Mara Idol 2017 Competition

*Mara Idol 2017 Competition hmah lana siekhei lymâ*

Mara Idol 2017 – Hlasa ataopasuana(Competition) cha atahmâ thlâpâ târi 19 Phiata, 2017 pa ta pahyna rônah kawpa hnei awpa ta hmah lana siekhei haipa châ ta, târi 21 Phiata, 2017 tawhta Audition Round pathaopa a châ aw.

Contest awpazy châta Registration Form taopa cha, atahmâ he copy 100 hlei tlai raipapua hapa  châ.

Atakô cha lymâ chhao pha kaw ta, competition chhao âsâh kaw awpa a châ. Lymâ he hawh ta taopa a châ.

1st Prize = Rs.1,00,000/-
2nd Prize = Rs.70,000/-
3rd Prize = Rs.50,000/-

Registration form he târi 17 Phiata, 2017 noh taihta pangia theina daihti pahypa a châ.

Registation Form he MTP  nata MHP Sub-Headquarters âduana - Phura, Tipa, Saikao, Chakhei nata Chholo khih lia zy ta pado theipa a châ hra aw.

Atakô Mara Idol ataopasuana liata hmâ awpa Theme Song cha hla thiehpa hmâ awpa ta paryhsapa châ ta, cha cha Mara hla phithaipazy ta ataopasua ei sa la, târi 10 Phiata, 2017 hlâta Organising Board ku liata pangia khai awpa a châ aw. Theme Song he sâkha atlypa châ aw ta, aphituhpa châta lymâ pha kawpa taopa a châpâ hra haw.

Mara Idol 2017 he December thlâpa hâta hmiatuapa liata patlô thei awpa ta hnabeiseihpa châ ta, thlapi thla 3 chhôh ta siekhei awpa a châ vâta Mara Idol TV Live siepahliepa ta Advertisement atao khohpazy nata sponsorhip ataokhohpazy châta akawh kawpa ta atahmâ he pahypa a châ. Advertisement atao khohpa nata Sponsorship atao thei awpa eima y khia Organising Board nahzy hnoh ta âpahnosa awpa  a châ aw.

Atakô liata ataopasuana he NGO lâ tawhta deichhyna thata daopa châ ta, a eihpachaipa ta MTP nata MSO zy tawhta MHP nata Organising Board zy rairuna pathlâkhei lymâ awpa ta amâ mâ tahpa eima pahno vâta ama châ liata eimâ ly ngaita.

Râh nôpawpa nata Officer eimâ bôchhâ kawpa zy hnoh chhao ta, he Mara Idol 2017 châta sôh nata thih thata maniah bao lymâ ei ta, ama chô liata eimâ ly hmeiseih. Ama veiseih palôhâhna nata ti nata râh châta amâ pasainazy he MHP Headquarters nata Mara Idol 2017 Organising Board ta my beih aw mapi; ama zydua chô liata alyna bie eima reih hmeiseih.

He tawhta baona eima vaw hia laih awpa zydua hnoh chhao ta ama ngiachhiena ahaw chhielie pi ta, eimâ hawnazy hlao maniah ama patloh chyu hra awpa nata, he Mara Idol ataopasuana he chi nata pho reih pabohsana nata palaiseihsana a châ tahpa pahno thlâhna chô ta Organising Board siepahliepa ta Mararâh châta nama theina rakha lymâ hawh ta apasaih chyu awpa ta eimâ châ haw.

Main Sponsor tuh awpa châta Environment & Forest Department, MADC hnabeiseihpa châ ta, Puhpa Thaly T. Azyu, DCF chhao ta, apasai kawpa ta ti nata râh châta abyuhpa nata ângiahpazy liata hmah maniah lakhei lymâ awpa ta âpasaihpa vâta eimâ ly ngaita. A chô liata Organising Board vyuhpa ta alyna bie reima reih hmeiseih.

Kô avaw sie chiehpa liata eima tao chyu tyhpa hawh ta MDC Bia, MTP Sub Headquarters bia, MTP/MSO Branch nata VC ôna area chhôh liata hlasa thai viapa nata promote tlâh achâpa ta eima pahnopazy eima vaw deichhy tyhpa hawh ta atakô lia chhao ta eima area chyu liata thyutliapazy deichhy lymâpa ta he hlasa ataopasuana liana he ta nama vaw chaluah chyu heih awpa ta MHP Headquarters moh nata Mara Idol 2017 Organising Board moh ta chahrua pi ta, eima châ haw.

Ti nata râh châta hriapasana liata hmaohkha ta,

Sd/- BeiRôkhu Beitâ,
Secretary

Sd/- Nakho Solo
Chairman

Mara Idol 2017 Organising Board
Mara Hlasa Py General Headquarters
Siaha.

(4 Phiata, 2017. Siaha).

Source: Beirokhu Beita.