Mara Sermon - Thlahpa sâhpiti eimâ ngia

 (1 Pity 2:2)

                                               -   Rev C.Thalai

“Hawsaih a pih thiehpazy hawhta thlahpa lâ sâhpiti khâpa hmah a hlao leipa cha vâ teh u. Cha liana chata pachhana tlôna taihta nama laiseih thei n’awpa ta”

Chyhsapa châta peimawh chaipa miakha cha niedo kyh he a châ. Anodeikua cha niedo kyh liata eimâ sohsi awpa a peimawh ngâsâpa a châ. Eima aohkhohpa hawh saita niedo thlâh ha mawh sih la, eima sapa châta pha leipa aw ta; eima hrona chhao pasih aw vei. Eima pahnopa hawhta thyutlia hluhpi ama thina chhâpa cha sahma nata paritheipa (Drugs)-zy niedona kyh vâ saita a châ. Sapa thina hlâta apasa viapa cha thlahpa thina, chhâzaw meitipo hriena su cha, a pasa n’awpa zie cha pakahta reipa nata pangiasapa hlâta chhao thata a châ aw!

Atahmâ cha siena lâpi peimawh zie a châ haw

Siena lâpi peimawh zie pamosana awpa ta he hawhta reih ei sih la, Aizawl lâ eima sie khohpa a châ  khiahta cha eima khih eimâ thao tawhta lâpi a chhih leipa ta Aizawl tlô thei’pa châ aw vei. Chavâta, lâpi a peimawhna zie cha Bible ta maniah a chho. Biesozy 14:12 liata “Chyhsa pachâ ta lâpi dopa hawhta â lâpa, a chhâna cha thina lâpi a châ tlôpa a y” tahpa ta maniah a chho. Hrohsopa Hakai ta, “Nama lâpizy cha pakhâta ta moh the U” tahpa zikyu maniah âvaw râ hapa a châ. (Hakai 1:5)

Lei nata vâ liata bie ahneituhpa Abeipa Zisu cheingei ta, “Kei he lâthlôh nata hmeiseihna nata hrona ei châ. Keima liata a sie leipa cha ahyhmahta Paw lâta tlô thei aw vei ei” maniah atahpa a châ. (Zawhana 14:6). Bible ta lâpi nata lâthlôh sie n’awpa ta atahpa he Bible bie he a châ. He vâna heta hla a phituhpa chhaota,

Khazohpa châbu ei ngiapâ,

Bie hmeiseihpa maniah chho;

Vâ lâthlôh hmeiseih chaipa cha,

Vârâh kiah thei n’awpa.

 “Hy Bible hy Bible,

            Ei pasôh khoh chaipa cha;

            Hy Bible hy Bible,

            Khazohpa châbu he”

           

 vaw tahpa a châ. Hla he Khazohpa kyhpachâna maniah pahmôsatuhpa a châ.

 “Ei ly ngaita vâ lia eima paw ta,

Bible lia a kyhpachâ miah chho ta;

No-âhpa hluhpi cha liata ei hmô.

Zisu kyh na pachâ a rônah chai.

            Zisu kyh na pachâ ei ly kaw,

            Eina pachâ eina pachâ;

            Zisu kyh na pachâ ei ly kaw,

            Kei hmahta na pachâ.

            Ama vaw tahpa a châ. A rônah ngâsâ.

Krizyhpa chhôhkha thatlôna bieparu cha Bible a châ

“He ryhpa châbu heta na pakah cha puasai chacheihta kha se. Châbieropa zydua khâchâ na zyh thei n’awpa ta chhôh nah zâ ta tlao na pachâ awpa a châ. Chatana chata, na lâpizy cha patlâ lymâ aw ta, thlaochhipa tan a y aw” (Zawsua 1:8)

Bible pasôhna kyh liata amopâtlâh a châpa cha Mary Jones, Welsh chanô laihsa dawpa, kô 15-ta uhtheipa a châ. Bible a hnei thei n’awpa ta kô 6 chhôh rairuna hluhpi siepahliepa ta mohthlih tlana chôta Bible avaw hneipa a châ. Bible Society âvaw duana chhâpa chhao he Mary Jones vâta chyhsa ta Bible chhâzaw hrona biesôh chaipa ama hnei theipa a châ. Abeipa eima Khazohpa cha chhâzaw ta reitheipa ta y mawh sy. Amen.

Mary Jones-ta Bible bie a khochaipa cha Hlazy 119 : 1-176 chhôh zydua he Mary Jones bievaopa ama tahpa a châ. Mary Jones vâta Bible chhâzaw hrona biesôh chaipa chyhsato, molaipa nata dyhchhie chaipazy chhaota ama vaw hnei theipa a châ. Chavâta, Abeipa eima Khazohpa cha chhâzaw ta reithaipa ta y mawh sy. Amen.

Hlazy (Psalms) rohtuhpa ta Khazohpa bie peimawhzie he hawhta maniah a chho

 “Na ryhpa bie he ei pasô kaw dia! Noh yta ei pachâ tyh” (Hlazy 119:97)

‘Na bie he ei pakah châta a thlôh kaw dia. Ei pakah châna chata kheihti hlâta a thlôh via’ (103). ‘Na bie he ei pheizy châta mei-ô châ ta, ei lâpi châta khaihna a châ’ (105). ‘Na biepiepazy cha ngôh hlâta ei pasô. Ngôhsuapa hlâ chhaota’ (127). ‘Na bie he a pathaih ngâsâ. Chavâta, cha chakaotuhpa heta apasô’ (140). ‘Na ryhpa bie a pasôtuhpazy chata thatlôna thata hnei ei ta. Paona rai hnei vei ei’ (165).

Bible apasôtuhpazy cha Krista liata chyhsa rônahpazy ama châ

Spurgeon-zy, DL Moody-zy, Billy Graham-zy he Krista liata chyhsa rônahpazy châ ei ta; ama nôzy ta Khazohpa bie cha sâhpiti hawhta ama hawtino tawhta ama vaw palâsa hapazy ama châ.

Bible hmotaotheizie

England beinô Elizabeth chhao khata he hawhta avaw reih, “England a rônahna chhâpa cha Bible he a châ” avaw ta. America President 7-na Andrew Johnson chhaota he hawhta a rei hra, “Bible he eima râh apahniehna lôpanô a châ; chaleipa chhaota, Bible cha America chhopasiana a châ. State liata bie maniah ahneituh chaipa a châ” a vaw tah hra.

Ama tâkâ liana taih chhaota he hawhta ama rohpa a châ, “Khazohpa liata eimâ ngiapâna eima pahnieh” (In God We Trust) tahpa ta.

Bible-ta, “A khihnah râh nata a siana tlua tua teh u; chatana chata he zydua he a cha baichha aw ei” (Mat 6 : 33) tahpa bie cha America chô liata avaw tlô lymâpa a châ.

British nata America hneirônah chhâpa cha

Khazohpa angiapâpa ama châpa vâta Khazohpa ta khizaw liata apalyupalih hrapa ama châ. British ama rônahna chhâpa cha ama reih English cha khizaw liata reih abei chaipa, khizaw reih châta Khazohpa ta a hmâpa ama châ.

America hneirônah cha Khazohpa hmophapa tao awpa he amâ râpasuana chaipa a châ. Chavâta, khizaw liata Missionary a tuah hluh chaipa ama châpa vâta Khazohpa ta hneirônah nata rônahna a pie ei. Chavâta, khizaw liata sawhkhâ thatlô chaipa nata mohpathâhpa ama châpa a châ.

‘Thlahpa sâhpiti eimâ ngiah’ tahpa biepipa hmâpa ta tlohleina chôta Sermon ei ropa he chyhsa to ta Bible sôhzie nata a peimawhnazie, kô 200-300 hro n’awpa bie châ leipa ta, chhâzaw nata chhâzaw hronapa bie a châpa vâta nahkhaoh ahneipa maihta ama thei thei awpa nata chyhsa tota ama pahno khai thei n’awpa ta Abeipa Khazohpa ta byhnâ pie mawh sy. Amen.