Mara Sermon - SAHMA PHA LEINA ZIE

- Rev. C.Thalai

Sahma a pha leina zie he Bible ta, “Âmo cha ama thei tawhta nama pahno aw” (Mathai 7:16) tahpa hawhta sahma a niedo penawh maihta chyhsa phapa ta pua beih vei ei.

A phaleina zie:

1.   Sahma vâta tlâhleipa/ hri-iah phaleipa ama hluh tyh.

2.   Sahma ta palôhrupa buana a pahneisa.

3.   Sahma vâta chhôhkha hro a raopa ama hluh. A khohtlâhna nata apalaina a pahneisa.

4.   Sahma vâta nôvah a chhaihpa ama hluh.

5.   Sahma ta chhôhkha khihsa rietheina a tlôkhei.

6.   Sahma vâta chhôhkha phusâ sôh ama hmôpa zie hawhta hmô pha vei ei. Sahria pyupa liata hmo pasâpa hawh deita a châ. Sahma azuah penawh he liany acheituhpa ama châ.

7.   Sahma vâta zyhna kyh liata phôhryhpa apapeisaleipa ama hluh.

8.   Sahma vâta nôchâ hrozie a hluh.

9.   Sahma vâta chanô-chapaw kyh liata moleina a hluh.

10.                Sahma vâta khihtlâh liata buabâna rairuna a y tyh.

11.                Sahma vâta buana nata athietuna, sasyh hrona âlana nata

        ahluahtheipa apiepasina a hluh.

Sahma pha leina zie he Bible liata hmô awpa a hluh ngaita kaw. Anodeikua cha, sâkha (1) deita ei vaw palâsa tua aw.

“Zâ he chhâ daihmâ ha ta, khih a dei daihmâ haw. Chavâta, zohna liata hmotaopa cha thy ei sih la, khaihna atobina ta atobi ei suh u. Nohchhôh ta a ypa hawhta ângia ngaitapa ta y ei suh u. Sahma paripa ta y leipa ta, parâpa nata aphei hmâhpa ta y leipa ta; âtupa nata hiatliapa ta y leipa ta, Abeipa Zisu Krista châta âtobi u la, nama sapa piepie-aohraohna paki n’awpa ta khâpa hmah tao kha u” (Rawma 13: 12-14).

Sahma ta hmo aparao thei zie:

Sapa nata pôhpa a paraona dei chhao châ leipa ta, thlahpa taihta a parao thei tahpa pahno ei suh u. Sahma he Awnanopa eima chariahpa, maniah a parao theituhpa a châpa vâta eimâ dyuh lymâ awpa a châ. Chhôhto ta sahma châmaih tawhta eimâ boh thei n’awpa ta Abeipa Khazohpa lâta thlahchhâ via lymâ chyu suh vy.

Hla ataotuhpazy heta thlahpa lâ tawhta ama vaw hmôpasia kaw:

1.   Ei chariah hmo soh ngâh vana.

Hy ei yna riah china su;

Nohto moleina ta nâ dyuh,

Hy nâ chatlaituh paphapa ta.

          Hy na tobi Immanuel,

          Na thlahpa na tobi la;

          He khizaw molei zohna he,

          Na châ ei vaw dyuh aw na.

2.   Riethei panao ta ei y no,

Na châ ei riah a chhieno chhao;

Dyuhtuhpazy châ Beilakho,

Hy na taopa kha na chho heih la.

3.   Hy vaw sai tua ei Pachhatuh,

Na thisaih chatlai chiehpazy;

He khizaw molei zohna lia.

Amâ tâh Beipa reitiahlei zy.

4.   Nâ ta na bao la ei chariahpa,

Ei tiah aw na thisai zawhzi;

Na chhâzaw ryu to hr’awpa ta,

Hy molei sei tawh eina papua aw.

5.   Noh hro khih avaw deih tita,

Ei Pachhatuhpa ei hmô aw;

Ei chariah hmo ei soh khai aw,

Hy, poh ngyuh rônah na tobi aw.

          Sahma pha leinazie bie pipa hmapa ta sahpa nata thlahpa maniah aparaotheipa rarôh y ngasapa thatih ei ropa he, thinah châmaizy tawhta eima boh theih nawpa ta Abeipa eima Khazohpa ta azawngiana mathlaw ry liata maniah khu chyu maw sy, tahpa he ei thlahchhana a châ.