Teachers’ Day Message

TEACHERS’ DAY MESSAGE

~ By K. Vanlalliana,

DCEO, MADC, Siaha.

            India râh nata zawpizy châta noh rônah ngaitapa “Teachers’ Day 2017” cha eima vaw tlô ha heih. Kô to ta târi 5^th September he Pachutuhpazy palyupalihna noh ta vaw hmâh lymâ pi ta, India sawhkhâ chhaota he noh he a pachâ peimawh ngaita kaw. Eima pahnopa hawhta Pachutuh rônahpa, India President avaw châ hapa Dr. Savapalli Radhakrishnan pinoh pachhyhpa ta he noh he ahmâh tyhpa a châ.

            Athaisopa Henry Adams chata, “A teacher effects eternity, he can never tell where his influence stops” tah ta, cha yzie cha Pachutuhpazy heta he alei liata eima pahrâ chhôh châ ngâlâh châ leipa ta, eima tlyzaw hro awpa taihta maniah ama pachu, tahna a châ. Tlai na, Pachutuhpazy he chyhsa hrochhôh khihsa tôhtuna nata hrozie dei châ leipa ta, eima tlyzaw thlahpa hro lâthlôh dopa taihta miah pahmôtuhpa peimawh ngaitapa a vaw châ. Chavâta ama maohphaohna he asâh ta, palyupalih aphuh ei ta, pasâhsa amâ chhih ngaita kaw.

            Alexander the Great kha chyhsa machhyumahrâhpa nata adyuhna sai pachâ tyhpa châ hra sala Pachutuhpazy kha vaw  pasâhsa ngâsâ ta, he hawhta a vaw reih, “I am indebted to my father for living but to my teacher for living well,” tahpa ta. Eima nô nata pawzy cha pitloh awpa ta maniah mohôhtuhpa châ ei ta, Pachutuhpazy deikua hro yzie hneipa hnei awpa ta maniah mohôhtuhpa ama vaw châ. He khizaw liata hro chhutla chakhâ yzie miah pahnosa ta, yzie hneipa ta laiseih ta, hmahsie n’awpa lâthlôh maniah pahmôsatuhpa châ ei ta, ama sôh ngaita tlaina tah t’u.

            Pachutuhpazy Noh lia heta Pachutuhpazy hriapasanan nata zachhihna he athiehpa ta pahno chanei heih chyu ei sih la, amâ phuhna hawhta eima za thai leina nata palyupalih thai leina liata reihpha cheih ei suh u. Atanoh duahmo khochhihpa liata maniah paduatuhpa he eima Pachutuhpazy ama châ zie pahnopasia chanei heih ei sih la, hro lâthlôh phapa maniah pahmô ta, chi pho nata râh hmahsiena hleidy maniah daopatuhpa ama châ zie he sia chanei ei suh u. Chavâta Pachutuhpazy he amâ phuhna hawhta palyupalih ei sih la, pasô ei sih la, cheihchalo ei suh u.

            Teachers’ Day 2017 eima tlô no heta Pachutuhpa zydua zana nata khokheina asâh chaipa ei hlâ chanei ei. Pachutuhpazy cha chakaona rai rônah ngaitapa ahriapa ama châ zie a thiehpa ta sia chanei ei sala, ngâchhihna nata phahnaingiah ngaitapa ta he ama chakaona he pazao chyu awpa nata ahlâ pathieh chyu heih awpa ta ei pasyu ei.

“ Pachutuhpazy he Sathaw Mei-ôh (Candle) hawhta châ ei ta, mohropazy khaihna lâthlôh pahmô awpa ta âmo cha ama tlô tyh!”

Ei châ ly kaw ei.