoh khâpa na tao aw?"

            He liata 'Satlia' tahpa he chapaw pitlohpa, lahpinô hnei mâh leipa, a moh vyuhpa ta awna châta hmâpa châ ta, 'pa' bai byuh hlei vei.

11). "Hlasathaipa a châ".

            He chhao he "Hlasathai a châ" tahpa ta roh ei sih la a yzie eima pahnothai thlâh tarawpa ta, anodeikua, a bie a icha leipa ta, a bie pitloh leipa ta, aki thai hra vei.

11). "Eima Khazohpa cha ngâchhihpa a châ".

           He bie liana heta Noun nata adjective hmâh pakaohpa châ ta, anodeikua, ama likah liata 'cha' a ypa vâta 'Khazoh' nata 'ngâchhih' tahpazy liata 'pa' baipa ama châ. 'Pa' bai leipa ta "Eima Khazoh cha ngâchhih a châ" tahpa ta eima roh khiahta cha 'Eima Khazohpa moh cha Ngâchhih a châ' tahpa lâta alie ha aw ta, â chhuahna a chhei syulyu ha aw. Anodeikua, ama likah liata 'cha' y leipa ta 'Zisu cha Khazoh ngâchhihpa a châ' tahpa ta eima roh khiahtala 'Khazoh' liata 'pa' bai leipa ta, 'ngâchhih' tahpa liata 'pa' bai awpa tlao a châ.

12)." "Khazoh ngiachhiena rônah chai, khizaw râh zydua pathâh se".

            He he cha hlabie  châ ta, a phituhpa ta 'Khazoh' tahpa liata 'pa' bai leipa ta a phi hapa vâta keimo khota bai chakhyh thai awpa châ vei. Hlabie liata cha a phituhpa ta aony a taozie â ryh awpa ta biekawh paryh tyh ta, a khoh khiah 'pa' baipa ta phi thei ta, bai leipa ta chhao a phi thei hra. Hlaphituhpa ta khotalaina a hnei kawh kaw.

13). "A vaw tlô dyupa a châ".

            He a chô liatapa chhao he 'A vaw tlô dyu a châ'  tahpa ta  eima roh khiahta cha a bie pitloh leipa ta, Mara reih a thai pasia leipa bie reipa châ sala a lyu thlâh haw.

            He pamosana châta ei vaw palâsapazy dei châ leipa ta, biesâ chhâna liata 'pa' bai n'awpa nata bai lei n'awpa hluhpi a y. A peimawh chaipa cha 'pa' bai n'awpa liata eima bai leipa heta bie a icha thai leipa ta, Mara reih a thaipasia leipazy biereipa lyu ha tyh ta, thokha chhochhi cha â chhuahna taihta a pahlei thei. Chatawhta, 'pa' bai lei n'awpa liata eima baipa ta Mara reih pangiasa thai tyh vei. Chavâta, Mara reih ta châ eima roh tita biesâ thokha hluhpi liata 'pa' bai a byuh nata byuh lei chakhiehcharieh kawpa ta eima mohpasia tyh awpa a peimawh kaw.