Mizo Sermon - ISUA CHAUH EN TUR

 (Heb. 12:1,2)

Rev. C.Thalai

“Chutichuan chhûmpui nasa tak ang thlîrtuten min hual vel avang hian min tihnawk thei apiang leh sual min tibuai thinte chu hlîpin, kan hmaa intlânsiaknaah hian chhel takin i tlân zêl ang u. Isua, kan rinna innghahna bul leh tifamkimtu chu i en tlat ang u. Ani pawhin a hmaa lâwmman awm avang chuan mualphona chu ngainêpin, krawsah chhel takin a tuar a.” He thu hi awmze thûk tak nei a ni. Bible in en tura min tih hi en lovin, en loh turte kan en avangin kan accident thin a ni.

Pastorte kan en a, an that ve na te en lovin, an thatlohna leh an tlin lohnate kan hmuhsak a, kan beidawng a, Upate leh rawngbâwltute kan en leh a, an zirtirna leh an nungchang a inmawi loh chuan kan bei a dawng a, chhûngkuaah hmeichhia in a pasal a en a, a ngaihdan anga a awm lohvin a beidawng a. Pasal pawhin a nupui chu a en a, a thatna aiin a that lohna a hmu lian zâwk a, a beidawng ve leh a, nu leh pate pawhin an fanu an fapate an ngaihdan leh duh dana an awm lohvin an beidawng a, setana a lo inrawlh a, tichuan an rinna mit a tih delsak thin a ni (II Kor. 4:4).

Mahni kan in en a, kan la tling lo zui a, chuvangin kan beidawng leh a, heng zawng zawng hi Lal Isua, kan rinna siamtu lam kan en loh vang a lo ni. He hla phuahtuin thahnemngai taka min sâwmna hla hi ngun taka ngaihtuah chungin sa ila-

1. Ngai teh, Kalvari tlang Kraws chungah 2. I sual zawng a tlêng fai zo ta

 Mitin tan nunna tui a luang a;                      Chhandamna hmun i thleng thei tawh a;

 A ring apiang chu an nung ang a,           Isuan nunna kawng min hawnsak ta

 Ring la, i nung ang                                     Ring la i nung ang.

                        Ring la i nung ang, ring la i nung ang

                        Kraws chungah nunna tui hlu a luang

                        Ring la i nung ang.

3. Nunna tui bua a luang fîm leh  ta        4. Tlantu nung chuan min hruai chhuak leh ta,

Tlantu fak tlâk kan tan a nung a;             Thim leh sual zînga kan awm tawh kha;

Ropui takin a êng chhuak leh ta,              Vânram thianghlim min thlenpui ang a,

Ring la i nung ang.                                      Ring la, i nung ang.

“Kei hi kawng leh thutak leh nunna ka ni. Keimaha kal lo chu tumah Pa hnen an thleng ngai lo” Lal Isuan a ti. (Joh. 14:6).

Bible in en tura min tih lam kan en loh avangin tunhmaa la awm ngai lo accident râpthlâk tak tak khawvelah hriat tur leh hmuh tur a tam ta. Tangka sum avangin chhûngkaw tin leh vêng tinah buaina chuan thlâ a zâr a. Tangka sum ngainat hi sual tinreng bul a nihzia ITimothea 6:10 ah chiang takin kan hmu a ni. Tangka sum avangin mihring nunna hlu tak te chu ‘ârte thi’ pawh a tluk zo tawh lo va, chhungkua zawng zawng thah chimih vek pawh pawi tihna a awm ta lo. Heng zawng zawng te hi Isua Kraws lam kan en lova, sual kawng râpthlâk tak kan zawh avanga lo awm a ni.

Petera pawh khan Lal Isua thu anga lên a den khan sangha tam tak a man a ni tih Bible in min hrilh a. Lal Isuan Simon Petera hnenah li thûk lam pan a, lênte dêng turin a ti a, Simon Peteran a hnenah, ‘Hotupa, zankhuain rim takin lên kan dêng a, engmah kan man lo. Nimahsela, i thu angin lênte chu ka han dêng leh ang e’ ti a chhângin, lên chu a thiante nen an dêng leh a, sangha tam tak an khuh a, an lênte pawh a thlêr phah hial a. “Lawng dang, anmahni pui turin an kutin an hui a, lawng pahnih an ti khat a” tiin. Isua thu anga an tih avanga an hlawhtlin zia kan hmu a ni (Lk.5: 4-11).

Galili dîla thlipui chanchin Mk. 4: 37-39.

Chutichuan thlipui na tak a rawn tleh a, tuifâwnte chu a phûl bulh bulh a, lawng chu tuiin a khat dawn a. Mahse Lal Isua chu lawng mawng lamah chian lukham khamin a mu a, an va kaitho va, thli chu a hau va, tuifinriat hnenah pawh, “Ngawi la, awm hle hle rawh” a ti a, tichuan, thli chu a ngawi ta a.

Lei leh vana thuneihna zawng zawng Lal Isua kuta pêk a nih avangin tuifinriat leh thlipuite pawhina thu an awih a ni. Matt. 28:18. He hla phuahtu hian thlarau lam mit atangin alo hmu fiah hle a ni.

1. Lalpa, kan lungpui kan himna                          2. Chhûnah hlim nuam, zanah kulhpui

Thlipui, ruahpuia kan phên tur;                            Thlipui, ruahpuia kan phen tur;

Hlauhawm tinrenga kan himna                             Min ti zâm ngai lo’ng hmelmaten

Thlipui, ruahpuia kan phên tur                             Thlipui, ruahpuia kan phen tur.

                                    Chaklote tan Isua lungpui nghet a ni,

                                    Chaklote tan, chaklote tan

                                    Chaklote tan Isua lungpui nghet a ni,

                                    Thlipui, ruahpuia kan phên tur.

3. Thlipui lo hrângin kan vêlah,                            4. Aw lungpui, aw hlimna hlu ber

Thlipui, ruahpuia kan phên tur;                            Thlipui, ruahpuia kan phen tur

Kan hnuchhawn ngai lo’ng kan himna                Min puitu, lo hnai rengang che

Thlipui, ruahpuia kan phên tur.                            Thlipui, ruahpuia kan phen tur.

Kan chhûngkuaah lungngaihna leh retheihna, harsatna, thlêmna thlipuiten min nuai thin mahse, Chhandamtu Isua Krista lam chauh kan en tlat chuan kan mangan lusûnna zawng zawngte leh kan tahna te hi lâmah chantîrin, hlimna min sintîr zâwk dawn a ni. Sam 30: 11. Lâwmna chu Rose par angin chatuanin a vul reng tawh ang. Haleluia! Lalpa kan Pathian, sual thim ata min tlantu chu chatuanin fakin awm zêl rawh se. Amen.

A tlângkawmna: “Chutichuan, chhûmpui nasa yak ang thlîrtuten min hual vel avangin min tihnawk thei apiang leh sual min tibuai thinte chu hlîpin, kan hmaa intlânsiaknaah hian chhel takin i tlân zel ang u. Isua, kan rinna innghahna bul leh ti famkimtu chu i en tlat ang u. Ani pawhin a hmaa lâwmna awm avang chuan mualphona chu ngainêpin, krawsah chhel takin a tuar a”

‘Lal Isua chauh en tur’ tih thupui hmanga tling lo taka ka Sermon ziah hi Lalpan chhiartu zawng zawng tan malsâwm rawh se. Amen.