Thyu Heihna Hro - JV Hlychho

*THYU HEIHNA HRO*

~ JV. HLychho, College Vaih North.

“Krista liata khaipâpa châ ha na ta…” (Kal. 2:20)

Bei Zisu thina nata thyuna bie he thâtihpha rohtuhpazy ta roh chyu ei ta, anodeikua la ama roh dâh alyu tlâ vei.  He he ta amopâpa ta ropa châ vei tahpa sia kawpa ta âlâ, he hry liana he ta ei palôhru hria pachaipa y ta, cha cha Mari Magdalini thâtih he a châ. Zisu â aovâ pachaipa a châ. Chanô hropa nata pachutuhpazy ta Bei Zisu thyuheihna ama hmô nahta a di khai ha ei ta, anodeikua Mari Magdilini deikua adi thei leipa ta, thlâchhôh mohta acha ngâthlâhpa a châ. Chavâta Zisu aluahna chhao a hmô tua chaipa a châ. He heta ngiapâtuhpa palôhru nata hro a pamosa pasia ngaitapa a châ.

He bie eimâ tlyhpa liana heta hmo sâno eimâ chu awpa y ta –

A thina liata eima thi hra awpa a châ –

“Kriata liata khaipâpa eima châ haw” tahpa heta yzie â thu ngaitapa hnei ta, lyuhchâpa Pawla chata Zisu a hmô nahta siesai thei khao leipa ta, a palôhru pahnie chai tuhpa a châ haw. Hmo hropa, khizaw hmo sôhpa zydua cha “Khâpahrao leipa dei a châ” a tah.  Keimo ngiapâtuhpazy pi ta Bei Zisu hlâta khizaw hmo sôhpa khoh viana eima hnei khiahta khaipâpa châ mapi tahpa a sia ngiata kaw. Sôh nata piah, satlia nata laihsa palôhru hmâ dâh do leipazy, pathipalôh chhôh liata khohlei khona zydua zy, Bei Zisu hlâta pasô viana eima hnei khiahta cha Bei Zisu liata khaipâpa châ ma pi tahpa a sia ngaita kaw. Bei Zisu ta Simaw bie a hiahri nahta “Simaw Jehova sawchapawpa, hezy hlâta kei he kyh eina pachâ via chi ma? a tah nona khata a chhy thei vei. Kei he ei paw moh reipa ta bie na hiahri ha sala ei chhy thei ma?  Zisu Krista myuh châ pi ta, eima likawh liata khâpa hmahta a a charei awpa châ vei.

Hrona hmeiseihpa cha –

“Châhrasala ei hroh na, ei hro tyhpa deikua châ leipa ta, Krista cha keima liata a tlao a hroh via haw.”… He he Esther bietapa châ ta,  Bei Zisu liata thi ta athyu heihna hro a ngiapâtuhpa hro dâh awpa cha a châ. Eima nohto hro liana heta Bei Zisu nata eimâ pakaoh ma? “Viasa pha chaipa’ eima tah thei ma?  Eima hro lia nahta eima hmi liata nahta, bie eima reipa liata chyhsa ta Bei Zisu ama hmô ma? Awnanopa chhituhpazy pi Awnanopa zawpi heta miah aovâ hleikhô ei ta, maniah ngâh ei ma? Chyhsa tota eima hro liata Zisu ama hmô hmeiseih ma? “Krista cha keima liata tlao a hroh haw” tahpa a rônah ngaita na. Bei Zisu hneituhpazy cha chyhsa tota ama aovâ ngaita kaw tyhpa a châ.

Thlahchhâna hro –

A chhâ chaina liata ngiapâtuhpa cha thlahchhâna hro he a châ.  Bei Zisu khizaw liata a charei nona khata Khazohpa hnohta thlahchhâ hoh ngaita ta, eima Awnanopa chhithatuhpazy hih  thlahchhâ tyhpa eima châ tly ma? Khazohpa bie eimâ chu sâh tlyma,  eima chhôhkha liata chyhsazy pasâhsapa eima châ tly ma! Khazohpa chakao hmeiseih awpa heta ahy hmahta tloh hmeiseihpa y tlâ leipa pi ta, Lyuhchâpa Pawla ta “Ama hry liata molei chaipa keima hena ei châ” a tahpa a châ.  Anodeikua la Khazohpa chyhsapa chata Khazohpa tawhtapa hmotaotheina ama hnei tyhpa a châ.  Ngiapâtuhpazy pi he thlah eima chhâ hluh leipa a châ khiahta la  chyhsa hropa liata eima biereipa kha khâpa hmah châ aw vei tahpa he eima pahno awpa a peimawh ngaitapa a châ. He he Zisu thyu heihna Hro a châ.

“Khazohpa ta byhnâ pie mawh sy!!”

(Editor, KTP Ao, College Vaih).