ECM Headquarters: General & Mission News

ECM Headquarters: General & Mission News:-

(5 November, 2017, Sunday)

1. Moderator:-

(1). Rev. Thylua Hlychho, Moderator cha October 26-31, 2017 chhôh ta Khaikhyh Achhyna O pahyna nata Lôpu Pastor Bia Ryureina Pakhypi â hlao.

(2). Târi 3-6 November chhôta Aizawl Mara Church Achhyna O pahy awpa ta Aizawl lâta a sie.

2. KTP Headquarters Newst:-

1). Eima palâsapa hawhna khata târi 3-5 Phiapi (November), 2017 heta KTP pachhuahpanohpa ta Conductors Training cum Seminar cha Ebenezer Local Church liata hneipa a châ. Resource Person zy cha:-

(i) Machâ C.Lalzarmawia, Lungei.

(ii) Machâ C.Hrangdula, Lunglei Bazar.

(iii) Puhpa RC.Beilaizi Bôhia.

(iv) Puhpa FC.Minela.

KTP Branch to tawhta chyhsa 3 sai pua cheingei awpa ta hruapa ama châ.

2). Târi 10 November, 2017 he ta ECM KTP Headquarters Executive Committee Meeting, ECM Local Church, Bethesda liata hneipa a châ aw. Committee Member-zy âki kawpa ta ahlao khai awpa ta hruapa ama châ.

3. Mission Newst:-

1). Tiwa Mission:-

(i). Tiwa Field liata eima Missionary K.Buitinthang cha Ls. Margaret Chhaolô zuah nata November 24, 2017-pa ta Siata Local Church liata kupatuna ama hnei aw.

(ii). Group outreach ministry cha a palâ kawpa ta hnei khaipa châ ta, nôvah thokha likawh liata rairuna vâta bâtina zy hnei thei mâh âh leipa cha chy ta, ama palôhru liata Thlahpa Pathaihpa ta rai a hria thei nawpa ta thlahchhâkheina amâ ngiah ngaita kaw.

iii). Rev. T. Salaw, Executive Secretary (i/c Mission) nata Machâ A. Khailua zy cha târi 3 November, 2017 khata Mission Tiwa Field ama tly khai tawhta eima râh lâ ama kaw sie.

(iv). Târi 31 October – 4 November, 2017 taihta Guwahati liata Expository Sermon & Biblical Preaching Training hmâpa ta eima Missionary Rev. Khabi Chozah, Pastor C. Khaisa nata Pastor BH. Valia zy amâ hlao. Thlahchhâkhei suh vy.

2). Arunachal Pradesh Mission:-

(i). Târi 1 Phiapi, 2017 khata Mission chakaona châta chhaichhi peimawhpa Projector thiehpa ama hneipa cha Khazohpa ta hlâna ama hnei. Awnano chyhsa â pie pasaina zy, hyutuhpazy khokheina nata Khazohpa ngiachhiena chô liata alyna bie ama reih. Daihti ryhpaohpa hmiatua chaipa liata Prayer Center, Changliang liata chakaona hneipa a châ aw.

(ii). Târi 31 Phiata, 2017 khata Prayer Center Changliang tawhta nôvah bao kha nata Nô pakha zy bâti pachâsapa ama châ. He ngiapâ thiehpazy he â i kawpa ta ama sie lymâ thei nawpa ta Awnanozy thlahchhâna ta bao chyu suh vy.

(iii). Târi 2-4 Phiapi, 2017 khata Tezu Awnano liata Discipleship Training hneipa a châ. Resource Person châta Pastor Lalnunhlima Mathipi, Field Supervisor, Arunachal Pradesh Mission Field cha hmâpa a châ. Member-zy amâ thôhkhei ngâsâ tahpa bie daopa a châ.

3). Mising Mission:-

(i). Târi 31 Phiata – 4 Phiapi, 2017 taihta Expository Preaching Training, Guwahati liata hneipa liata Mission Pastor C.Khaisa chhao â hlao hra. Rev. Khabi Chozah nata Pastor BH.Valia zy chhaota he training liata heta amâ hlao.

(i). Târi 10-12 Phiapi, 2017 likawh heta Pastor C.Khaisa ta Laihsa Mousumi Kari âchhipa ta Majuli Banamukh khih liata chakaona hnei heih awpa ta amâ pachhuahpanoh ngâhai. Awnanozy thlahchhâkhei awpa maniah amâ haw hra.

(iii). Pastor C.Khaisa zy nôvah cha atahmâ he ama y nawpa su Bokakhat lâ amâ pasie haw. Field Director Rev. L.Lychhua cha târi 7 Phiapi heta Mising Field lâ tly awpa ta ama hnabeiseih.

(iv). Târi 1 Phiapi, 2017 khata Sawhkhâ bie hawhta Holy Grace School, Mising Field ta Siku hawti nô nata paw zy nata agreement ama roh. He agreement liana heta eima Mission School hawti hry liata failed ama vaw ypa a châpa chhao ta School maohphaohna châ khao leipa ta nô nata paw zy maohphaohna a châ ha bâ aw. Class X hawtizy he Board Exam hmiachhy awpa ama châpa vâta thlahchhâkhei amâ ngiah ngâsâ.

4). Tripura Mission:-

(i). Atahmâ hâta liata manôh 4 bâti pachâsapa ama châ.

(ii). Târi 30 October, 2017 khata Rev. T. Salaw, ES (Misn) nata Machâ A. Khailua zy ta Tripura Agartala vaw tlô ei ta. Date 31 October khata Missionary nahzy nahta apakyhna hneipa châ ta, Missionary-zy amâ ki phapa kaw. Zâlâ pati niena chhao ES (Misn) ta achhuahnopa cha ama nie. Missionary nahzy amâ ly ngaita kaw.

(iii). TBCU nata ECM Working Agreement cha date 31 October, 2017 khata TBCU Office liata Rev. T. Salaw nata Rev. CK.Debbarma zy chhihthana ry liata review hneipa a châ hra.

5. Hindi Christian Fellowshipt:-

(1). Târi 4 Phiapi, 2017 (Pachyhnoh) tawhna khata Hindi Christian Fellowship Home Evangelist zy ta ngiapâ leipazy hnohta chakaona program hnei pathao ei ta, HCF Home Evangelist-zy châta Awnanozy thlahchhâkheina maniah amâ haw.

(2). Târi 10-12 Phiapi, 2017 heta Hindi Christian Fellowship Convention ei 18-na cha ECM Local Laki liata hneipa a châ aw. Convention châta apachhuahpanohna nata program zydua ahlaotloh thei nawpa ta thlahchhâkhei chyu suh vy.

6. Maraland Gospel Centenary Hospital Report:-

Târi 25 October tawhta 1 November, 2017 chhôh Maraland Gospel Centenary Hospital Report:-

1. Tlâhleipa mopa zie : 53
2. Tlâhleipa admin zie :  22
3. ECG mopa zie :   9
4. Endoscopy mopa zie :  21
5. Ultrasound mopa zie :  26
6. X-Ray mopa zie :  19
7. Casualty case  :   17

(Edited & Published by Editor, KTP Ao. Source: Pn. J. Lalvarliani, Coordinator i/c Communication, ECM Headquarters, Siaha.)